Yirugana yovapositoli 10:1-48
-
Koroneliusa ta mono emoneko (1-8)
-
Peturusa ta mono yikorama eyi ga kuhura Karunga (9-16)
-
Peturusa ta dingura Koroneliusa (17-33)
-
Peturusa ta udisa mbudi zongwa konomuhoko dapeke (34-43)
-
“Karunga kapi ga kara nompongo” (34, 35)
-
-
Vantu wokonomuhoko dapeke tava gwana mpepo zokupongoka ntani tava va kuhu (44-48)
10 MoKesareya mwa kere mugara gedina Koroneliusa, mupitisili govakwayita efere mombunga zomoItaliya.*
2 Mugara ogu nava vemembo lyendi ngava tjira Karunga ntani nga ruganene vahepwe uwa nokulikwambera kwaKarunga nkenye apa.
3 Ano koyiha yovili zauntane,* ta mono muengeli gwaKarunga memoneko ana kuhwilira omu ga kere, ta mu zigida asi: “Koroneliusa!”
4 Koroneliusa ta mu nwike noku mu pura asi: “Yisinke muna hepa tate?” Age ta mu tantere asi: “Karunga ana zuvhu makanderero goge ntani kumona omu o vatere vahepwe.
5 Tuma vagara vamwe koJopa va ka zigide Simoni ogu ava tumbura hena asi Peturusa.
6 Mugara ogo mugenda* membo lyaSimoni, musunti goyipapa, alyo kwa kara pepi nefuta.”
7 Tupu ga tundire po muengeli ogu ga uyungire nage, Koroneliusa ta zigida vakareli vendi vavali nomukwayita ogu ga tjilire Karunga,
8 makura ta va tantere nayinye noku va tuma koJopa.
9 Ezuva eli lya kweme ko, awo simpe morugendo, pepi nokusika kositata, Peturusa ta rondo keguru lyonzugo poyiha yovili zauntazimwe* a ka kanderere.
10 Nye tazi mu kwata unene nzara, ta hara asi a lye. Awo simpe kuna kuwapaika nondya, ta mono emoneko,
11 eguru ta li zeguruka, ta mu tundu emukehe lyemunene vana kwaterere konondungu dalyo ne vana kuhegumwisira pevhu,
12 kwa kere mo yikorama yokulisiga-siga: yomaguru gane neyi yokuwovana ntani yidira.
13 Makura ta zuvhu ezwi lina kumutantera asi: “Peturusa, katuka o dipage o lye!”
14 Nye Peturusa ta tanta asi: “Nokuwapa si tate, yeeyi ame kapi na lya rumwe sininke sokunyata ntani sokudira kukuhuka.”
15 Ta zuvhu hena ezwi olyo sikando sauvali asi: “Hageka kutumbura yininke eyi ga kuhura Karunga asi ya nyata.”
16 Ezwi tali zuvhika hena sikando sautatu, ekehe makura tava li tengwida meguru.
17 Age Peturusa simpe kuna kulipura eyi lina kutanta emoneko, poopo ngoso, vagara ava ga tumine Koroneliusa tava pura oku lya kara embo lyaSimoni makura tava sikama poopo pevero.
18 Tava zigire va pure nsene asi Simoni ogu ava tumbura asi Peturusa yimo ga wizire ugenda.
19 Age Peturusa simpe kuna kugazara kuhamena emoneko, mpepo zaKarunga tazi mu tantere asi: “Poveli vagara vatatu vana kukupapara.
20 Katuka o humburuke pevhu o ze nawo, wa ha singanyeka morwa nyame nina va tumu.”
21 Peturusa makura ta humburuka a ze kwawo, ta tanta asi: “Nyame ogu muna kupapara. Yisinke muna wizire?”
22 Awo tava mu tantere asi: “Karunga kuna tumu muengeli gwendi gokupongoka a ka tantere Koroneliusa mupitisili govakwayita, mugara gomuhungami ogu ga tjira Karunga ntani ga fumana mokatji koVajuda, a ya kuzigide o ze kembo lyendi o ka purakene eyi na ka kutantera.”
23 Peturusa ta hwilida owo vagenda vendi membo.
Ezuva eli lya kweme ko, ta katuka a ze nawo, ntani vakwawo vamwe womoJopa nawo tava zi nage.
24 Ezuva eli lya kweme ko ta ka sika koKesareya. Koroneliusa kwa va ndindilire ntani age kwa zigidire ekoro lyendi novakwawo zendi wovanene.
