Yirugana yovapositoli 28:1-31
28 Apa twa ka sikire, tatu zuvhu asi sirudi oso edina lyaso Malita.
2 Vantu vapo kwa tu likidire nkenda zonene. Awo kwa hwamekere mundiro, makura tava tu zigida morwa mvhura kwa nyavangere ntani kwa kere ko utenda.
3 Nye Paurusa apa ga tjeve yitare nokuyitura pomundiro, sipili ta pwaga mo morwa upyu, ta mu dingire kewoko.
4 Vantu woposirudi oso, tava mono ezoka alyo kuna kuzenzerera kokuwoko kwendi makura tava litantere vene navene asi: “Yosili mugara ogu mudipagi, nampili ngomu ana paruka mo mefuta, karunga gomukadi gouhungami* kapi ana mu pulisire asi a paruke.”
5 Nye age ta gandere ezoka pomundiro, alyo kapi lya mu reterere siponga.
6 Awo kwa tarerere ko asi nampo na dunda ndi a vatuke tupu a fe. Awo kwa ndindilire siruwo sosire, ano apa va mwene asi kwato eyi yina kuhoroka makura tava rundurura magazaro gawo nokutanta asi age karunga.
7 Ano mupangeli goposirudi oso gedina Pubeliusi kwa kere nomapya pepi nevega olyo, age kwa tu tambwire nokutupakera mbili mazuva gatatu.
8 Oguhwe vaPubeliusi awo kwa rere morwa kwa verere ezimo lyokupwaga-pwaga ntani kwa pyapyarere unene morutu, Paurusa makura ta hwilire mo a ze kwawo, ta va kanderere nokuvakambeka mawoko makura ta va verura.
9 Konyima zapa ya horokere eyi, vantu wopeke woposirudi oso ava nawo va verere, tava wiza kwendi makura ta va verura.
10 Awo kwa tu likidire hena rupandu pokutupa mauhwi gomanzi, ano apa twa katukire tu ze, tava tu pe nayinye eyi twa hepere nokuyirondeka mosikepa.
11 Konyima zapa twa kere makwedi gatatu posirudi oso, tatu katuka tu ze nosikepa esi sa kere nefano lyovana vaZeusi. Sikepa oso kwa tundire koArekisandiliya si ya kare posirudi oso pokufu.
12 Tatu ka hegeka pezenga lyaSirakuse, tatu kara po mazuva gatatu,
13 kutunda opo tatu ka sika koRegiumu. Ano ezuva eli lya kweme ko, mpepo zokombindakano tazi pepe makura mezuva lyauvali tatu ka sika moPuteoli.
14 Oko yiko twa ka gwene vapuli vakwetu ava va tu ninkire asi tu kare nawo mazuva ntambali, kutunda opo makura tatu vyuka koRoma.
15 Vapuli vakwetu womoRoma apa va zuvhire asi ose kuna kuwiza, tava tu simbagwire dogoro pomarandesero gaApiusi nopoNohotera ntatu va ya tu ndindire. Paurusa apa ga va mwene, ta pandura Karunga makura tayi mu korangeda.
16 Apa twa ka sikire moRoma, Paurusa tava mu pulisire a kare gelike nomukwayita ogu ga mu nomenene.
17 Eyi pwa pita mazuva gatatu, ta zigida vagara woVajuda ava va divikwire. Apa va ya pongere, ta va tantere asi: “Vakwetu, nampili ngomu na dira kurugana yininke eyi ya lilimba novantu ndi nompo zozinyakurwetu, ame kwa kwete nge ngomunadorongo moJerusarema noku ya gava nge momawoko goVaroma.
18 Apa va mene kukonakona udigu wange, kwa here asi ngano va mangurure nge morwa kapi va gwene nge unzoni wokutwaredesa nge konomfa.
19 Nye Vajuda apa va nyokere, yipo na tokwere kuza kwahompa gwaRoma, nye kapisi nositambo sokuyapa muhoko gwange unzoni.
20 Eyi yiyo nina mu zigidire ni ya uyunge none, yeeyi ehuguvaro lyoVaisraeli, yilyo lina ninkisa nge va mange nge aga mauketanga.”
21 Awo makura tava tanta asi: “Kapi twa gwana nombilive dokukuhamena dokutunda koJudeya, nampili vapuli vakweni ava va wiza oku, nawo kapi va ya uyunga yuma yoyidona kukuhamena.
22 Nye ose tuna hara kulizuvhira ko eyi ono kugazara, yeeyi ose twa yi diva asi nakunye vantu kuuyunga momudona ukareli ou woupe.”
23 Tava tura po ezuva lyokuwiza kwendi, awo kwa wizire wovanzi monzugo ezi ga kere. Age kwa va fatwilire nokugava umbangi kuhamena Uhompa waKarunga kutunda ngurangura dogoro ngurova yipo a va fatwilire kutunda moVeta zaMosesa ntani mononkango doVaporofete asi va pure mwaJesus.
24 Vamwe va pulire yininke eyi ga uyungire, ano vamwe kapi va yi pulire.
25 Morwa kapi va lizuvhire vene navene makura tava tameke kutunda po, nye Paurusa ta tanta asi:
“Ayo ya liza neyi za uyungisire mpepo zokupongoka ozinyakurweni kupitira momuporofete Jesaya
26 asi ‘zende kovantu ava o ka va tantere asi: “Komatwi ngomu zuvhisa, nye kapi ngomu yi kwata egano; komeho ngomu taresa, nye kapi ngomu yi mona.
27 Yeeyi nomutjima domuhoko ogu nonkukutu. Ame nokuvhura si kuvaverura, morwa awo kuzuvha nye kapi ava yi kwama. Awo kuferera va dire kumona ntani kumbandera matwi gawo va dire kuzuvha, va dire kuyikwata egano nonomutjima dawo yipo va dire kulitezurura.”’
28 Yi diveni asi mbudi ezi kuhamena omu Karunga a parura vantu, vana zi gava konomuhoko dapeke, ado ngadi tambura mbudi ozo.”
29 *——
30 Age kwa kere nomvhura mbali monzugo ezi nga futire ntani nga tambura navenye ava ngava ya mu dingura,
31 nga va zuvhisire kuhamena Uhompa waKarunga ntani nga va rongo kuhamena Hompa Jesus Kristusa noumanguruki* pwa hana madonganeso.
Nonkango dokonhi
^ MoRugereka kwa ruganesa nkango Dike, ezi za tamba kwakarunga gomukadi ogu ava gazara asi yige a tokora kuhamena uhungami.
^ Tara mwaMateusa 17:21, ftn.
^ Ndi “nouradi.”
