Yirugana yovapositoli 11:1-30
11 Vapositoli novapuli vakwawo ava va kere moJudeya kwa zuvhire asi vantu wokonomuhoko dapeke nawo vana tambura nonkango daKarunga.
2 Apa Peturusa ga wizire koJerusarema, ava ngava kwatesa ko yovamba tava mu tangwisa*
3 asi: “Ove kwa zire membo lyovantu ava va dira kurugana yovamba noku ka lya nawo.”
4 Peturusa makura ta va fatwilire momunene asi:
5 “Ame kwa kere mositata saJopa oku tani kanderere, makura memoneko tani mono sininke sokufana ngwendi emukehe lyemunene vana kuhegumwisira pevhu vana kwaterere konondungu dalyo ne, alyo kwa hegumukilire pwange.
6 Apa na tere mo, tani mono mo yikorama yokulisiga-siga: yomaguru gane noyikasama neyi yokuwovana ntani yidira.
7 Makura tani zuvhu ezwi lina kutantera nge asi: ‘Peturusa, katuka o dipage o lye!’
8 Nye ame tani tanta asi: ‘Nokuwapa si tate, yeeyi mokana kange kapi mwa za rumwe sininke sokunyata ndi sokudira kukuhuka.’
9 Sikando sauvali, ezwi olyo tali tanta asi: ‘Hageka kutumbura yininke eyi ga kuhura Karunga asi ya nyata.’
10 Ezwi kwa zuvhikire hena sikando sautatu, makura nayinye tava yi tengwidire meguru.
11 Poopo ngoso, vagara vatatu ava va tumine kwange va tunde koKesareya, tava ya sikama pembo eli twa kere.
12 Mpepo zaKarunga makura tazi tantere nge ni ze nawo, na hana kusinganyeka. Vakwetu vamwe ntazimwe nawo kwa zire name makura tatu ka hwilira membo lyaKoroneliusa.
13 “Age kwa tu tanterere omu ga mwene muengeli ana sikama membo lyendi nokutanta asi: ‘Tuma vagara vamwe koJopa va ka zigide Simoni ogu ava tumbura hena asi Peturusa,
14 age nga ya kutantera yininke eyi ngayi kuparura nava vemembo lyoge.’
15 Nye apa na tamekere kuuyunga, tava gwana mpepo zokupongoka ngwendi moomu twa zi gwene ose petameko.
16 Poopo ngoso, tani diworoka nonkango daHompa edi nga uyunga asi: ‘Johanesa nga kuhu nomema, nye one ngava mu kuhwa nompepo zokupongoka.’
17 Nsene asi Karunga kwa va pa uhwi ngwendi wou ga tu pa ose twa pura mwaHompa Jesus Kristusa, ame nyame yilye nye ni kondere Karunga mokusikisa mo mpango zendi?”
18 Apa va yi zuvhire eyi, tava hageke kumutangwisa* nokuyererepeka Karunga pokutanta asi: “Karunga nani ga pa hena vantu wokonomuhoko dapeke mpito zokulitezurura yipo ngava paruke.”
19 Ava va lihene morwa udigu ou wa horokerere Sitefanesa, kwa zire koFonisiya nokoKipurusi ntani koAntiyokiya, nye awo kwa ka zuvhisilire Vajuda velike.
20 Nye vamwe ava va tundire koKipurusi nokoKirene kwa zire koAntiyokiya nokuzuvhisira ava ngava uyunga Rugereka mbudi zongwa zokuhamena Hompa Jesus.
21 Ntani hena, Jehova kwa kere nawo, ano wovanzi kwa ya kere vapuli nokuhama kwaHompa.
22 Mbudi zokuvahamena kwa ka sikire kombungakriste zomoJerusarema, makura tava tumu Baranabasa koAntiyokiya.
23 Apa ga ka sikire, ta mono asi Karunga ana fire varongwa nkenda, makura ta hafa ntani ta va korangeda va twikire mosirugana saHompa nomutjima nagunye,
24 yeeyi age kwa kere mugara gomuwa ogu ga zura mpepo zokupongoka nepuro. Ano vantu wovanzi kwa ya pulire mwaHompa.
25 Age makura ta zi koTaruso a ka papare Sauru.
26 Apa ga ka mu gwene, ta ka mu reta koAntiyokiya. Mvhura nazinye ngava pongo nawo mombungakriste nokuronga mbunga zovantu, megendeso lyaKarunga, moAntiyokiya yimo va rukilire varongwa asi Vakriste.
27 Momazuva ogo, vaporofete ngava gurumuka va tunde koJerusarema va ze koAntiyokiya.
28 Gumwe gowo gedina Agabusi, nevatero lyompepo zokupongoka kwa pumbire asi mouzuni naunye nga mu kara nzara zonene, ano eyi kwa ya horokere posiruwo saKeraudiusi.
29 Varongwa yipo va tokwere kugava yuma mokuvatera vapuli vakwawo womoJudeya, nkenye ogu kwa geve kuliza neyi ga kere nayo,
30 makura tava yi gava kwaBaranabasa naSauru, va ka yi gave kovakuronambunga.
