Yirugana yovapositoli 13:1-52
13 Mombungakriste zomoAntiyokiya mwa kere vaporofete novarongi, awo yiwo ava: Sauru naBaranabasa naSimiyoni ogu ngava tumbura hena asi Musovagani naRusiusi gomoKirene naManayeni ogu ga dimbire sure kumwe nahompa Herodesa.
2 Hava za mokukarera Jehova nokudilira, mpepo zokupongoka tazi tanta asi: “Horoworeni Baranabasa naSauru va rugane sirugana esi na va zigidira.”
3 Konyima zokudilira nokukanderera, tava va kambeke mawoko makura tava va tumu.
4 Vagara ava za tumine mpepo zokupongoka, tava zi koSereukiya, ano kutunda opo tava zi nosikepa koKipurusi.
5 Apa va ka sikire moSaramesi, tava tameke kuzuvhisa nonkango daKarunga monosinagoge doVajuda. Ano Johanesa nawo ga kere a va vatere.*
6 Apa va ya pitire posirudi saPafo, tava ligwana nomugara goMujuda gedina Bara-Jesus, ogu ga kere mpure ntani muporofete goyimpempa.
7 Age nga ruganene mupangeli* Seregiusi Paurusa, mugara gonondunge. Age kwa here unene kuzuvha nonkango daKarunga yipo ga zigidire Baranabasa naSauru.
8 Nye Elimase (kutanta asi mpure) ta va patanesa, ta silike mupangeli asi ga ha yi pura.
9 Nye Sauru ogu ngava tumbura hena asi Paurusa, ta zura mpepo zokupongoka ta mu nwike
10 nokutanta asi: “Ove mugara ogu wa zura yimpempa noudona naunye, munwaMuzonaguli, ove nkore zoyininke nayinye yoyiwa, morwasinke ono kupukisira nonzira daJehova?
11 Jehova nga kutengeka pokukutwiza meho, ove kapi ngo mona site sezuva pokaruwogona.” Poopo ngoso, usovagani nendema tayi mu gwana, makura ta puputire a gwane ogu na mu kwata kokuwoko a mu pitisire.
12 Mupangeli apa ga mwene eyi ya horokere, ta kara mupuli, yeeyi erongo lyaJehova kwa mu tetukisire.
13 Paurusa novakwawo tava zi koPafo nosikepa, makura tava ka sika koPerege zomoPamufiliya. Nye Johanesa ta va sigi nokutengura koJerusarema.
14 Tava tundu moPerege va ze koAntiyokiya zomoPisidiya. MEsabata, tava zi mosinagoge makura tava hingire.
15 Apa vantu va mene kuresa Veta nomatjango goVaporofete, mupitisili gomosinagoge ta va tantere asi: “Vakwetu, nsene muna kara ko nonkango zekorangedo kovantu ava, zi uyungeni.”
16 Paurusa ta sikama ta va ninki nokuwoko va mwene, ta tanta asi:
“One Vaisraeli none ava mwa tjira Karunga, purakeneni.
17 Karunga goVasraeli kwa horowere ozinyakurwetu. Apa va kere moEgipite ngovanayirongo, age kwa va vaterere pokuruganesa nonkondo dendi a va guse mo.
18 Ntani age kwa va lididimikilire momburundu konyara zonomvhura 40.
19 Konyima zokuzonagura nomuhoko ntambali mosirongo saKanana, ta ninki ozinyakurwetu va pinge sirongo oso.
20 Nayinye eyi kwa horokere monomvhura 450.
“Konyima zeyi, ta va pe vapanguli dogoro komuporofete Samwere.
21 Kutunda opo, tava panga asi va va pe hompa, Karunga makura ta va pe Sauru munwaKisi gemezimo lyaMbenyameni ogu ga va pangerere nomvhura 40.
22 Apa va mu gusire mo mouhompa, tava tura Ndafita a kare hompa ogu va gaverere umbangi asi: ‘Ndafita munwalsayi ogu ga za nge komutjima nga rugana eyi na hara.’
23 Karunga kwa reterere Vaisraeli Jesus muzowoli gemezimo lyomugara ogo, ngamoomu ga yi tumbwidilire.
24 Komeho a wize, Johanesa nga zuvhisire Vaisraeli navenye va litezurure yipo va va kuhwe.
25 Nye Johanesa apa ga mene sirugana sendi, age kwa tente asi: ‘One omu omu gazarere nge asi nyame yilye? Ame kapisi nyame ogu mwa ndindira. Nye ogu nga wiza, ame kapi na wapera kuditura nongodi dokoyicamakaku yendi.’
26 “Vakwetu, one vemezimo lyaAbirahamu ntani none ava mwa tjira Karunga, mbudi ezi zokutuparura vana zi tu tumine.
