Yirugana yovapositoli 22:1-30
22 “Vakwetu novaguhya, purakeneni ni mu fatwilire eyi ya horoka.”
2 Apa va zuvhire asi age kuna kuvauyungisa moRuhebeli, tava mwena teete makura age ta tanta asi:
3 “Ame Mujuda va hampurukira moTaruso moKilikiya, ano Gamaliyeli yige ga ronga nge moomu mositata esi yipo ni kwame nawa-nawa Veta zozinyakurwetu. Name kwa kere mupampi mweyi yaKarunga ngwendi moomu muna kuyirugana.
4 Ame ngani kwata vagara novakadi ava va hamenene konzira zaHompa, ngani va gava va va ture monodorongo, va va hepeke ntani noku va dipagesa,
5 mupristeli gomunene nosigongi somasimbi nawo va yi diva eyi. Kwawo yiko na gwene nombilive yipo ni ka kwate vapuli ava va kere moDamasikusi. Ame kwa zire ni ka va kwate, ni va rete koJerusarema va ya va tengeke.
6 “Nye ngomu na gendere noku sika pepi naDamasikusi, koyiha yometaha, hararasi meguru ta mu tundu site sosinene, tasi temene nge
7 makura tani ligandere pevhu, tani zuvhu ezwi lina kutantera nge asi: ‘Sauru, Sauru, morwasinke ono kuhepekera nge?’
8 Ame tani limburura asi: ‘Nyove yilye Hompa?’ Age ta tantere nge asi: ‘Nyame Jesus Munasareta, ogu ono kuhepeka.’
9 Vagara ava va kere name, va mwene site nye kapi va zuvhire ezwi lyogu ga uyungisire nge.
10 Ame yipo na pulire asi: ‘Yisinke nani rugana Hompa?’ Hompa ta limburura nge asi: ‘Katuka o ze koDamasikusi, oko yiko ngava ka kutantera eyi ngo hepa kukarugana.’
11 Ame kapi na mwene morwa site sosinene esi sa temenene nge, makura vagara ava na kere nawo yipo va kwaterere nge komawoko dogoro tani ka sika moDamasikusi.
12 “Makura mugara gedina Ananiyasa ogu ga tjilire Karunga ntani nga limburukwa Veta, ogu ngava pandadeke Vajuda navenye ava va tungire mo,
13 ta wiza kwange. Ta ya sikama pwange, ta tanta asi: ‘Sauru, mukwetu, mona hena!’ Poopo ngoso, tani kankuka makura tani mu mono.
14 Age ta tanta asi: ‘Karunga gozinyakurwetu ana kuhorowora o dive mpango zendi noku mona muhungami ntani o zuvhe ezwi lyendi,
15 morwa ove ngo kara mbangi zendi kovantu navenye koyininke eyi ono mono neyi ono zuvhu.
16 Yisinke ono kundindira? Zende va ka kukuhwe yeeyi nsene o kuga edina lyaJesus, Karunga nga kudongwenena po nonzo doge.’
17 “Nye apa na tengwire koJerusarema, ame simpe kuna kukanderera montembeli, tani mono emoneko,
18 memoneko olyo, Hompa ta tantere nge asi: ‘Genderera kutunda mo moJerusarema, yeeyi kapi ngava tambura umbangi woge kuhamena nge.’
19 Ame tani tanta asi: ‘Hompa, awo va yi diva nawa-nawa asi ame ngani zi monosinagoge ni ka kwate ava va pura moge nokukavatulisa modorongo ntani nokuvasopora.
20 Apa va dipagere mbangi zoge Sitefanesa, name yipo na kere, name kwa kwatesere ko eyi va rugene ntani kwa takamesere yikoverero yava va mu dipagere.’
21 Nye age ta tantere nge asi: ‘Zende, ame tani kutumu konomuhoko dokoure.’”
22 Awo kwa mu purakenene dogoro apa ga uyungire nonkango odo. Makura tava zigire asi: “Mu dipageni, mugara gwangoso kapi ana fire kuparuka!”
23 Morwa vantu kwa zigilire noku zugumanga yikoverero yawo yokontunda oku tava rafagura evhu,
24 mupitisili govakwayita ta panga asi Paurusa va mu tware mokamba zovakwayita va ka mu sopore dogoro a tante eyi mbunga zina kumuzigilira ngoso.
25 Nye apa va mene kumumanga asi ngano va mu sopore nongora, Paurusa ta pura mupitisili govakwayita ogu ga sikeme po asi: “Veta za yi pulisira kusopora Muroma* va hana kuhova kumupangura ndi?”*
26 Apa mupitisili govakwayita ga yi zuvhire eyi, ta zi komupitisili govakwayita eyovi, ta ka mu pura asi: “Yisinke no rugana mokumona asi mugara ogu Muroma?”
27 Mupitisili govakwayita eyovi ta mu hedere noku mu pura asi: “Ove Muroma ndi?” Age ta limburura asi: “Nhi.”
28 Mupitisili govakwayita eyovi ta tanta asi: “Ame kwa randa unamvharerwa waRoma noyimaliwa yoyinzi.” Nye Paurusa ta mu limburura asi: “Ame munamvharerwa gomoRoma.”
29 Poopo ngoso, vagara ava va here kumutoona noku mu puragera, tava mu lipora, mupitisili govakwayita makura tau mu kwata woma apa ga dimbwilire asi age Muroma ntani asi ana ninki va mu mange mauketanga.
30 Morwa ga here kudiva eyi va mu rundilire Vajuda, ezuva eli lya kweme ko, ta mu mangurura makura ta ninki vapristeli wovanene nomasimbi va ponge. Age makura ta gurumwisa Paurusa noku mu ninka a sikame mokatji kawo.
