Yirugana yovapositoli 16:1-40
16 Ta ka sika koDerube kutunda opo makura ta ka za koLisitira. Oko yiko ga kere murongwa gedina Timoteusa, ozina Vajuda wovapuli ano oguhwe Vagereka,
2 ano vapuli vakwawo womoLisitira nomoIkoniya ngava mu pandadeke.
3 Paurusa kwa here a ze naTimoteusa makura ta ka mu rugana yovamba morwa Vajuda ava va kere konomukunda edi va here kuza, yeeyi navenye va yi divire asi oguhwe Vagereka.
4 Ngomu va pitire moyitata, awo kwa divisire vapuli vakwawo eyi va tokwere vapositoli novakuronambunga moJerusarema, yipo nawo va yi kwame.
5 Ano nombungakriste kwa twikilire kupama mepuro ntani sivaro sado kwa ligwederere nkenye ezuva.
6 Ntani hena, awo kwa pitire moFiligiya ntani mosirongo saGarata yeeyi mpepo zokupongoka kwa va silikire kukazuvhisira momukunda gwaAsiya.
7 Nye apa va gurumukire va wize moMisiya, tava hetekere ko asi va ze moBitiniya, nye mpepo zaJesus kwa va silikire.
8 Tava piti zaMisiya va gurumuke koTorowasa.
9 Masiku, Paurusa ta mono memoneko mugara gomoMakedoniya ana ya mu sikamene komeho noku mu tantera asi: “Ruta omu moMakedoniya o ya tu vatere.”
10 Konyima tupu zapa ga mwene emoneko, tatu liwapaikire tu ze moMakedoniya, twa yi dimbwilire asi Karunga ana kututuma tu ka va zuvhisire mbudi zongwa.
11 Tatu tundu nosikepa koTorowasa tu vyukilire koSamoterake, ano ezuva lyokukwama ko tatu zi koNeopolisi;
12 kutunda opo tatu zi koFilipi sitata somulyo po momukunda gwaMakedoniya. Makura tatu ka kara mositata oso mazuva gongandi.
13 MEsabata, tatu pwaga mositata tu ze pepi nomukuro, oku twa gazarere asi yiko kwa kara evango oku ava kanderere, makura tatu hingire nokuuyunga novakadi ava va pongere.
14 Ano mukadi gedina Lidiya gomositata saTiyatira ogu nga randesa yikoverero nomakehe gopurupuli ntani nga karere Karunga, kwa purakenene, ano Jehova kwa mu vaterere a kwate egano eyi ga uyungire Paurusa.
15 Nage nepata lyendi apa va pwire kuvakuhwa, ta tu likwambere asi: “Nsene muna mono nge asi nina pura mwaJehova, wizeni mu ka kare membo lyange.” Age kwa tu sininikire dogoro tatu zi nage.
16 Ngomu twa zire kevango eli ngava kanderere, tatu ligwana nomupika gomukadona ogu ga kere nompepo zondona. Mukadona ogo nga pumbu yokomeho, ano vahekuru vendi ngava gwanene mo mauwa.
17 Mukadona ogu ngatu kwama-kwama naPaurusa oku ta zigire asi: “Vagara ava vakareli vaKarunga gemeguru-guru, awo kuna kumuudisira nzira zeparu.”
18 Nga yi rugana eyi mazuva gomanzi. Paurusa tayi mu nyegenyesa makura ta piruka nokutantera mpepo asi: “Tani kupangere medina lyaJesus Kristusa asi o tunde mo mwendi.” Poopo ngoso nazo tazi tundu mo.
19 Apa vahekuru vendi va ya dimbwilire asi vana zumbanesa mauwa gawo, tava kwata Paurusa naSirasa, tava va purututire pomarandesero kovapangeli.
20 Tava va twara kovapangeli wositata nokutanta asi: “Vagara ava kuna kureta ndjorongani zonene mositata setu. Awo Vajuda
21 ntani awo kuna kuronga nompo edi da dira kuliza noveta zetu ose Varoma.”
22 Mbunga tazi va vyuka, ano vapangeli wositata tava gava mpangera asi yikoverero yawo va yi taure makura va va toone noyiuro.
23 Konyima zokuvatoona yikando yoyinzi, tava va twara modorongo nokutantera munomeni godorongo a va nomene nawa-nawa.
24 Apa va mu pere mpangera ozo, age makura ta ka va tura modorongo zopokatji noku ka zweka maguru gawo mokakunzu.*
25 Nye pokatji komasiku, Paurusa naSirasa tava kanderere nokudimba va hamberere Karunga, awo vanadorongo kuna kuvapurakena.
26 Va liharuka ko evhu kuna kukankama dogoro netateko lyodorongo lyeeli kuna kulinyunganga. Ano mavero nagenye kuna kuzeguruka ntani yipandeko kuna kugwaagwa ko kovanadorongo.
27 Munomeni godorongo apa ga pindukire nokumona asi mavero godorongo gana zeguruka, ta pweza mo rufuro rwendi asi ngano a lidipage, morwa kwa gazarere asi vanadorongo vana hene mo.
28 Nye Paurusa ta zigire unene asi: “Wa ha lidipaga nyamoge, natuvenye motuli!”
29 Ta hundire ramba nokudukira monda, ta ligandere konompadi daPaurusa naSirasa oku ta kankama.
30 Age ta va pwagesa ponze nokuvapura asi: “Vakwetu, yisinke nani rugana yipo ni paruke?”
31 Awo tava mu tantere asi: “Pura mwaHompa Jesus yipo ngo paruke kumwe nepata lyoge.”
32 Makura tava mu zuvhisire nepata lyendi nonkango daJehova.
33 Ta va twara masiku googo, ta ka kuhwa yironda yawo. Makura poopo ngoso, ta va mu kuhu kumwe nepata lyendi.
34 Ta va twara membo lyendi makura ta wapaike sitafura noku va tulira po nondya, nage nepata lyendi kwa hefe unene kweyi va pulire mwaKarunga.
35 Apa lya sire, vapanguli wositata tava tumu ko vanomeni nombudi ezi asi: “Pwageseni mo vagara owo.”
36 Munomeni godorongo ta ka tantera Paurusa asi: “Vapangeli wositata kuna tumu vagara va ya mu pwagese mo. Pwageni mu ze nombili.”
37 Nye Paurusa ta va tantere asi: “Amesi kava tu toonene moyitarameho nokututura modorongo va hana kutupangura nye ose tu Varoma. Ngesi vana hara nye va tu pwagese mo mokahore-hore? Hawe, nokuvhura si! Va wize vene va ya tu pwagese mo.”
38 Vanomeni tava twara mbudi ozo kovapanguli wositata. Vena tava kara nowoma pokuzuvha asi vagara vena Varoma.
39 Tava wiza va ya va likwambere, ano konyima zokuvapwagesa mo, tava va tantere va tunde mo mositata.
40 Nye apa va tundire modorongo, tava zi kembo lyaLidiya, ano apa va mwene vapuli vakwawo, tava va korangeda makura tava ka za ko.
Nonkango dokonhi
^ Tara koMauzera.
