Yirugana yovapositoli 25:1-27
25 Fesitusa makura ta ya siki momukunda, ta tameke kupangera. Ano konyima zomazuva gatatu, ta tundu moKesareya a kanduke koJerusarema.
2 Makura vapristeli wovanene novagara woVajuda ava va divikwire, tava gava masivano gawo kuhamena Paurusa. Tava likwambere Fesitusa
3 a va purakene yipo a tume Paurusa koJerusarema. Nye awo kwa lizuvhire asi va vandere Paurusa va mu dipage.
4 Fesitusa kwa va tanterere asi Paurusa va mu sige moKesareya ntani hena asi age mwene ntaantani nga tengure.
5 Ta tanta asi: “Ninkeni vapitisili mokatji keni va gurumuke name va ka uyunge nsene sili asi mugara ogu koyili yoyidona ga rugana.”
6 Kapi ga kere nawo mazuva gokupitakana ntantatu ndi murongo makura ta gurumuka koKesareya, ano ezuva eli lya kweme ko, ta ka hingira posipundi sokupangwira nokuninka Paurusa va mu rete mompanguro.
7 Apa ga wizire mompanguro, Vajuda ava va gurumukire va tunde koJerusarema, tava mu kundurukida noku mu rundira yininke yoyinene eyi ya dilire kukara asi usili.
8 Nye Paurusa ta lipopere asi: “Kwato eyi na rugana yoyidona mokuteza po Veta zoVajuda ndi asi ni swaure ntembeli ndi ni rwanese hompa gwaRoma.”
9 Ano Fesitusa morwa kuhara kuhafesa Vajuda, ta pura Paurusa asi: “Ono hara kuza koJerusarema va ka kupangure kuhamena yininke eyi ndi?”
10 Nye Paurusa ta tanta asi: “Ame kuna sikama komeho zosipundi sokupangwira sahompa gwaRoma, oku yiko nava pangwira nge. Kwato yoyidona na rugana Vajuda, nove wa yi diva tupu.
11 Nsene asi ame muntu gomudona ntani koyili eyi na rugana yokutwaredesa nge konomfa, yina fire nge yokudipaga nge. Nye nsene asi yininke eyi vana kuuyunga vagara ava kapisi usili, kwato ogu na gava nge kwawo. Nina hara kuza kwahompa gwaRoma!”
12 Fesitusa ta uyunga novagavi mapukururo vendi, makura ta limburura asi: “Mokumona asi ono hara hompa gwaRoma a ka ku pangure, kwahompa gwaRoma yiko ngo za.”
13 Apa ga pitire po mazuva gongandi, hompa Agilipa naBerenike tava ya siki moKesareya va ya dingure Fesitusa mokumutambura moupangeli.
14 Mokumona asi awo kwa ya kere ko mazuva gomanzi, Fesitusa yipo ga tanterere hompa kuhamena udigu waPaurusa asi:
“Pweli mugara ogu ga siga Felikisi modorongo,
15 ano apa na kere moJerusarema, vapristeli wovanene nomasimbi goVajuda kwa wizilire nge nokupura epulisiro asi va mu tengeke.
16 Nye ame yipo na va limbwilire asi kapi ya liza noveta zoVaroma asi muntu va mu tengeke age va hana kumupa mpito zokulipopera mwene komeho zovarundili vendi.
17 Apa va ya sikire omu, kapi na likata-katere nye ezuva eli lya kweme ko, tani hingire posipundi sokupangwira nokuninka va mu rete mompanguro.
18 Varundili vendi tava sikama nokutameka kuuyunga yininke yoyinzi kumuhamena nye yininke yoyidona eyi na gazarere asi nava mu rundira kapi va yi mu rundilire.
19 Awo kwa lipatanene nendi tupu kuhamena ukareli wawo ntani kuhamena mugara gedina Jesus ogu ga fire nye ogu nga udisa Paurusa asi muzuni.
20 Mokumona asi kapi na divire omu nani gendesa udigu owo, yipo na mu pulire nsene asi kuvhura va ka mu pangwire koJerusarema kuhamena udigu owo.
21 Nye apa Paurusa ga hundilire asi va mu sige monomango a ndindire etokoro lyoMufumadekwa,* yipo na penge asi va mu sige monomango dogoro ngani mu tume kwahompa gwaRoma.”
22 Agilipa makura ta tantere Fesitusa asi: “Nina hara ngani lizuvhire ko komugara ogo nyamwange.” Age ta tanta asi: “Ngo lizuvhira ko kwendi mungura.”
23 Ezuva eli lya kweme ko, Agilipa naBerenike tava wiza oku tava limonekesa kovantu, tava hwilire monzugo zompanguro kumwe novapitisili wovakwayita ntani novagara ava va divikwire mositata, Fesitusa ta gava mpangera makura Paurusa tava mu reta mo.
24 Fesitusa makura ta tanta asi: “Hompa Agilipa none namuvenye muna kara apa kumwe nose, mugara ogu yige va likwamberere nge Vajuda navenye moJerusarema namoomu, awo kwa zigilire asi ngano a fe.
25 Nye ame kapi na mu gwene unzoni wokumutwaredesa konomfa. Ano apa mugara ogu ga here kuza koMufumadekwa, yipo na tokwere asi kuvhura a ze.
26 Nye kapi nina kara neyi yokuvhura kutjangera hompa kuhamena mugara ogu. Eyi yiyo nina mu retere komeho zeni namuvenye nye unene po, koge ove hompa Agilipa yipo asi konyima zapa nomu mu puragera, nampo nani kara ko noyuma yokutjanga.
27 Yeeyi kwange ame kuna kumoneka asi nokuwapa si kutuma munadorongo na hana kutuma patjangwa unzoni ou ga rugana.”
Nonkango dokonhi
^ Ntumbwiso zomupangeli goVaroma.
