Yirugana yovapositoli 20:1-38
20 Apa za pwire ndjorongani, Paurusa ta zigida varongwa, ta va korangeda noku va rekera makura ta zi koMakedoniya.
2 Konyima zoku ka pita monodoropa damo noku ka korangeda vapuli vakwawo makura ta zi moGereka.
3 Age kwa ka kere mo makwedi gatatu, nye apa ga here kuza nosikepa koSiliya, ta dimburura asi Vajuda vana lizuvhu asi va mu dipage makura ta tokora kupita nzira zaMakedoniya a tengure.
4 Age kwa mu sindikilire Sopateli munwaPirusi gomugara gomoBereya naAresitarekusi naSekundusi womoTesaronika naGaiyusi gomoDerube naTimoteusa ntani Tikikusi naTorofimusi womomukunda gwaAsiya.
5 Vagara ava kwa pitire komeho va ka tu ndindilire moTorowasa.
6 Ose kwa genderere mosikepa tu tunde moFilipi ano konyima zomazuva gosipito soNomboroto da hana yihaheso, momazuva gatano tatu ka sika kwawo moTorowasa, omo kwa ka kere mo mazuva ntambali.
7 Mezuva lyokuhova lyomosivike,* apa twa pongere tu lye, Paurusa ta va uyungisa, age kwa va uyungisire siruwo sosire dogoro pokatji komasiku, morwa ezuva lyokukwama ko age kwa pitakanene.
8 Monzugo zekeguru omu twa pongere kwa kere mo noramba dononzi.
9 Mumatigona gedina Eutikusi kwa hingilire pekende makura ta pwire monompofu age Paurusa simpe kuna kuuyunga, ta gu konzugo zautatu zekeguru, va ka mu gwene age ana fu.
10 Paurusa makura ta humburuka pevhu, ta nyongama ta mu lidingire makura ta tanta asi: “Mwa ha kara nosinka, ngesi muzuni.”
11 Paurusa ta tengura konzugo zekeguru, ta bamuna mboroto a lye. Ta twikire kuvauyungisa dogoro monongura, makura ta zi.
12 Tava twara mumati age muzuni, ano eyi kwa va hengagwidire unene.
13 Tatu rondo mosikepa tu ze koAsosi oku ga ka tu gwene Paurusa morwa age kwa gendere porupadi, oko yiko twa ka mu rondekerere mosikepa ngomu ga tu tanterere.
14 Apa ga ka tu gwene moAsosi, tatu mu rondeke mosikepa tu ze koMitirene.
15 Ezuva eli lya kweme ko, tatu zi nosikepa makura tatu ka sika posirudi saKiyosi. Mezuva lyauvali, tatu ka sika koSamosi ano mezuva lyautatu moMiretusi.
16 Paurusa kwa tokwere kukapitakana Efeso morwa kapi ga here kukara siruwo moAsiya, yeeyi age kwa here asi nsene kuvhura, a ka sike koJerusarema mezuva lyosipito soPentekoste.
17 Age moMiretusi, ta tumu mbudi va ka zigide vakuronambunga womombungakriste zaEfeso.
18 Apa va ya sikire, ta va tantere asi: “One mwa diva nawa-nawa nkareso zange kutunda ezuva eli na wizire moAsiya,
19 ame ngani karere Hompa nelinunupiko noruhodi nomahepeko morwa Vajuda ava va here kurugana nge yoyidona.
20 One mwa yi diva hena asi kwato eyi na mu horekera yokumuretera uwa nye ame ngani mu rongo moyitarameho ntani tunda embo zende embo.
21 Ame kwa zuvhisira nawa-nawa Vajuda noVagereka asi va litezurure, va tengure kwaKarunga nokupura mwaHompa Jesus.
22 Ame ngesi tani zi koJerusarema mepitisiro lyompepo zokupongoka, nampili ngomu nina dili kudiva asi yisinke nayi ka horokera nge ko oko,
23 nye mwankenye sitata, mpepo zokupongoka kudivisa nge nkenye apa asi dorongo nomaudigu gana kundindira nge.
24 Nye ame kapi ani tara eparu* lyange asi mulyo kupitakana kusikisa mo eyi na hepa kurugana ntani sirugana esi ga pa nge Hompa Jesus sokugava umbangi wombudi zongwa kuhamena nkenda zaKarunga zonene.
25 “Ame na mu zuvhisira Uhompa waKarunga, nye kutunda apa ngesi kapi ngomu mona nge hena.
26 Nina hara mu kwate egano asi nkenye ogu nga dira kukaparuka, kapisi nzo zange,
27 yeeyi ame na mu tantera sitambo* saKarunga, kwato eyi na mu hupisira ko.
28 Litakameseni nyamweni one hena mu takamese siunda, morwa mpepo zokupongoka kwa mu horowora mu kare vatareli vaso, mu pakere mbili mbungakriste zaKarunga ezi ga randa nohonde zaMunendi.
29 Ame nina yi diva asi apa ngani dira po, vantu wokukara ngwendi mambungu ngava wiza mokatji keni ntani kapi ngava tekura siunda nonkenda,
30 ano vamwe mokatji keni ngava pirura usili yipo ngava gwanene po varongwa.
31 “Yipo nye nomu vangararera oku tomu diworoka asi nomvhura ntatu, masiku nomutenya, ame ngani pukurura nkenye gumwe gweni noruhodi.
32 Ame tani mu gava momawoko gaKarunga nokononkango dendi edi adi uyunga kuhamena nkenda zendi zonene. Ado ngadi mu nkondopeka noku mu ninka mu gwane upingwa kumwe novapongoki.
33 Ame kapi na gusa sisiliveli ndi ngorodo ndi sikoverero somuntu.
34 None mwa yi diva asi mawoko gange aga, yigo ga vatera nge ni lirere nyamwange nava va kere name.
35 Mwanayinye na mu likida omu nomu vatera varupirankondo. Ntani diworokeni eyi ga tente Hompa Jesus asi: ‘Kugava kureta ruhafo kupitakana kutambura.’”
36 Apa ga mene kuuyunga yininke eyi, navenye tava tongamene, va kanderere.
37 Navenye kwa lilire unene, tava lidingire Paurusa oku tava mu ncumita,
38 yeeyi kwa va guvisire unene kweyi ga va tanterere asi kapi hena ngava mu mona. Makura tava mu sindikire ko a ze kosikepa.
Nonkango dokonhi
^ Ezuva eli atu tumbura asi Sondaha, koVajuda alyo kwa kere ezuva lyokuhova lyomosivike.
^ Ndi “mwenyo.”
^ Ndi “mapukururo.”
