Yirugana yovapositoli 3:1-26
3 Peturusa naJohanesa kwa kandukire va ze montembeli posiruwo sokukanderera, povili zauntane,*
2 ano mugara ogu va hampuruka age sirema kwa mu simbire. Nkenye ezuva ngava mu twara pepi nevero lyontembeli eli ngava tumbura asi evero lyEwa, yipo a hundagere ava vana kuhwilira montembeli.
3 Apa ga mwene Peturusa naJohanesa kuna kuhwilira montembeli, ta va hundire.
4 Nye Peturusa naJohanesa tava mu tarurura makura tava mu tantere asi: “Tu tara.”
5 Age ta va tarurura nokundindira asi nampo nava mu pa yuma.
6 Nye Peturusa ta mu tantere asi: “Kapi nina kara nosisiliveli nongorodo, nye tani ku pe eyi nina kara nayo. Medina lyaJesus Kristusa goMunasareta, genda!”
7 Ta mu kwata kokuwoko kwendi korulyo a mu kature. Poopo ngoso, nompadi nononcugu dendi tadi veruka,
8 ta katuka nokutameka kugenda makura ta hwilire nawo montembeli, age kwa gendere oku ta vatauka a hamberere Karunga.
9 Vantu navenye kwa mu mwene age kuna kugenda oku ta hamberere Karunga.
10 Awo tava mu dimburura asi yige mugara ogu nga hingire a hundagere pEvero lyEwa lyontembeli, makura tava hafa unene nokutetuka kweyi ya mu horokerere.
11 Age mugara ogo simpe kuna kwaterere Peturusa naJohanesa komawoko, vantu navenye tava tetuka nokudukira kwawo, kevango eli ava tumbura asi mukara gwaSaromo.
12 Peturusa apa ga yi mwene eyi, ta pura vantu asi: “One Vaisraeli, yisinke yina mu tetwire eyi ntani yisinke muna kututarwilira ngoso, one kuna kugazara asi mugara ogu kuna kugenda morwa kuna yi ruganene kononkondo detu ndi morwa ulimburukwi wetu?
13 Karunga gwaAbirahamu naIsaka naJakopo, Karunga gozinyakurwetu kwa yererepeka mukareli gwendi Jesus, ogu mwa geve kwaPiratusa nokumupatana nampili ngomu ga here kumumangurura.
14 Yosili, age mupongoki nomuhungami, nye one yiyo mwa mu patanene nokuhundira va mu mangwilire mudipagi,
15 ano ogu va horowora a gave eparu, yiyo mwa mu dipaga. Nye Karunga kwa mu pindwire koufe, ano ose nyose nombangi dayo.
16 Mugara ogu muna kumona ntani mwa diva, kuna mu verwire medina lyaJesus ntani morwa yeeyi twa pura mwendi. Yosili, morwa kupura mwaJesus, mugara ogu kuna mu verura komeho zeni namuvenye.
17 Ame na yi diva asi one kwa yi ruganene oyo mwa hana kudiva eyi muna kurugana, ngwendi moomu va rugene vapangeli veni.
18 Nye monkedi zangesi, Karunga yimo ga sikisire mo eyi ga uyungire kupitira motuna tovaporofete asi Kristusa ngava mu hepeka.
19 “Litezurureni nye, mu tengure kwaKarunga yipo nonzo deni va di mu dongwenene po ntani yipo Jehova nga mu retere yiruwo yepwizumuko
20 noku mu tumina Jesus Kristusa ogu ga horowora.
21 Age ga hepa kukara ngorooro meguru dogoro noku ngava ka wapukurura yininke nayinye eyi ga uyunga Karunga kupitira movaporofete vendi vanare wokupongoka.
22 Yeeyi Mosesa kwa tente asi: ‘Jehova Karunga gweni nga horowora mokatji keni muporofete ngwendi nyame. Ngomu ya purakene nkenye eyi nga mu tantera.
23 Ano nkenye ogu nga dira kupurakena koMuporofete ogo, Karunga nga mu zonagura.’
24 Vaporofete navenye kutunda kwaSamwere kwa uyungire kuhamena mazuva aga.
25 Vaporofete owo kwa uyungire kuhamena egwanekero eli ga tulire po Karunga kumwe nozinyakurweni. None kwa hamena mo megwanekero eli, morwa Karunga kwa tumbwidilire Abirahamu asi: ‘Moruvharo* roge yimo ngava tungikira mapata nagenye pevhu.’
26 Konyima zapa Karunga ga pindwire Mukareli gwendi, pomuhowo kwa mu tumine kweni yipo a ya mu tungike pokumuninka mu hageke yirugana yeni yoyidona.”