25 Apa Peturusa ga hwililire, Koroneliusa ta mu simbagwire, ta gwire konompadi dendi a mu tongamene.*
26 Nye Peturusa ta mu katura, ta tanta asi: “Katuka, name muntu tupu ngwendi nyove.”
27 Awo kuna kugenda oku tava zogere, Peturusa ta hwilire, ta gwana vantu awo vana pongo.
28 Ta va tantere asi: “One mwa yi diva asi veta zoVajuda kapi za yi pulisira asi Mujuda a lipakerere ndi a hedere muntu gorudi rwapeke, nye Karunga kuna likida nge asi na ha tumbura muntu asi ga nyata ndi asi kapi ga kuhuka.
29 Ame nina wiza apa muna zigida nge, kapi nina nyoka. Tantereni nge nye eyi muna zigidire nge.”
30 Koroneliusa makura ta tanta asi: “Mazuva gane gana piti po kani kandererere kutunda povili ngazeezi, povili zauntane,* poopo ngoso, mugara goyikoverero yokupaima ta sikama komeho zange
31 nokutanta asi: ‘Koroneliusa Karunga ana zuvhu makanderero goge ntani kumona omu o vatere vahepwe.
32 Tuma vagara vamwe koJopa va ka zigide Simoni ogu ava tumbura hena asi Peturusa. Mugara ogo kuna kara membo lyaSimoni, musunti goyipapa, eli lya kara pepi nefuta.’
33 Ame yiyo nye kani va tumine va ka kuzigide, ono wapeke kweyi ono wiza. Ano ngesi tuna pongo komeho zaKarunga tu zuvhe nayinye eyi ga kutantera Jehova asi o ya yi tu tantere.”
34 Peturusa makura ta tanta asi: “Ngesi nina yi kwata egano asi Karunga kapi ga kara nompongo,
35 nye mwankenye muhoko, nkenye ogu a mu tjira noku rugana youhunga, age kumutambura.
36 Age kwa tumine mbudi koVaisraeli pokuvaudisira mbudi zongwa zombili kupitira mwaJesus Kristusa, Hompa gwanavenye.
37 One mwa yi diva asi konyima zekuho eli nga udisa Johanesa, vantu kwa uyungire yininke eyi moGalireya nomoJudeya nazinye kuhamena:
38 Jesus ogu ga tundire koNasareta, nomu Karunga ga mu gwavekere nompepo zokupongoka noku mu pa nonkondo, nomu nga rugana uwa nokuverura owo nga hepeke Muzonaguli, yeeyi Karunga kwa kere nage.
39 Ose nyose nombangi doyininke nayinye eyi ga rugene mosirongo soVajuda ntani moJerusarema, nye awo kwa mu dipagere pokumupampara* kositji.
40 Karunga kwa mu pindwire koufe mezuva lyautatu noku mu ninka a moneke,*
41 kapisi kovantu navenye nye konombangi edi ga horowere nare Karunga, kwetu, ose ngatu nu nokulya kumwe nage konyima zokumupindura koufe.
42 Age hena kwa tu pangerere tu zuvhisire vantu navenye asi age yige ga horowora Karunga a kare mupanguli govanamwenyo novafe.
43 Vaporofete navenye kwa gava umbangi kumuhamena asi nkenye ogu nga pura mwendi ngava mu dongwenena po nonzo dendi kupitira medina lyendi.”
44 Age Peturusa simpe kuna kuuyunga eyi, mpepo zokupongoka tazi wiza kwanavenye ava va purakenene kwendi.
45 Vapuli* ava va rugene yovamba, ava va wizire naPeturusa, kwa tetukire morwa uhwi wompepo zokupongoka kwa u geve nokonomuhoko dapeke.
46 Yeeyi awo kwa va zuvhire kuna kuuyunga momaraka gapeke nokuhamberera Karunga. Peturusa makura ta tanta asi:
47 “Kweli ogu na vhura kuvanyokesa mema va dire kuvakuhwa mokumona asi nawo vana gwana mpepo zokupongoka ngwendi nyose ndi?”
48 Age ta tanta asi va va kuhwire medina lyaJesus Kristusa. Awo makura tava mu ninki a kare nawo tanko mazuva gongandi.
Nonkango dokonhi
^ Kwa tamba kombunga zovakwayita woVaroma 600.
^ Kwa tamba koyiha yovili 3, sitenguko.
^ Ndi “kuna kumupakera mbili.”
^ Kwa tamba koyiha yovili 12, mutwekatji.
^ Ndi “nyongamene.”
^ Kwa tamba koyiha yovili 3, sitenguko.
^ MoRugereka asi “kuzenzeresa.”
^ Ndi “horoke.”
^ Ndi “valimburukwi.”
