Yirugana yovapositoli 19:1-41
19 Aporo age simpe moKolinte, Paurusa ta gendi nzira ezi za likara ure nefuta, ta ka sika koEfeso. Oko yiko ga ka gwene varongwa vamwe
2 makura ta va pura asi: “Mwa gwene mpepo zokupongoka apa mwa kere vapuli?” Awo tava mu limburura asi: “Kapi twa yi zuvha rumwe asi pwa kara mpepo zokupongoka.”
3 Age ta va pura asi: “Ekuho musinke nye va mu kuhwisa?” Awo tava limburura asi: “Ekuho lyaJohanesa.”
4 Paurusa ta tanta asi: “Johanesa nga zuvhisire vantu va litezurure yipo va va kuhwe, nga tantere vantu va pure mogu nga wiza konyima zendi, kutanta asi Jesus.”
5 Apa va yi zuvhire eyi, tava va kuhwire medina lyaHompa Jesus.
6 Ano apa Paurusa ga va kambekere mawoko, tava gwana mpepo zokupongoka makura tava tameke kuuyunga maraka gokulisiga-siga oku tava porofeta.
7 Vagara ava va porofetere kwa kere 12.
8 Ure womakwedi gatatu, Paurusa nga zi mosinagoge mokukagava yiuyungwa nouradi a vatere vantu va pure moUhompa waKarunga.
9 Nye apa vamwe va kukutikire nomutjima dawo nokudira kupura nokuswaura nzira zaHompa komeho zombunga, ta tundu po pwawo nokugusa mo varongwa mokatji kawo. Age nga gava yiuyungwa nkenye ezuva monzugo zoyigongi posure zaTiranusi.
10 Age kwa yi rugene eyi ure wonomvhura mbali, dogoro navenye ava va tungire momukunda gwaAsiya tava zuvhu nonkango daHompa, Vajuda noVagereka.
11 Karunga kwa ruganesere Paurusa a rugane yitetu yoyinene,
12 nampili yinasituke noyiteta yeeyi yokorutu rwendi apa ngava yi twarere vaveli, ngava veruka ntani nompepo donondona ngadi tundu mo mwawo.
13 Nye Vajuda vamwe ava ngava gendagura va hetekere ko kutjida mo nompepo donondona movantu, ngava ruganesa edina lyaHompa Jesus pokutanta asi: “Tani kupangere medina lyaJesus ogu a zuvhisa Paurusa.”
14 Pwa kere vana wovagara ntambali womupristeli goMujuda gedina Sikeva ava nawo ngava rugana yininke oyo.
15 Sikando simwe apa va yi rugene eyi, nompepo donondona tadi tanta asi: “Jesus twa mu diva, Paurusa nage twa mu diva, nye one nyone wolye?”
16 Mugara gonompepo donondona, ta va vatukire a di va sare gumwe nagumwe, hawe nayimwe si vana kutompora, nomonzugo kwa duka mo nye muhere-here* ntani vana remana.
17 Eyi kwa divikwire kwanavenye, Vajuda noVagereka ava va tungire moEfeso makura utjirwe tau va gwana navenye, edina lyaHompa Jesus tava li fumadeke.
18 Ano sinzi sava va ya kere vapuli kwa wizire va ya tante nonzo dawo noku ya horora yirugana yawo yoyidona komeho zovantu.
19 Sinzi sava ngava rugana youmpure kwa pongaikire nobuke dawo nokudihwika komeho zovantu navenye. Mulyo gwado apa va gu varwire, kwa ka sikire poyisiliveli 50 000.
20 Yimo nye ngoso da lihene nonkango daJehova makura ta di korerere.
21 Ya pwa eyi, Paurusa ta tokora asi tanko ta ka pita moMakedoniya nomoAkaya ntani na ka za koJerusarema. Ta tanta asi: “Apa ngani ka tengura koJerusarema, ngani ya za koRoma.”
22 Makura koMakedoniya ta tumu ko Timoteusa naErasitusa ava ngava mu vatere, nye age mwene ta kara tanko momukunda gwaAsiya.