27 Yeeyi ava va tunga moJerusarema ntani vapangeli vawo kapi va mu tambwire, nye apa va mu pangwire, awo kwa sikisire mo eyi va tjanga Vaporofete eyi ava resa nkenye Esabata.
28 Nampili ngomu va dilire kumugwana unzoni wokumudipagesa, awo kwa penge asi Piratusa a mu gave va ka mu dipage.
29 Apa va sikisire mo nayinye eyi va tjanga kumuhamena, tava mu turura ko kositji va ka mu rangeke montoko.*
30 Nye Karunga kwa mu pindwire koufe,
31 ano mazuva gomanzi, age kwa monekerere ava va tundire nage koGalireya va kanduke koJerusarema. Ava yiwo nye ava mu gavere umbangi.
32 “Yiyo nye tuna kumuzuvhisilira mbudi zongwa kuhamena etumbwidiro eli ga geve Karunga kozinyakurwetu.
33 Karunga kwa sikisa mo etumbwidiro olyo kwetu ose vana vawo pokupindura Jesus koufe ngamoomu va yi tjanga mepisarome lyauvali asi: ‘Ove munange, naina ame nina kara oguho.’
34 Age kwa mu pindwire koufe ntani kapi hena nga kara norutu ropanyama oru aru fu nokuwora, yeeyi Karunga kwa tente asi: ‘Ame ngani kulikida eharo lyanarunye eli na tumbwidilire Ndafita eli ngali sika mo.’*
35 Episarome limwe hena kwa tanta asi: ‘Ove kapi ngo pulisira mukareli goge a wore.’
36 Ndafita kwa sikisire mo mpango zaKarunga eparu lyendi nalinye, kwa fire* makura tava mu horeke pozinakuru ntani age kwa worere.
37 Nye ogu ga pindwire Karunga koufe, kapi ga worere.
38 “Vakwetu, yi diveni eyi asi mwendi yimo tupu mwelike ngava mu dongwenena po nonzo deni, ezi yizo mbudi vana kumuzuvhisira.
39 Ano kupitira mwendi, ava ava pura, Karunga kuvatara asi kwato nonzo. Nye Veta zaMosesa kapi tazi vhuru kugusa po nonzo.
40 Takameseni asi kapisi ngayi mu horokere eyi va tjanga momatjango goVaporofete asi:
41 ‘One vasensi, tareni yirugana eyi nina kurugana momazuva geni. One kapi ngomu yi pura asi ame kwa rugana yirugana eyi nampili gumwe ngayi mu fatwilire momunene. Nye one ngomu tetuka ntani ngomu fa.’”
42 Apa va pwege, vantu tava va likwambere asi ngava ya udise hena yininke eyi mEsabata lyokukwama ko.
43 Apa navenye va tundire mosinagoge, Vajuda wovanzi nava va ya kere Vajuda, tava kwama Paurusa naBaranabasa ava va va korangedere va kare monkenda zaKarunga zonene.
44 Esabata eli lya kweme ko, sinzi sovantu womositata kwa ya pongere va ya zuvhe nonkango daJehova.
45 Apa Vajuda vamwe va mwene mbunga, tava handuka nokurwanesa Paurusa ntani tava swaura yininke eyi ga uyungire.
46 Paurusa naBaranabasa makura tava va tantere nouradi asi: “Ayo yina kara nomulyo asi tu hove kumutantera nonkango daKarunga. Nye moomu ngoso muna di nyoka nokulikida asi kapi muna wapere mwenyo gwanarunye, ose tatu ka zuvhisira nomuhoko dapeke.
47 Yeeyi Jehova kwa tu pangera asi: ‘Ame kwa mu horowora mu kare uzera wonomuhoko, yipo mu zuvhisire uzuni naunye mbudi zeparu.’”
48 Vantu wokonomuhoko dapeke apa va yi zuvhire eyi, tava hafa oku tava yererepeke nonkango daJehova, ano ava va kere nonomutjima donongwa kwa ya kere vapuli.
49 Ntani hena, nonkango daJehova kwa lihanene mosirongo nasinye.
50 Nye Vajuda tava zeda vakadi ava va divikwire ntani va tjilire Karunga ntani novagara vamwe ava va divikwire mositata, vena tava rwanesa Paurusa naBaranabasa makura tava va tjida mo momukunda gwawo.
51 Awo makura tava va likukumwine mbundu zokonompadi dawo, tava ka za koIkoniya.
52 Ano varongwa kwa twikilire kuhafa ntani kwa zulire mpepo zokupongoka.
Nonkango dokonhi
^ Ndi “a va kwafe.”
^ Ndi “meyendo.”
^ Ndi “alyo kuvhura kulihuguvara.”
^ MoRugereka asi “kwa rere.”
