Yirugana yovapositoli 21:1-40
21 Apa twa ligaunukire, natuvenye kwa guvire unene makura tatu zi nosikepa, tatu ka sika koKoso, ezuva eli lya kweme ko, tatu zi koRodesi kutunda opo tatu ka za koPatara.
2 Apa twa gwene sikepa esi sa zire koFonisiya, tatu rundurukire mo tu ze naso.
3 Tatu mono sirudi saKipurusi korumoho,* nye tatu si sigi nokuvyuka koSiliya makura tatu ka sika koTirusi oku sa ka herwilire sikepa nomurongero daso.
4 Ose kwa paparere varongwa, tatu va gwana makura tatu kara moomo mazuva ntambali. Mpepo kwa pukwilire varongwa va ninke Paurusa asi ga ha za koJerusarema.
5 Apa twa mene kuvadingura makura tatu katuka tu ze, nye navenye kumwe novakadi novanona tava tu sindikire dogoro tatu ka pwaga mositata. Apa twa ka sikire pezenga, tatu tongamene tu kanderere
6 makura tatu lirekere. Kutunda opo, tatu ka ronda mosikepa, awo makura tava tengura komambo gawo.
7 Apa twa tundire koTirusi tatu ka sika koPutoremaisi nosikepa, makura tatu likundu novapuli vakwetu, tatu kara nawo ezuva limwe.
8 Ezuva eli lya kweme ko tatu ka sika moKesareya, tatu zi membo lyaFilipusa muzuvhisi gombudi zongwa, gumwe gowo ntambali ava va horowere vapositoli, makura tatu kara pwendi.
9 Mugara ogu kwa kere novana vane wovakadona wovadike ava ngava porofeta.
10 Nye konyima zapa twa kere po mazuva gomanzi, muporofete gedina Agabusi ta gurumuka a tunde koJudeya.
11 Ta wiza kwetu nokugusa liva romombunda zaPaurusa makura tali manga mwene komaguru nokomawoko noku tanta asi ‘mpepo zokupongoka kuna tanta asi: “Mwenya liva oru yimo ngava ka mu manga ngesi Vajuda moJerusarema noku ka mu gava momawoko govantu wokonomuhoko dapeke.”’
12 Apa twa yi zuvhire eyi, natuvenye kumwe nava va kere po, tatu mu likwambere asi ga ha za koJerusarema.
13 Paurusa makura ta tanta asi: “Morwasinke muna kulilira mu dompese mutjima gwange? Yi diveni asi ame nina liwapaikire kukatura nge modorongo noku ka fira moJerusarema medina lyaHompa Jesus.”
14 Apa ya tu vhulire kumukondera, tatu hageke kumusilika* nokutanta asi: “Mpango zaJehova zi sike mo.”
15 Konyima zeyi, tatu liwapaikire rugendo rwetu makura tatu zi koJerusarema.
16 Varongwa vamwe wokoKesareya kwa zire nose, makura tava tu twara kembo lyaMunasoni gomoKipurusi murongwa gwanare, oko yiko twa ka kere.
17 Apa twa ka sikire moJerusarema, vapuli vakwetu kwa tu tambwire noruhafo.
18 Nye ezuva lyokukwama ko Paurusa ta zi nose kwaJakopo ano vakuronambunga navenye yipo va kere.
19 Ta va morora makura ta va tantere nayinye eyi ga rugana Karunga monomuhoko kupitira mosirugana sendi.
20 Apa va yi zuvhire eyi, tava hamberere Karunga nye tava mu tantere asi: “Mukwetu, mayovi goVajuda ava va ya kara vapuli kwa kondjerere Veta.
21 Nye awo kwa zuvha asi ove kuronga Vajuda navenye wokonomuhoko dapeke va dire kukwama Veta zaMosesa pokuvatantera asi va ha rugana vana vawo yovamba ndi asi va kwame yompo.
