Yirugana yovapositoli 23:1-35
23 Paurusa ta tarurura masimbi gomosigongi makura ta tanta asi: “Vakwetu, tani mu tantere kosipara saKarunga asi ezwi lyange lyokomutjima kapi lya pa nge usima asi koyili yoyidona na rugana dogoro ngesi.”
2 Apa mupristeli gomunene Ananiyasa ga yi zuvhire eyi, ta ninki ava va kere pepi nendi asi va mu kapure kokana.
3 Paurusa makura ta mu tantere asi: “Karunga ta kutoona ove muyilipaki.* Ove kuna hingire o pangure nge kuliza noVeta nye ngapi nye ove nyamoge ono kudira kuzilimburukwa pokuninka va kapure nge?”
4 Ava va sikamene po tava tanta asi: “Ove kuna kuswaura mupristeli gomunene gwaKarunga?”
5 Paurusa ta tanta asi: “Vakwetu, kapi nina yi diva asi age mupristeli gomunene. Yeeyi kwa tjanga asi ‘nokuuyungira si mupangeli momudona.’”
6 Apa Paurusa ga dimbwilire asi mbunga zimwe kwa kere zoVasadukayi ano zimwe zoVafalisayi, ta zigire asi: “Vakwetu, ame Mufalisayi, munwaMufalisayi. Ame kuna kupangura nge yeeyi na pura mevhumbuko lyovafe.”
7 Morwa ga uyungire nonkango edi, tapa kara nompata pokatji koVafalisayi noVasadukayi makura tava ligaunuka.
8 Yeeyi Vasadukayi kwa pulire asi kwato evhumbuko ndi vaengeli, nye Vafalisayi kwa yi pulire nayinye eyi.
9 Tapa kara ndjorongani zonene, valirongi vamwe womatjangwa ava va hamenene koVafalisayi, tava katuka noku tanguna nehandu asi: “Kwato unzoni tuna gwana momugara ogu. Nampo muengeli ana mu uyungisa?”
10 Apa da didire nompata, mupitisili govakwayita ta kara nowoma asi Paurusa nava mu lipapagwira makura ta tantere vakwayita va ze va ka mu guse mo mokatji kawo, va mu tware mokamba zovakwayita.
11 Nye masiku googo, Hompa ta ya sikama pepi nendi noku tanta asi: “Kara nouradi! Yeeyi moomu wa gava umbangi kuhamena nge moJerusarema, nomoRoma namo yimo ngorooro ngo ka u gava.”
12 Apa lya sire, Vajuda tava liyongo noku ligana asi kapi nava nwa ndi va lye yuma awo va hana kudipaga Paurusa.
13 Vagara ava va tulire po mugano ogo kwa pitakanene 40.
14 Vagara ava tava zi kovapristeli wovanene nomasimbi nokutanta asi: “Ose kuna ligana asi kapi natu lya yuma dogoro tu dipage Paurusa.
15 Ano one nomasimbi tumeni mbudi komupitisili govakwayita asi a ka mu rete kweni ngwendi asi kuna hara ku ya mu puragera mapuro gamwe hena. Nye komeho a ya sike, ose natu liwapaikira tu mu dipage.”
16 Nye simpumba saPaurusa apa ga zuvhire eyi va here kurugana, ta zi mokamba zovakwayita makura ta ka yi tantera Paurusa.
17 Paurusa makura ta zigida po mupitisili gumwe govakwayita ta mu tantere asi: “Twara mudinkantu ogu komupitisili govakwayita eyovi, morwa ana kara nombudi ezi ana hara kumutantera.”
18 Age ta mu twara komupitisili govakwayita eyovi noku tanta asi: “Paurusa munadorongo kuna zigida nge noku tantera nge asi ni rete mudinkantu ogu koge morwa ana kara nombudi ezi ana hara kukutantera.”
19 Mupitisili govakwayita ta mu kwata kokuwoko nokumutwara kompengi, ta mu pura asi: “Mbudi musinke ono hara kutantera nge?”
20 Age ta tanta asi: “Vajuda kuna lizuvhu asi va ku ninke o tware Paurusa kosigongi somasimbi mungura ngwendi asi kuna hara va ka mu puragere mapuro gamwe hena.
21 Nye ove wa ha yi pura, yeeyi vagara wokupitakana 40 kuna hara ngava mu vandere ntani awo kuna ligana asi kapi ngava lya ndi va nwe yuma dogoro ngava mu dipage, awo ngesi vana liwapaikire, epulisiro lyoge tupu vana kundindira.”
22 Mupitisili govakwayita makura ta ninki mudinkantu a ze. Ta mu pangere asi: “Wa ha ka yi tantera muntu asi ono yi tantere nge.”
23 Ta zigida vapitisili vavali wovakwayita noku va tantera asi: “Wapaikeni vakwayita 200 novarondi wononkambe 70 ntani vagara womagonga 200 va ze koKesareya povili zautatu masiku.*
24 Paurusa nage mu wapaikireni ko nonkambe edi na gendera yipo a ka sike nawa komupangeli Felikisi.”
25 Makura ta tjanga mbilive ezi asi:
26 “Ame Keraudiusi Lisiyasa tani kutjangere ove mupangeli gekuto Felikisi: Tani kutumine makundo!
27 Mugara ogu kwa mu kwete Vajuda ntani kwa here va mu dipage, nye ame novakwayita vange yipo twa zire usimbu tu ka mu popere, morwa ame kwa zuvhire asi age Muroma.
28 Ame kwa here kudiva konda zeyi va mu rundilire makura tani mu twara mosigongi sawo somasimbi.
29 Tani ka dimburura asi awo kwa mu rundilire kuhamena Veta zawo nye kwato eyi ga zonene yokumutwaredesa konomfa ndi modorongo.
30 Nye morwa nina zuvhu asi vana liyongo va mu dipage, yiyo nina kumutumina koge noku tantera varundili vendi ngava ya yi uyunge komeho zoge.”
31 Masiku, vakwayita makura tava twara Paurusa kwaAntipatilisi moomu va va pangerere.
32 Ezuva eli lya kweme ko, varondi wononkambe tava zi nage ano vakwayita wokuhupa ko tava tengura kokamba zovakwayita.
33 Varondi wononkambe tava ka sika moKesareya, tava ka gava mbilive komupangeli noku ka siga Paurusa kwendi.
34 Age ta zi resa makura ta pura Paurusa asi komukunda musinke ga tunda, age ta mu limburura asi koKilikiya.
35 Age ta tanta asi: “Ngani ya kupurakena nawa mompanguro apa varundili woge ngava ya sika.” Makura ta panga asi va mu takamesere mombara zaHerodesa.
