Yirugana yovapositoli 15:1-41
-
Nompata moAntiyokiya kuhamena yovamba (1, 2)
-
Udigu tava u twara koJerusarema (3-5)
-
Vapositoli novakuronambunga tava pongo kumwe (6-21)
-
Mbilive zokutunda kombungagendesi (22-29)
-
Mwa ha lihameka kohonde (28, 29)
-
-
Nombungakriste tadi gwana ekorangedo kupitira mombilive (30-35)
-
Paurusa naBaranabasa tava ligaunuka (36-41)
15 Vagara vamwe kwa gurumukire va tunde koJudeya va ze ko Antiyokiya makura tava tameke kuronga vapuli vakwawo asi: “Nsene kapi vana kumurugana yovamba kuliza noVeta zaMosesa, kapi ngomu paruka.”
2 Konyima zapa Paurusa naBaranabasa va kere nonompata dononene novagara owo, Paurusa naBaranabasa novakwawo tava va tumu koJerusarema yipo va ka zogere udigu* owo kumwe novapositoli novakuronambunga.
3 Konyima zapa mbungakriste za va sindikilire ko nakauke, vagara ava kwa pitire moFonisiya nomoSamaliya, va sanseke momunene omu vantu wokonomuhoko dapeke va litezwilire va karere Karunga, ano apa vapuli vakwawo va yi zuvhire eyi, tava hafa unene.
4 Apa va ka sikire moJerusarema, mbungakriste novapositoli ntani novakuronambunga kwa va tambwire nawa, ano Paurusa naBaranabasa tava sanseke omu Karunga ga rugene yininke yoyinzi kupitira mwawo.
5 Nye ava va kere nare Vafalisayi, tava katuka nokutanta asi: “Va hepa kuvarugana yovamba noku va pangera va kwame Veta zaMosesa.”
6 Makura vapositoli novakuronambunga tava pongo va tarurure nawa udigu owo.
7 Apa va mwene asi nompata kuna kudida, Peturusa ta katuka, ta va tantere asi: “Vakwetu, one mwa yi diva nawa-nawa asi Karunga kwa tokora nare mokatji keni asi ame ngani ka zuvhisira vantu wokonomuhoko dapeke mbudi zongwa yipo va kare nepuro.
8 Ano Karunga ogu ga diva mutjima, kwa likidire asi ga va tambura pokuvapa mpepo zokupongoka ngamoomu ga yi tu ruganenene nose.
9 Age kwa tu tere natuvenye asi vamwe tupu pokukuhura nomutjima dawo morwa awo kwa kere nepuro.
10 Morwasinke nye muna kuhetekera Karunga pokupa varongwa owo mudigo ogu gwa tu vhura kusimba nozinyakurwetu?
11 Nye ose twa yi pura asi natuvenye kuna kuparukira monkenda zonene zaHompa Jesus ngwendi yiwo.”
12 Mbunga nazinye tazi mwena makura tazi purakene kwaPaurusa naBaranabasa ngomu va simwitilire yidiviso noyitetu eyi ga rugene Karunga mokatji konomuhoko kupitira mwawo.
13 Apa va mene kuuyunga, Jakopo ta tanta asi: “Vakwetu, purakeneni nge.
14 Simiyoni* ntaantani tupu ana kumana kuuyunga omu Karunga ga diworoka vantu wokonomuhoko dapeke ntani age kwa horowera mo vamwe edina lyendi.
15 Ano eyi kwa liza nononkango doVaporofete, ngamoomu va yi tjanga asi:
16 ‘Konyima zeyi, ngani ka tengura ni ya tungurure nzugo* zaNdafita ezi za zunguruka noku zi wapukurura,
17 yipo vantu ava ngava hupa po ngava karere Jehova kumwe novantu wokonomuhoko dapeke. Ano Jehova ogu ana kurugana yininke eyi kwa tanta asi ngava va zigidisa kedina lyendi
18 ntani nare ga tokora kurugana yininke eyi.’
19 Yipo nye, kapi nina hara kupa mudigo vantu wokonomuhoko dapeke ava vana hara kukarera Karunga,
20 nye tani va tjangere asi va ha lihameka koyininke eyi ya hamena koyikarunga yoyimpempa ndi va lye sikorama sokufa sinkumatere* ndi va lihameke moruhonda* ndi kohonde.
