Yirugana yovapositoli 27:1-44
27 Morwa va tokwere asi tu ze nosikepa koItaliya, tava gava Paurusa novanadorongo vamwe komupitisili govakwayita gedina Juliusa gomombunga zovakwayita ava tumbura asi Augusitusi.
2 Tatu rondo mosikepa esi sa tundire koAdaramiti si vyuke komazenga, konontere domukunda gwaAsiya, ano Aresitarekusi gokoTesaronika gomomukunda gwaMakedoniya, kwa zire nose.
3 Ezuva eli lya kweme ko, tatu ka hegeka sikepa oso poSidoni, ano Juliusa kwa fililire Paurusa nkenda makura ta mu pulisire a ze kovakwawo va ka mu vatere.
4 Twa tunda opo, tatu gendi pepi naKipurusi yipo zi dire kuturerura mpepo zonene ezi za tu peperere.
5 Makura tatu gendi zefuta pepi naKilikiya naPamufiliya, tatu ka hegeka pezenga lyaMira moLisiya.
6 Omo yimo mupitisili govakwayita ga ka gwene sikepa esi sa tundire koArekisandiliya si vyuke koItaliya makura ta tu ninki tu rundurukire mo.
7 Ayo kwa tu digoperere ntani kwa gusire mazuva gomanzi komeho tu ka sike koKinidusa. Morwa mpepo kwa tundire oku twa vyukire makura tatu gendi zomema tu pitakane Salimoni* pepi naKereta.
8 Tatu kondjo zonontere defuta makura tatu ka sika kevango ava tumbura asi Mazenga gomawa, eli lya kara pepi nositata saLiseya.
9 Rugendo rwetu kwa tu digoperere morwa twa zumbanesere siruwo sosinzi ntani Ezuva lyEfironkenda* nalyo kwa pitire, Paurusa makura ta va pe egano
10 asi: “Vakwetu, kapi nayi wapa asi tu ze. Nsene natu za, sikepa tasi ka dama, tatu ka zumbanesa nomurongero detu ntani kuvhura hena tu ka fe.”
11 Nye mupitisili govakwayita kwa purakenene tupu komusingi gosikepa ntani kwamwenyasikepa mevango lyokupurakena kwaPaurusa.
12 Mokumona asi kapi ya vhulikire kukahegeka pezenga olyo morwa siruwo sokufu, yipo va tokwere kuza koFenikiya, ezenga lyaKereta eli lya zahamena komuzogo-pumezuva nokombindakano-pumezuva.
13 Apa mpepo zokombindakano za pepere nakauke, tava gazara asi nampo nava ka sika oku va tembe makura tava gusa mo sisikameso momema va likure koKereta pepi nezenga.
14 Kapi pwa pitire siruwo, makura mpepo zonene ava tumbura asi Uroakiro* tazi tameke kupepa.
15 Mokumona asi sikepa kapi sa vhulire kuza komeho morwa mpepo zonene ntani kwato eyi twa vhulire kurugana ko, tatu si sigi si pupe nompepo.
16 Makura tatu gendi pepi nosirudi sosinunu ava tumbura asi Kerauda, nye kwa tu digoperere kukoka kakepagona kokulipoperesa aka ka kere konyima zosikepa.
17 Konyima zokurondeka mo kakepagona, tava ka mangerere mosikepa nonongodi dononene yipo ka kore ntani morwa kutjira kukahega poSireti,* tava gonyo saira yipo va pupagere.
18 Morwa mpepo kwa tu kihilikire, ezuva eli lya kweme ko, tava zugumine nomurongero dimwe mefuta mokurerupika sikepa.
19 Ano mezuva lyautatu, tava zuguma mo yiruganeso yosikepa.
20 Ano apa ezuva nonombungururu ya dilire kumoneka mazuva gomanzi ntani apa mpepo zonene za twikilire kupepa, tatu zumbanesa ehuguvaro lyokuparuka.
21 Konyima zapa ga pitire po mazuva gomanzi va hana kulya, Paurusa ta sikama mokatji kawo nokutanta asi: “Vakwetu, ngano mwa purakenene egano lyange mu dire kutunda moKereta, udigu ou ngano kapi una horoka.
