Yirugana yovapositoli 12:1-25
12 Momazuva ogo, hompa Herodesa kwa hepekere vamwe womombungakriste.
2 Age kwa tanterere vakwayita vendi va dipage Jakopo* mukurwaJohanesa norufuro.
3 Apa ga mwene asi yina hafesa Vajuda, ta tumu hena vakwayita vendi va ka kwate Peturusa. (Eyi kwa horokere momazuva goNomboroto da hana yihaheso.)
4 Vakwayita tava ka kwata Peturusa makura tava mu tura modorongo. Age kwa mu nomenene nombunga ne dovakwayita, mwankenye mbunga kwa kere mo vakwayita vane. Age kwa here asi ngava mu rete* komeho zovantu konyima zoPaska.
5 Peturusa kwa kere modorongo, nye mbungakriste kwa mu kandererere po unene kwaKarunga.
6 Ezuva limwe komeho Herodesa a ka pwagese Peturusa modorongo, Peturusa kwa rere pokatji kovakwayita vavali age kuna mu manga nomauketanga, ano vanomeni kwa sikeme pevero va nomene dorongo.
7 Ga liharuka ko, muengeli gwaJehova ana sikama, site tasi temene omu ga kere. Ta gumu Peturusa monompatji, ta mu pindura pokutanta asi: “Pinduka usimbu!” Makura mauketanga taga gu ko komawoko gendi.
8 Muengeli ta mu tantere asi: “Liwapaikira o dware yicamakaku yoge.” Age ta yi rugana. Ta mu tantere hena asi: “Dwara sikoverero soge sokontunda o kwame nge.”
9 Ta pwaga a kwame muengeli, nye kapi ga divire asi eyi yina kuhoroka usili. Age kwa gazarere asi emoneko ana kumona.
10 Tava piti mbunga zokuhova zovakwayita ntani zauvali, makura tava ka sika kevero lyosivera eli lya livyuka nositata, eli kwa va zegurukilire lyene. Tava pwaga nokugenda nzira zimwe, hava za mokugenda, muengeli ta dongonoka.
11 Peturusa makura ta dimburura eyi ya horokere, ta tanta asi: “Ngesi nina yi diva asi Jehova kuna tumu muengeli gwendi a ya zowore nge momawoko gaHerodesa ntani kwanayinye eyi va ndindilire Vajuda.”
12 Apa ga yi dimbwilire eyi, ta zi kembo lyaMariya zinyaJohanesa ogu ava tumbura hena asi Marukusa oku va pongere vantu wovasesu va kanderere.
13 Apa ga ngongwere kevero, mukareli gomukadona gedina Roda, ta ka tara ko a divilise asi yilye ana kara ko.
14 Apa ga dimbwilire asi ezwi lyaPeturusa, ta hafa unene ntani kapi ga zegwilire evero, nye ta duka a ka va tantere asi Peturusa ana sikama pevero.
15 Awo tava mu pura asi: “Usili ono kuuyunga?” Nye age ta kovekeda kuvatantera asi usili. Awo tava tanta asi: “Ntudi muengeli ana kara ko.”
16 Nye Peturusa kwa sikeme poopo oku ta ngongora. Apa va zegwilire evero tava mu mono, makura tava tetuka.
17 Ta va ninki nokuwoko va mwene makura ta va fatwilire omu Jehova ana mu pwagesa mo modorongo. Ta tanta asi: “Ka yi tantereni Jakopo novakwetu.” Ta tundu po, ta zi kevega nalyopeke.
18 Apa lya sire, vakwayita kwa va tetukisire morwa kapi va divire oku ga zire Peturusa.
19 Herodesa kwa mu paparere unene nye kapi ga mu gwene, ta puragere vanomeni noku gava mpangera asi va va tengeke, makura Herodesa ta gurumuka a tunde koJudeya a ze koKesareya oku ga ka kere karuwogona.
20 Age kwa handukilire vantu womoTirusi naSidoni. Awo makura tava wiza va ya likwambere kwaBirasitusi ogu nga gendesa embo lyahompa yipo a va vatere, tava uyunga nahompa va tulise po mbili, yeeyi vantu owo ngava randa nondya momukunda omu nga pangere Herodesa.
21 Ezuva limwe apa vantu va kere nosilika, Herodesa ta dwara yikoverero yendi yosiuhompa nokuhingira posipundi sokupangwira, makura ta va uyungisa.
22 Vantu ava va pongere makura tava zigire asi: “Eli ezwi lyakarunga, kapisi lyomuntu!”
23 Poopo ngoso, muengeli gwaJehova ta ninki maginyo ga lye po Herodesa makura ta fu, morwa age kwa gusire efumano eli lya fira Karunga.
24 Nye nonkango daJehova kwa lihanenene nakunye, ano vantu wovanzi kwa ya kere vapuli.
25 Ano Baranabasa naSauru apa va mene sirugana sokuvatera vakwawo moJerusarema, tava tengura, awo kwa pitwire Johanesa ogu ngava tumbura hena asi Marukusa.
Nonkango dokonhi
^ MoRugereka kapi va vyukilira kutumbura nsene asi Jakopo mukurwa ndi mumbyaJohanesa.
^ Ndi “va mu pangure.”
