Yirugana yovapositoli 18:1-28
18 Konyima zeyi, ta tundu moAtena a ze koKolinte.
2 Oko yiko ga ka gwene mugara gedina Akura, age kwa kere Mujuda ogu va hampurukira moPontusi, age opo ntani ana kutunda koItaliya namukadendi Pilisikira. Morwa Keraudiusi* kwa pangerere Vajuda navenye va tunde mo moRoma. Makura ta zi kwawo
3 nokukakara pembo lyawo va rugane kumwe, morwa navenye ngava rugana sirugana simwe sokurugana notenta.
4 Age nga gava siuyungwa mosinagoge nkenye Esabata yipo Vajuda noVagereka va pure mombudi zendi.
5 Apa Sirasa naTimoteusa va gurumukire va tunde koMakedoniya, Paurusa ta litura mo unene mokuzuvhisa mbudi, pokugava umbangi koVajuda asi Jesus yige Kristusa.
6 Nye apa va twikilire kumurwanesa nokumuswaura, ta likukumuna mbundu koyikoverero yendi makura ta va tantere asi: “Unzoni u mu karere nyamweni.* Kapi nina kara nounzoni weni. Kutunda apa ame ngesi tani zi konomuhoko dapeke.”
7 Apa ga tundire mosinagoge, ta zi membo lyomugara gedina Titiusi Jusitusa ogu nga karere Karunga, embo lyendi kwa kere pepi nosinagoge.
8 Nye Kilisipusa, mupitisili gomosinagoge ta pura mwaHompa kumwe nava vemepata lyendi navenye. Ntani Vakolinte wovanzi ava va zuvhire mbudi zongwa, kwa pulire makura tava va kuhu.
9 Masiku, Hompa ta tantere Paurusa memoneko asi: “Wa ha tjira, nye twikira kuuyunga ntani wa ha mwena,
10 morwa ame nove nina kara ntani kwato ogu nga ku rugana yoyidona, yeeyi mositata esi, vantu vanzi ngava pura mwange.”
11 Age makura ta kara mo mvhura zimwe nomakwedi ntazimwe a va ronge nonkango daKarunga.
12 Apa ga kere Galiyo simpe mupangeli* gwaAkaya, Vajuda tava homokere Paurusa nokumutwara mevango lyokupangwira,
13 tava tanta asi: “Mugara ogu kuna kuninkisa vantu va karere Karunga monkedi ezi za lilimba noveta.”
14 Nye apa ga ninkire Paurusa asi a uyunge, Galiyo ta tantere Vajuda asi: “Nsene mugara ogu koyili eyi ga rugana yoyidona, ngano tani mu purakene nawa-nawa.
15 Nye nsene asi malitatano aga kuna hamene mo nonkango novantu noveta zeni, yi kohononeni po nyamweni. Kapi nina hara kukara mupanguli gwayo.”
16 Makura ta va tjida mo mevango lyokupangwira.
17 Navenye makura tava kwata Sositenesi, mupitisili gomosinagoge, tava mu toonene moomo mevango lyokupangwira. Nye Galiyo age kapi ga lihamekere mo.
18 Konyima zokukara mo mazuva gamwe hena, Paurusa ta rekere vapuli vakwawo makura ta zi nosikepa koSiliya, ano Pilisikira naAkura tava zi nage. MoKenkereya, age kwa tetere nohuki dendi di supipe, yeeyi age kwa tulire po mugano.
19 Tava ya siki moEfeso, vakwawo tava kara mositata, nye age ta hwilire mosinagoge a ka ronge Vajuda pokuvavatera va tede ko koMatjangwa.
20 Nampili ngomu va mu ninkire asi a kare po siruwo pwawo, kapi ga yi tambwire
21 nye age ta va rekere noku va tantera asi: “Nsene asi Jehova ana yi panga, ngani ka tengura hena kweni.” Ta rondo sikepa a tunde moEfeso,
22 ta ya siki moKesareya. Ta kanduka* a ka likunde nombungakriste makura ta gurumuka a ze koAntiyokiya.
23 Konyima zokukara mo karuwogona, ta zi moyitata yomosirongo saGarata naFiligiya, a ka korangede varongwa navenye.
24 Mujuda gumwe gedina Aporo ogu va hampurukira moArekisandiliya, ta ya siki moEfeso, age kwa kere muuyungi gomuwa ogu ga divire nawa Matjangwa.
25 Mugara ogu kwa mu rongere nonzira daJehova, ntani age kwa hweme* mompepo, age kwa uyungire nokuronga nawa-nawa kuhamena Jesus, nye age kwa divire tupu ekuho eli nga udisa Johanesa.
26 Ta tameke kuuyunga nomupampi mosinagoge, ano apa Pilisikira naAkura va mu zuvhire, tava mu twara kompengi va ka mu fatwilire nawa nzira zaKarunga.
27 Apa ga here kuza koAkaya, vapuli womoEfeso tava tjangere mbilive vapuli vakwawo wokoAkaya va ka mu tambure nawa. Apa ga ka sikire, kwa ka vaterere unene ava va ya kere vapuli morwa nkenda zaKarunga zonene,
28 yeeyi age kwa likidire Vajuda moyitarameho ntani nomupampi asi awo mepuko va kara noku va likida moMatjangwa asi Jesus yige Kristusa.
Nonkango dokonhi
^ Mupangeli gwaRoma.
^ MoRugereka asi “Unzoni wohonde zeni u mu karere nyamweni.”
^ Nampo koJerusarema.
^ Ndi “kwa kere noupampi.”