23 Momazuva ogo, tapa horoka maudigu kuhamena ava va hamenene konzira zaHompa.
24 Yeeyi mugara gedina Demetereusi ogu nga ruganesa sisiliveli mokuninka tuntembeligona twakarunga gomukadi Diana,* kwa ninkisire ava nawo ngava rugana yokulifana va gwane yimaliwa yoyinzi.
25 Age kwa pongaikire vakwawo nava ngava rugana sirugana oso, ta va tantere asi: “Vakwetu, one mwa yi diva asi mongesefa ezi yimo atu gwanene uwa.
26 Nyamweni kuna kuyilimonena noku yi lizuvhira omu Paurusa ana kuzedagwira vantu wovanzi. Age kuninkisa vantu va kwame erongo lyapeke pokutanta asi vakarunga ava va rugana nomawoko kapisi vakarunga. Eyi kapisi moEfeso mwelike yina kuhoroka nye moAsiya nazinye.
27 Eyi kapi yina wapa, vantu kuvhura ngava uyunge yoyidona kuhamena ngesefa zetu. Awo ngava mona ntembeli zaDiana asi kwato mulyo. MoAsiya nazinye ntani uzuni mudima nkenye ogu kukarera karunga gomukadi Diana nye ngesi kapi ngava mu fumadeka hena morwa yeeyi ana kuuyunga Paurusa.”
28 Apa va yi zuvhire eyi, tava handuka unene makura tava zigire asi: “Diana goVaefeso munene!”
29 Sitata tasi kara mepiyagano, vantu navenye tava dukire mosira oku tava purututa Gaiyusi naAresitarekusi, Vamakedoniya ava ngava zi morugendo naPaurusa.
30 Paurusa kwa here kuza mozo mbunga, nye varongwa kapi va mu pulisilire.
31 Nampili vagendesi woyilika nomaudano ava va kere vakwawo, kwa tumine ko vantu va ka mu likwambere asi ga ha za mosira.
32 Mbunga kwa kere mondjorongani morwa vantu kwa zigilire, vamwe yeyi ano vamwe yapeke ntani sinzi sawo kapi va divire eyi va ya pongerere.
33 Vamwe womombunga kwa tumangedere Arekisandeli a uyunge, ano Vajuda kwa mu sindikire a ze komeho makura Arekisandeli ta kava vantu nokuwoko va mwene yipo a uyunge.
34 Nye apa va dimbwilire asi age Mujuda, navenye tava zigire kumwe ure wokusika koyiha yonovili mbali asi: “Diana goVaefeso munene!”
35 Apa mupangeli gositata ga mene kumwenekeda mbunga, ta pura asi: “One Vaefeso, ngoso kapi mwa yi diva asi ose vanomeni wontembeli zaDiana ntani nefano eli lya gwa keguru ndi?
36 Mokumona asi yininke eyi mwa yi diva, litureni, mwa ha rugana yininke yokudira kuwapa.
37 Yeeyi vagara ava muna tu retere, kapisi vahakani wotuntembeli ndi vaswauli vakarunga gwetu gomukadi.
38 Nsene asi Demetereusi novakwawo ava ava rugana sirugana sokulifana vana kara noudigu nomuntu gongandi, va mu tware komupangeli* apa azi kara mpanguro, oko yiko nye nava ka pangwira maudigu gawo.
39 Nye nsene asi muna kara noudigu wapeke, va hepa kuyizogera apa vantu ava pongo yipo va tokore kuliza noveta.
40 Eyi yina horoka naina kuna tu tura moudigu. Kuvhura va tu futise asi ose kuna kurwanesa morwa kapi tuna kara noumbangi weyi mbunga zina retere po ndjorongani ezi.”
41 Apa ga mene kuuyunga nonkango edi, ta ninki mbunga zi tunde po.
Nonkango dokonhi
^ Nkango zoRugereka va ruganesa apa kuvhura kutanta asi rutu-rutu ndi kuna dwara tupu yokonhi.
^ Ndi “Arutemisa.”
