Yirugana yovapositoli 26:1-32
26 Agilipa ta tantere Paurusa asi: “Kuvhura o uyunge o lipopere nyamoge.” Paurusa makura ta gonona kuwoko kwendi, ta lipopere asi:
2 “Hompa Agilipa, ame nina hafa mokuyamoneka komeho zoge naina yipo ni lipopere nyamwange koyininke eyi vana kurundira nge Vajuda,
3 unene po morwa ame na yi diva asi ove wa diva nawa nompo nomalitatano goVajuda. Yipo nye nina kulikwambera koge asi o purakene nge nedidimiko.
4 “Vajuda navenye va diva ukaro wange kutunda udinkantu wange dogoro apa na ya kere moJerusarema.
5 Awo nare va diva nge. Nsene vana hara, kuvhura va ku tantere asi ame Mufalisayi ntani ukareli woVafalisayi kwa kwaterera unene konoveta kupitakana Vajuda wopeke.
6 Ame kuna kupangura nge naina morwa yeeyi na kara nehuguvaro metumbwidiro eli ga pere Karunga ozinyakurwetu;
7 mazimo 12 nago kuna kundindira etumbwidiro eli li sike mo pokumukarera masiku nomutenya. Hompa, ehuguvaro eli yilyo vana kurundilira nge Vajuda.
8 “Morwasinke muna kudilira kuyipura asi Karunga kupindura vantu koufe?
9 Ame kwa gazarere asi na hepa kukondja paapa na hulira ni hagekese po edina lyaJesus goMunasareta.
10 Eyi yiyo na rugene moJerusarema, ame kwa tulisire vapuli* wovanzi modorongo yeeyi ame kwa gwene nonkondo kovapristeli wovanene ntani na yi kwatesere ko apa va va dipagere.
11 Ame ngani va hepeke monosinagoge nokuvasininika va sige epuro lyawo, ano morwa nava nyengere unene, ame ngani zi dogoro nokoyitata yapeke ni ka va hepeke.
12 “Sikando simwe apa va tumine nge vapristeli wovanene ni ze koDamasikusi ni ka rugane yokulifana,
13 hompa, pomutwekatji, tani mono site sokupitakana sezuva tasi tundu meguru si minikire nge kumwe nava na gendere nawo.
14 Apa natuvenye twa liganderere pevhu, tani zuvhu ezwi lina kuuyungisa nge moRuhebeli asi: ‘Sauru, Sauru, morwasinke ono kuhepekera nge? Ove kuna kuliremeka nyamoge pokurwanesa nge.’*
15 Nye ame tani pura asi: ‘Nyove yilye Hompa?’ Hompa ta limburura asi: ‘Nyame Jesus, ogu ono kuhepeka.
16 Katuka o sikame. Eyi yiyo nina kumonekerere o kare mukareli gwange nombangi zange koyininke eyi ono mono neyi ngo ka mona komeho.
17 Ame ngani kupopera kovantu ava nokonomuhoko edi nina kukutuma
18 o ka mahure meho gawo va tunde momundema va hame kouzera ntani va tunde mononkondo daSatana va hame kwaKarunga, yipo Karunga nga va dongwenene po nonzo dawo noku va futa ntani yipo nga va pongore ngamoomu ga yi rugene kovakareli vendi vamwe wovalimburukwi.’
19 “Yipo nye, hompa Agilipa, ame kwa rugene eyi ga tanterere nge Jesus memoneko lina,
20 eyi yiyo nye na zililire ni ka gave mbudi. Pomuhowo ame kwa zire koDamasikusi kutunda opo yipo na zire koJerusarema nomosirongo nasinye saJudeya ntani konomuhoko dapeke ni ka zuvhisire vantu va litezurure va hame kwaKarunga ntani va yi likide moyirugana asi vana litezurura.
21 Ano eyi yiyo va kwaterere nge Vajuda montembeli noku hara kudipaga nge.
22 Nye morwa Karunga ga vaterere nge, nanaina eli ame kuna kuzuvhisira ava va divikwa nava va dira kudivikwa, ame kuzuvhisa tupu eyi ya kara momatjango goVaporofete neyi ga tjenge Mosesa asi ngayi ka horoka. Matjango ogo kwa tanta asi
23 Kristusa nga hepa ntani yige ngava hova kupindura koufe ntani asi age nga zuvhisira muhoko ogu nonomuhoko dapeke ntani nga gava uzera.”
24 Ngomu Paurusa ga uyungire nonkango edi a lipopere, Fesitusa ta zigire asi: “Kuna kuzaruka ono kuzaruka Paurusa, ediwo lyoge lyenzi unene yilyo lina kukuzarura!”
25 Nye Paurusa ta mu limburura asi: “Ame kapi nina kuzaruka, ove munekuto Fesitusa nye ame kuna kuuyunga nonkango dousili ntani donondunge.
26 Hompa nage ga yi diva eyi, morwa yininke oyo kapi ya horokere mokahore-hore.
27 Hompa Agilipa, wa pura moVaporofete ndi? Na yi diva asi wa pura mwawo.”
28 Nye Agilipa ta tantere Paurusa asi: “Ove ngoso kuna hara nye o ninke nge ngesi ni kare Mukriste ndi?”
29 Paurusa ta limburura asi: “Yi kare asi ngesi ndi komeho, ame kuna hara asi Karunga ngano a ku ninke nava navenye vana kupurakena nge naina ngava kare Vakriste ngwendi nyame nye kapisi monomango.”
30 Hompa makura ta katuka kumwe nomupangeli naBerenike ntani novagara ava va hingilire nawo.
31 Ngomu va tundire po, tava litantere asi: “Mugara ogu kwato eyi ga rugana yokumutwaredesa konomfa ndi yokumutulisa modorongo.”
32 Agilipa ta tantere Fesitusa asi: “Mugara ogu ngano kapi ana hundire asi a ze kwahompa gwaRoma, ngano vana mu mangurura.”
Nonkango dokonhi
^ MoRugereka asi “vapongoki.”
^ MoRugereka asi “pokusanga kosivera soutwe.” Sivera esi ngava si ruganesa mokuvyukisa yimuna.
