Yirugana yovapositoli 2:1-47
2 Mezuva lyoPentekoste awo kwa pongere kumwe.
2 Poopo ngoso, meguru tamu tundu muhagaro ogu gwa zuvhikire ngwendi mpepo zonene zina kupepa. Ago kwa hagarere unene monzugo omu va hingilire.
3 Makura tava mono tumundiro tokufana ngwendi eraka, ato kwa tu hangwire, ano nkenye ogu taka mu tembere kamwe,
4 tava zura mpepo zokupongoka makura tava tameke kuuyunga maraka gokulisiga-siga, moomu za va pangerere mpepo zaKarunga.
5 Posiruwo sina, pwa kere Vajuda wokonomuhoko nadinye depevhu ava va litulire mo unene moukarelikarunga, awo kwa kere moJerusarema.
6 Ano apa mbunga zovantu za zuvhire muhagaro ogo, tava ya pongo ntani awo kwa tetukire morwa awo kwa zuvhire varongwa kuna kuuyunga maraka gokulisiga-siga.
7 Awo kwa tetukire unene, tava lipura asi: “Tareni si, nani navenye ava vana kuuyunga kapisi Vagalireya?
8 Ngapi nye omu nkenye gumwe gwetu ana kulizuvhira ko meraka lyamwene?*
9 Vapareti noVamede noVaerami nava va tunga moMesopotamiya moJudeya moKapadokiya nomoPontusi ntani momukunda gwaAsiya,
10 nogu gwaFiligiya naPamufiliya naEgipite ntani nonomukunda domoLibiya pepi naKirene nava va tundire koRoma, vamwe Vajuda, ano vamwe vaava va ya kere Vajuda,
11 vamwe Vakereta noVaarabiya, ose kuna kuvazuvha kuna kuuyunga momaraka getu kuhamena yirugana yoyinene yaKarunga.”
12 Yosili, awo kwa tetukire nokulipura vene navene asi: “Yisinke yina kutanta eyi?”
13 Nye vamwe tava va sense asi: “Vana korwa vhinyu zoutovara.”*
14 Nye Peturusa ta sikama kumwe novapositoli 11, makura ta ziguruka kuvauyungisa asi: “One Vajudeya none ava mwa tunga moJerusarema, purakeneni nawa nonkango dange mu kwate egano eyi nina kumutantera.
15 Vantu ava kapi vana korwa ngamoomu muna kuvagazarera, yeeyi ngesi vili zautatu.*
16 Nye eyi yiyo ga pumbire muporofete Jowera asi:
17 ‘Karunga kwa tanta asi: “Pomazuva gopouhura, ngani powomwena mpepo zange zokupongoka vantu navenye, ano vana veni wovamati nava wovakadona ngava porofeta ntani vadinkantu wovagara ngava mona mamoneko ntani vagara wovakondi ngava rota nonzodi,
18 ntani momazuva ogo, ngani powomwena mpepo zange vakareli vange wovagara nava wovakadi, ngava porofete.
19 Ngani likida yitetu meguru noyidiviso pevhu: honde, mundiro ntani musi gomunzi.
20 Ezuva ngali sovagana, ano kwedi nga kugeha ngwendi honde, komeho ngali wize ezuva lyenene lyaJehova.
21 Ano nkenye ogu a kugu edina Jehova ngava mu parura.”’
22 “One Vaisraeli, purakeneni kononkango dange edi asi Jesus Munasareta kwa mu tumine Karunga. Ayo kwa monekere moyitetu noyidiviso eyi nga rugana Karunga mokatji keni kupitira mwendi, ngamoomu mwa yi diva.
23 Karunga ga yi tokwere ntani ga divire nare asi ngava mu kwata. One kwa mu geve kovantu ava va dira kudiva veta va ka mu pampare kositji noku mu dipaga.
24 Karunga kwa mu mangwilire mo monomfa pokumupindura koufe, yeeyi nomfa kapi da vhulire kumukondera.
25 Yeeyi Ndafita kwa uyungire kumuhamena asi: ‘Jehova, name ga kara,* yeeyi age kwa kara korulyo rwange, yipo nye ame nokutjira si yuma.