22 Yisinke nye natu rugana? Awo nava yi zuvha asi ko wizire.
23 Rugana eyi natu kutantera. Tuna kara novagara vane ava va gana mugano kwaKarunga.
24 Zende kumwe novagara owo mu ka likuhure nawo pampo, o ka va futire yipo va ka va kurure. Makura navenye ngava dive asi eyi va uyunga kukuhamena kapisi usili nye asi ove kuna kulimburukwa Veta.
25 Ano kovapuli wokonomuhoko dapeke, twa va tjangera etokoro lyetu asi va ha lihameka koyininke eyi ya hamena koyikarunga yoyimpempa ndi va lye sikorama sokufa sinkumatere* ndi va lihameke moruhonda* ndi kohonde.”
26 Ezuva eli lya kweme ko, Paurusa ta zi kumwe novagara owo va ka lizerese pampo. Tava zi montembeli va ka tante asi mezuva musinke ngaga pwa mazuva ntambali gokulizeresa pampo, yipo mupristeli nga zambere nkenye gumwe gwawo nzambo mezuva olyo.
27 Mazuva ntambali apa ga kere pepi nokupwa, Vajuda wokoAsiya tava mu mono montembeli, tava tumangeda mbunga nazinye makura tazi mu kwata,
28 tava zigire asi: “One Vaisraeli, tu vatereni! Mugara ogu yige a rongo vantu nakunye va rwanese vantu vetu noVeta zetu nokudira kufumadeka evango eli. Age hena kuna reta Vagereka montembeli nokunyateka evango eli lyokupongoka.”
29 Yeeyi awo kwa mwene Torofimusi gomoEfeso kumwe naPaurusa mositata makura tava gazara asi kuna mu reta montembeli.
30 Sitata nasinye kwa kere mondjorongani, vantu tava duka makura tava ya kwata Paurusa, tava mu purututire ponze zontembeli, poopo ngoso mavero tava ga zedire.
31 Awo simpe kuna kukondja asi va mu dipage, mbudi tazi ka sika komupitisili govakwayita asi Jerusarema kuna kara mepiyagano,
32 poopo ngoso, ta gurumuka kumwe novakwayita ntani novapitisili wovakwayita makura tava duka va ze ko. Apa va mwene mupitisili govakwayita eyovi novakwayita, tava hageke kutoona Paurusa.
33 Mupitisili govakwayita ta heda pepi, ta mu kwata makura ta ninki va mu mange nomauketanga gavali, kutunda opo ta pura mbunga asi yige yilye ntani neyi ga rugana.
34 Nye vamwe mombunga tava zigire, vamwe yeyi ano vamwe yapeke. Age kapi ga divire eyi yina kuhoroka morwa ezogerero lyenene makura ta panga asi va mu tware kokamba zovakwayita.
35 Nye apa ga ka sikire poyirondero, vakwayita tava mu damuna morwa mbunga kwa ndundanene asi zi mu kwate,
36 yeeyi mbunga zovantu kwa twikilire kukwama oku tava zigire asi: “A fe!”
37 Eyi va ninka asi va mu hwilide mokamba zovakwayita, Paurusa ta pura mupitisili govakwayita asi: “Kuvhura ni uyunge nove?” Age ta mu pura asi: “Wa diva Rugereka?
38 Nani kapisi nyove gwina Muegipite ga retesere po ndjorongani nokupitisira vagara wovadipagi 4 000 va ze momburundu?”
39 Paurusa makura ta mu tantere asi: “Ame Mujuda gokoTaruso moKilikiya, ame kwa retera nge mositata esi sa divikwa. Nina kanderere, pulisira nge ni uyunge novantu.”
40 Apa ga mu pulisilire, Paurusa ta sikama poyirondero, ta ninki vantu nokuwoko kwendi va mwene. Apa va mwenene, ta va uyungisa meraka lyoRuhebeli asi:
Nonkango dokonhi
^ Ndi “kezenga.”
^ MoRugereka asi “tatu mwena.”
^ Ndi “sikorama esi ava dipaga sa hana kuzoza honde.”
