Yirugana yovapositoli 1:1-26
1 Mombilive zange zokuhova koge ove Tiyofirusa, ame kwa kutjangerere nayinye eyi ga rugene Jesus neyi nga rongo
2 dogoro ezuva eli va mu twere meguru, konyima zapa ga geve mapukururo kupitira mompepo zokupongoka kovapositoli vendi ava ga horowere.
3 Konyima zokumuhepeka dogoro ta ya fu, age kwa va likidire maumbangi gomanzi yipo va yi pure asi age sili muzuni, ano momazuva 40, age kwa va monekerere yikando yoyinzi noku va tantera kuhamena Uhompa waKarunga.
4 Apa ga kere nawo, ta va tantere asi: “Mwa ha tunda mo moJerusarema nye ndindireni eyi ga mu tumbwidira Tate, eyi mwa zuvha kwange,
5 yeeyi Johanesa nga kuhu nomema nye one ngava mu kuhwa nompepo zokupongoka, kapi napa pita mazuva gomanzi kutunda apa.”
6 Apa va pongere, tava mu pura asi: “Hompa, ngesi to tengwidire Vaisraeli uhompa ndi?”
7 Age ta va limburura asi: “Otate vemeguru velike va kara nononkondo dokutokora yiruwo eyi ngayi horoka yininke eyi, nye one kapi mwa hepa kudiva yiruwo oyo.
8 One ngomu gwana nonkondo apa mpepo zokupongoka ngazi wiza pweni, makura ngomu kare nombangi dange moJerusarema, moJudeya nazinye nomoSamaliya dogoro mouzuni naunye.”*
9 Apa ga mene kuuyunga eyi, hava hokwa kutara, tava mu zerura a ze meguru, eremo tali va vivi makura kapi va mu mwene hena.
10 Hava hokwa kutara keguru ngomu ana kukaza, va liharuka ko, vagara vavali vana dwara yikoverero yoyizera tava sikama pepi nawo
11 ta va pura asi: “One vagara womoGalireya, yisinke muna kutarera meguru? Jesus ogu muna mono kuna kumutwara meguru, nga ka tengura monkedi zokulifana moomu muna mu mono kuna kuza meguru.”
12 Awo tava tengura koJerusarema va tunde koNdundu zoMauzwe ezi za kere pepi naJerusarema, ayo kwa likere ure wokilometa zimwe.*
13 Apa va ya sikire, tava rondo konzugo zekeguru ezi va kere. Awo yiwo ava, Peturusa, Johanesa, Jakopo, Andiliyasa, Filipusa, Tomasa, Baratoromeusa, Mateusa, Jakopo munwaArufeusa, Simoni gomupampi ntani Judasa munwaJakopo.
14 Navenye ava kwa kanderere nositambo simwe, kumwe novakadi vamwe novamumbya vaJesus ntani nozina Mariya.
15 Momazuva ogo, apa va pongere, awo kwa sikire koyiha 120, Peturusa ta sikama mokatji kawo makura ta tanta asi:
16 “Vakwetu, ayo ya kere hepero asi etjangwa lyouporofete li sike mo eli ga uyungire Ndafita kupitira mompepo zokupongoka kuhamena Judasa ogu ga pitisilire ava va kwete Jesus.
17 Yeeyi nage kwa kere gumwe gwetu ntani nga lihameke mosirugana esi.
18 (Mugara ogo, yimaliwa yendi yokudira kuhungama yiyo va rende epya, age kwa gwire kawomba, makura ta tauka ezimo, ano yininke yendi yomonda ta yi tjupuruka mo.
19 Ayo kwa divikwire kovantu navenye ava va tungire moJerusarema, yipo epya olyo va li rukire meraka lyawo asi Akelidama kutanta asi “Epya lyoMponde.”*)
20 Yeeyi mobuke zoMapisarome kwa tjanga mo asi: ‘Sigeni embo lyendi li kare erunda ntani ga ha tunga mo muntu,’ ano ‘sirugana sendi va si gave komuntu gwapeke.’
21 Ayo yina kara hepero asi pevega lyendi va pinganesere po mugara gumwe ogu ga kara nose siruwo nasinye esi Hompa Jesus nga rugana yirugana yendi mokatji ketu,
22 kutunda apa ga mu kuhwire Johanesa dogoro mezuva eli va mu twere meguru. Mugara ogu a kare mbangi nose kuhamena evhumbuko lyendi.”
23 Makura tava horowora po vavali, Josefa Barasabasa ogu ava tumbura hena asi Jusitusa ntani naMatiyasa.
24 Awo tava kanderere asi: “Jehova, ove nyove wa diva eyi ya kara monomutjima dovantu navenye, tu horwera po povagara ava vavali asi gupi ono horowora po
25 a guse sirugana esi ntani noupositoli, eyi ga siga Judasa.”
26 Awo tava rugana fungu-fungu, sihoroweso tasi ka gwira pwaMatiyasa, makura tava mu gwederere kovapositoli 11.
Nonkango dokonhi
^ Ndi “oku wa ka hura uzuni.”
^ Ndi “sinano sokugenda mezuva lyEsabata.” Aso kuna kara sinano esi va pulisilire Mujuda a gende mezuva lyEsabata.
^ Kutanta asi epya eli va randa noyimaliwa eyi va futa mokudipaga muntu.