26 Eyi yiyo mutjima gwange guna hafere ntani ame kuna kuuyunga noruhafo rorunene. Ame ngani huguvara moge,
27 morwa kapi ngo sigilira nge moMayendo,* ndi asi o sigilire mukareli goge gomulimburukwi a wore.
28 Ove kwa ronga nge nzira ezi azi twara komwenyo, ngo zwida mutjima gwange ruhafo komeho zoge.’*
29 “Vakwetu, pulisireni nge ni uyunge nemanguruko kuhamena Ndafita, guhya govazinyakurwetu, age kwa fire tava mu horeke, ano ntoko zendi simpe pozili nelyezuva.
30 Morwa age kwa kere muporofete ntani ga divire asi Karunga kwa mu tumbwidilire nomugano asi gumwe gomoruvharo rwendi nga hingira posipundi souhompa,
31 age kwa mwene evhumbuko lyaKristusa lyokomeho nokuuyunga asi kapi ngava mu sigilira moMayendo* ndi asi rutu rwendi ru wore.*
32 Karunga kwa pindura Jesus koufe, ano ose nyose nombangi dayo.
33 Morwa kwa mu twere meguru a ka hingire korulyo rwaKarunga noku ka gwana mpepo zokupongoka ezi va mu tumbwidilire oGuhwe, yiyo ana zi tu powomwene, ngwendi moomu muna kumona nokuzuvha.
34 Yeeyi Ndafita kapi ga za meguru, nye age mwene kwa tanta asi ‘Jehova kwa tanterere Hompa gwange asi: “Hingira korulyo rwange
35 dogoro ngani ture nonkore doge ngosilyatero sonompadi doge.”’
36 Yipo nye, muhoko nagunye goVaisraeli gwa hepa kudiva nawa-nawa asi Karunga yige ga tulire Jesus a kare Hompa ntani Kristusa, ogu mwa pamparere kositji.”
37 Apa va yi zuvhire eyi, ta yi va tu komutjima, makura tava pura Peturusa novapositoli navenye asi: “Vakwetu, yisinke natu rugana?”
38 Peturusa ta va tantere asi: “Litezurureni, va mu kuhwire medina lyaJesus Kristusa yipo va mu dongwenene po nonzo deni. Makura ngomu gwane mpepo zokupongoka ezi a gava Karunga mawoko-woko.
39 Azo kwa zi mu tumbwidira kumwe novana veni, nanavenye ava va kara koure ntani kwanavenye ava ga zigida Jehova, Karunga gwetu.”
40 Age kwa twikilire kuvakorangeda nokuvazuvhisira nayinye pokutanta asi: “Liguseni ko kovantu ava wovadona, ngava dire kumuzonagura po.”
41 Ava va tambwire nehafo eyi ga tente Peturusa kwa va kuhwire ntani mezuva olyo, vantu wokusika koyiha 3 000 kwa va gwederere kovapuli.
42 Awo kwa twikilire kulirongera ko kovapositoli, nokukara kumwe nokulya kumwe ntani nokukanderera.
43 Vapositoli kwa rugene yitetu noyidiviso yoyinzi. Navenye kwa yi mwene eyi makura tava fumadeke Karunga.
44 Navenye ava va kere vapuli kwa kere kumwe nokuligavera nayinye eyi va kere nayo,
45 awo hena kwa randesere mavango gawo noyiweka yawo nokugavera yimaliwa kwanavenye. Nkenye ogu kwa mu pere eyi ga hepere.
46 Nkenye apa ngava pongo kumwe montembeli ntani ngava li kumwe momambo gawo oku tava ligavere nondya dawo noruhafo kutundilira komutjima,
47 oku tava hamberere Karunga ntani vantu kwa va haferere. Ano Jehova kwa twikilire kugwederera vantu kombunga zawo nkenye ezuva, vantu owo vava ga parwire Karunga.
Nonkango dokonhi
^ Ndi “meraka lyomvharerwa zendi?”
^ Ndi “vhinyu zompe.”
^ Kwa tamba koyiha yovili 9, ngurangura.
^ Ndi “komeho zange.”
^ MoRugereka asi “kosipara soge.”
^ Ndi “zonauke.”