22 Nye tani mu korangeda asi mwa ha kara nosinka, yeeyi namuvenye tomu paruka, sikepa selike nasi tekauka.
23 Masiku ganaina, Karunga ogu ani karere kuna tumu muengeli gwendi a ya monekere nge
24 nokutantera nge asi: ‘Paurusa, wa ha tjira. Nyove tupu kukasikama komeho zahompa gwaRoma. Karunga ta ku popere kumwe nava ono kugenda nawo.’
25 Yipo nye asi mwa ha tjira, vakwetu, yeeyi nina yi pura asi Karunga na rugana moomu ana yi tantere nge.
26 Nye natu ka hega tupu kosirudi simwe.”
27 Konyima zokupupagera mazuva 14 mefuta lyaAdiliya, pokatji komasiku, vanasikepa tava gazara asi kuna kusika pepi nosirudi simwe.
28 Makura tava gusa sininke esi va menge korugodi noku si zugumina mefuta, tava gwana nometa dokusika koyiha 36 ngoso, tava gendi kananogona tava si zugumine mo hena, makura tava gwana nometa dokusika koyiha 27.
29 Awo kwa tjilire asi nampo nava ka hegama pomamanya, makura tava zugumine mo yisikameso yine konyima zosikepa nokuhara asi ngano li se usimbu.
30 Nye vanasikepa apa va hetekerere ko kuhena mo mosikepa pokuherura mo kakepagona nokulininkisa ngwendi asi kuna kuhegumwisa yisikameso komeho zosikepa,
31 Paurusa ta tantere mupitisili govakwayita novakwayita asi: “Nsene vagara ava nava tunda mosikepa, kapi nomu paruka.”
32 Vakwayita makura tava tete nongodi dokakepagona noku ka siga ka ka pupe.
33 Momasasiku Paurusa ta va korangeda va lye pokutanta asi: “Naina ezuva 14 kutunda apa mwa kere nosinka mu ndindire mwa hana kulya yuma.
34 Yipo nye nina kumukorangeda asi mu lye ko nondya yipo mu paruke, yeeyi noruhuki si rokomutwe gweni ngaru gwa ko.”
35 Apa ga mene kuuyunga eyi, ta gusa mboroto, ta pandura Karunga, awo navenye kuna kutara, ta zi bamagura makura ta li.
36 Navenye tava hageke kukara nosinka makura nawo tava li.
37 Ose kwa kere 276 mosikepa.
38 Awo kwa lire tava kuta makura tava zugumine rukokotwa mefuta yipo va rerupike sikepa.
39 Apa lya sire, kapi va dimbwilire sirongo esi va mwene nye tava mono ezenga lyomuheke makura tava gazara asi va ka hegekere po sikepa nsene kuvhura.
40 Tava tete nongodi doyisikameso noku di zugumina mefuta ntani tava ditura hena nongodi dokoyirapo, ano apa va mene kuzerura saira zokomeho zi vyuke mompepo makura sikepa tasi vyuka konontere.
41 Apa va ka sikire posituntu sokonhi zomema, sikepa tasi ka litwa mo, makura tasi patamene nzi, nye nyima zosikepa tazi tekauka komankumpi.
42 Apa vakwayita va yi mwene eyi, tava tokora kudipaga vanadorongo yipo va dire kuzoga, va hene.
43 Nye mupitisili govakwayita kwa here kukasikisa Paurusa makura ta va kava asi va ha yi rugana. Ta pangere ava va diva kuzoga va vatukire mefuta va ka hove kukasika konontere,
44 ano wokuhupa ko va kwame monyima, vamwe poyipirangi ano vamwe poyintau yokosikepa. Yimo nye ngesi va ka sikire navenye konontere awo vawaawa.
Nonkango dokonhi
^ Eli evango eli lya kere konontere daKereta.
^ Ako kwa kere kwedi kwaTisili, kwedi oku azi tameke kuroka mvhura ntani apa efuta ali handuka.
^ Kwa tamba mpepo zokomuzogo-pumezuva.
