Yirugana yovapositoli 14:1-28
14 MoIkoniya, tava zi kumwe mosinagoge zoVajuda, awo kwa uyungire monkedi ezi za ninkisire Vajuda noVagereka wovanzi va kare vapuli.
2 Nye Vajuda ava va dilire kupura kwa zedagwilire vantu wokonomuhoko dapeke va rwanese Paurusa naBaranabasa.
3 Awo kwa kere moIkoniya siruwo sosire ntani Jehova kwa va nkondopekere va uyunge nouradi. Age hena kwa va vaterere va rugane yitetu noyidiviso yi kare umbangi wombudi ezi va zuvhisire, mbudi zokuhamena konkenda zaKarunga zonene.
4 Nye sinzi sovantu mositata kwa ligaunukire, vamwe kwa hamenene koVajuda ano vamwe kovapositoli.
5 Apa vantu wokonomuhoko dapeke noVajuda kumwe novapangeli vawo va here kuhepeka Paurusa naBaranabasa noku va toona mamanya,
6 awo tava yi dimburura makura tava tjwayukire koyitata yaLikayoniya naLisitira naDerube nokoyirongo yopopepi.
7 Oko yiko va ka zuvhisilire mbudi zongwa.
8 MoLisitira mwa kere mugara ogu ga hingilire, age kwa mu hampuruka nourema womaguru ntani kapi ga genda rumwe.
9 Mugara ogo kwa purakenene kwaPaurusa ngomu ga uyungire. Apa Paurusa ga mu mwene asi ana kara nepuro ntani ana yi pura asi kuvhura a veruke,
10 ta ziguruka kumutantera asi: “Katuka.” Mugara makura ta vatuka, ta tameke kugendagura.
11 Mbunga zovantu apa za mwene eyi ga rugene Paurusa, tazi zigire meraka lyoRulikayoniya asi: “Vakarunga vana lisintunuka vantu, yiyo vana humburuka va wize kwetu!”
12 Makura Baranabasa tava mu ruku asi Zeusi, ano Paurusa tava mu ruku asi Heremesi, yeeyi yige ga uyungire po.
13 Mupristeli gwaZeusi ogu ga kere nontembeli pepi nositata, ta reta nontwedu nonkata zonombya pomavero gositata, nage nombunga kwa here va zambere nonzambo Paurusa naBaranabasa.
14 Apa vapositoli ava Baranabasa naPaurusa va yi zuvhire, tava taura yikoverero yawo noku dukira mombunga oku tava zigire asi:
15 “Vakwetu, morwasinke muna kuruganena yininke yangesi? Nose vantu tupu twa kara nomaupirankondo ngwendi nyone. Ose kuna kumuzuvhisira mbudi zongwa yipo mu sige yininke ya hana mulyo mu kwame Karunga gomunamwenyo, ogu ga sita eguru nevhu nefuta nanayinye ya kara mo.
16 Nare age kwa pulisilire vantu wokonomuhoko nadinye va kwame yomonomutjima dawo.
17 Age kwa lihorwere kweni pokumuruganena yininke yoyiwa, age kwa mu rokeserere mvhura nokumupa yinema yoyiwa nonondya dina gwanene po yipo mu hafe.”
18 Nampili ngomu va uyungire yininke eyi, kapi va vhulire kukondera mbunga mokuvazambera nonzambo.
19 Nye Vajuda ava va tundire koAntiyokiya nokoIkoniya kwa zedagwilire mbunga zovantu, awo makura tava toona Paurusa nomamanya nokumupurututira ponze zositata, awo kwa gazarere asi ana fu.
20 Nye varongwa apa va mu kundurukidire, ta pinduka makura ta zi mositata. Ano ezuva eli lya kweme ko, tava zi naBaranabasa koDerube.
21 Apa va mene kukazuvhisira mbudi zongwa mositata oso nokukatulisa po varongwa wovasesu, tava ka tengura koLisitira nokoIkoniya ntani koAntiyokiya.
22 Moyitata oyo, awo kwa nkondopekere varongwa, awo kwa va korangedere va pame mepuro noku va tantera asi: “Mokuza moUhompa waKarunga, twa hepa kupita momaudigu gomanzi.”
23 Awo makura tava va horowere vagara vamwe mwankenye mbungakriste va kare vakuronambunga, tava va kanderere nokudilira ntani tava va sigi momawoko gaJehova, yeeyi vakuronambunga owo kwa pulire mwendi.
24 Makura tava ka pita moPisidiya va ze koPamufiliya,
25 apa va mene kuzuvhisira moPerege, tava gurumuka va ze koAtaliya.
26 Oko yiko nye va ka ronderere sikepa va ze koAntiyokiya oku va va kanderere po vapuli vakwawo kwaKarunga a va likide nkenda zendi zonene, yipo va sikise mo sirugana sawo.
27 Apa va ka sikire, tava ninki mbungakriste zi ponge, makura tava va tantere yininke yoyinzi eyi ga rugana Karunga mwarwawo ntani asi Karunga kwa pere mpito vantu wokonomuhoko dapeke va kare nepuro.
28 Makura tava kara siruwo sosire novarongwa.