21 Pwanare, koveli ava ngava zuvhisa eyi ga tjenge Mosesa mwankenye sitata, morwa nkenye Esabata ngava resa nobuke odo monosinagoge.”
22 Vapositoli novakuronambunga nombungakriste nazinye, kwa horowere vagara mokatji kawo nokuvatuma koAntiyokiya kumwe naPaurusa naBaranabasa, awo kwa tumine Judasa ogu ngava tumbura asi Barasabasa naSirasa ava ngava pitisire mosirugana.
23 Awo kwa tjenge mbilive noku zi tuma kumwe nawo omu mwa kere mbudi ezi asi:
“Ose vapositoli novakuronambunga novapuli vakweni, tatu mu tumine makundo, vakwetu one ava mwa kara moAntiyokiya nomoSiliya ntani nomoKilikiya one ava mwa tunda konomuhoko dapeke!
24 Ose kwa zuvha asi vamwe ava va tundire mokatji ketu, kwa ya mu tantera yininke eyi ya lilimba nepuliro lyeni nampili ngomu twa dilire kuyivapangera,
25 eyi yiyo tuna tokwere kumutumina vagara ava va wize kweni kumwe naBaranabasa naPaurusa ava twa hara,
26 vagara ava va ligava vene* morwa Hompa gwetu Jesus Kristusa.
27 Tatu mu tumine Judasa naSirasa, yipo nawo va ya mu tantere yininke eyi.
28 Yeeyi mpepo zokupongoka ntani nose kapi tuna hara kumupa mudigo gumwe hena ya hana asi yeeyi:
29 mwa ha lihameka koyininke eyi ya hamena koyikarunga yoyimpempa ndi mu lye sikorama sokufa sinkumatere* ndi mu lihameke moruhonda* ndi kohonde. Nsene mu ligusa ko koyininke eyi, ngayi mu genda po nawa. Mbaa!”
30 Vagara ava apa va tundire po tava zi koAntiyokiya, tava ka pongeka vantu navenye noku va pa mbilive.
31 Apa va mene kuziresa, awo kwa haferere ekorangedo olyo.
32 Mokumona asi Judasa naSirasa nawo kwa kere vaporofete, awo kwa nkondopekere nokukorangeda vapuli vakwawo kupitira moyiuyungwa.
33 Konyima zokukara ko siruwo songandi, tava va rekere nombili makura tava tengura koJerusarema.
34 *——
35 Nye Paurusa naBaranabasa kwa kere moAntiyokiya va ronge oku tava udisa kumwe novakwawo wovanzi mbudi zongwa zaJehova.
36 Konyima zomazuva gongandi, Paurusa ta tantere Baranabasa asi: “Tu tengure tu ka dingure vapuli vakwetu mwankenye sitata esi twa zuvhisira nonkango daJehova tu ka tare omu vana karere.”
37 Baranabasa kwa tokomenene kupitura ko Johanesa ogu ngava tumbura asi Marukusa.
38 Nye Paurusa kapi ga here asi va mu piture, yeeyi age kwa ka va sigire moPamufiliya ntani kapi ga zire nawo va ka zuvhise.
39 Tapa kara nomutangu dononene, makura tava ligaunuka, ano Baranabasa ta pitura Marukusa va ze kumwe koKipurusi nosikepa.
40 Konyima zapa Paurusa va mu kanderere po vapuli vakwawo kwaJehova a mu likide nkenda zonene, ta pitura Sirasa va ze.
41 Age ta zi koSiliya nokoKilikiya a ka korangede nombungakriste.
Nonkango dokonhi
^ Ndi “nompata.”
^ Nkedi zapeke omu ava tjanga edina lyaSimoni Peturusa.
^ Ndi “nkongoronzugo.”
^ Ndi “sikorama esi ava dipaga sa hana kuzoza honde.”
^ Ndi “geve eparu lyawo.”
^ Ndi “sikorama esi ava dipaga sa hana kuzoza honde.”
^ Tara mwaMateusa 17:21, ftn.
