Yirugana yovapositoli 4:1-37
4 Age Peturusa naJohanesa simpe kuna kuuyunga novantu, va liharuka ko vapristeli nomukurona govanomeni wontembeli ntani Vasadukayi kuna kuvawizira.
2 Ayo kwa va handukisire morwa yeeyi vapositoli va rongere vantu ntani nokudivisa asi Jesus va mu pindura koufe.
3 Awo makura tava va kwata noku va nomena dogoro ezuva lyokukwama ko, yeeyi kwa kere ngurova.
4 Nye vantu wovanzi ava va zuvhire nonkango edi tava kara vapuli, ano sivaro sovagara ava va ya kere vapuli kwa sikire koyiha 5 000.
5 Ezuva eli lya kweme ko, vapangeli vawo nomasimbi ntani valirongi womatjangwa tava pongo moJerusarema,
6 kumwe naAnasi mupristeli gomunene naKayifasa naJohanesa naArekisandeli ntani ekoro nalinye lyomupristeli ogu.
7 Tava ninki Peturusa naJohanesa va sikame mokatji kawo nokuvapura asi: “Nononkondo dalye ndi medina lyalye omu ruganene yininke eyi?”
8 Peturusa ta zura mpepo zokupongoka makura ta va tantere asi:
“One vapangeli nomasimbi,
9 muna hara kudiva yininke yoyiwa eyi tuna rugana ogu mugara gosirema nomu ana veruka ndi?
10 Yi diveni namuvenye novantu navenye vaIsraeli asi mugara ogu ana sikama komeho zeni kuna verukire medina lyaJesus Kristusa goMunasareta ogu mwa pamparere kositji nye Karunga yiyo ga mu pindura koufe.
11 Eli kuna kara emanya eli mwa zumba one vatungi morwa kwa li mwene asi kwato mulyo, alyo yilyo lya ya kara emanya lyemekovhu.*
12 Ntani yi diveni hena asi kwato gokutuparura ntudi yige, yeeyi kwato edina nalyopeke pevhu ga horowora Karunga movantu mokutuparura.”
13 Apa va mwene uradi* waPeturusa naJohanesa nokudimburura asi kapi va lironga* ntani asi awo kwa kere vantuuntu tupu, tava tetuka. Tava dimburura hena asi naJesus ngava kara-kara.
14 Apa va tere mugara ogu va verwire kuna sikama nawo, tayi va limbi kuuyunga ko yuma.
15 Tava va tantere va pwage mo mosigongi somasimbi, makura tava tameke kuliyonga
16 asi: “Yisinke natu rugana vagara ava? Yeeyi awo kuna rugana sininke sokutetukisa esi natu dira kuvhura kuhoreka, vantu navenye va tunga moJerusarema vana yi diva ntani kapi tatu vhuru kuyipatana.
17 Nye mokuninkira asi ya ha lihana movantu, tu va tjiliseni nokuvatantera asi va ha uyunga hena nankenye ogu medina lyomugara ogo.”
18 Tava va zigida makura tava va pangere asi va ha uyunga yuma ndi va ronge medina lyaJesus.
19 Nye Peturusa naJohanesa tava limburura asi: “Tokoreni nsene asi yokupurakena kweni ndi kwaKarunga yiyo yoyiwa po kwaKarunga.
20 Nye ose kapi tatu hageke kuuyunga kuhamena yininke eyi twa mona neyi twa zuvha.”
21 Konyima zokuhetekera ko kuvatjilisa hena, tava va mangurura, yeeyi kapi va va gwene unzoni ou nava va tengekera ntani kwa tjilire vantu, yeeyi vantu navenye kwa hamberere Karunga kweyi ya horokere.
22 Mugara ogu va verwire pasitetu, nomvhura dendi kwa pitakanene 40.
23 Apa va va mangwilire, tava zi kovarongwa vakwawo va ka va tantere eyi va va tanterere vapristeli wovanene nomasimbi.
24 Apa va yi zuvhire eyi navenye ava va kere po, tava kanderere kumwe kwaKarunga asi:
“Hompa Mupangeli gwanayinye, nyove wa sita eguru nevhu ntani efuta nanayinye eyi ya kara mo,
25 kupitira mompepo zokupongoka, ove kwa ninkisire zinyakurwetu Ndafita, mukareli goge a pure asi: ‘Morwasinke dina handukire nomuhoko ntani yisinke eyi vantu vana kugazarera yininke ya hana mulyo?
26 Vahompa vepevhu vana liwapaikire ntani vapangeli vana lipongaike va rwise Jehova nomugwavekwa gwendi.’*
27 Yeeyi Herodesa naPontiusi Piratusa novantu wokonomuhoko dapeke ntani vantu womoIsraeli kuna pongo mositata va di vyuke mukareli goge gokupongoka, Jesus, ogu wa gwaveka,
28 awo kuna pongo va rugane eyi wa tumbwidira. Ove kwa yi ninka eyi yi horoke mononkondo doge kuliza nositambo soge.
29 Ano ngesi, Jehova, tara omu vana kututjilisa ntani tu vatera ose vakareli woge tu twikire kuzuvhisa nonkango doge nouradi,
30 gonyonona kuwoko koge o verure nokurugana yidiviso noyitetu medina lyaJesus mukareli goge gokupongoka.”
31 Apa va mene kukanderera nomutjima nagunye,* evega eli va pongere tali kankama, ano navenye tava va zwida mpepo zokupongoka makura tava zuvhisa nonkango daKarunga nouradi.
32 Mbunga zava va kere vapuli, kwa kere negazaro* limwe nomutjima gumwe ntani kwato ogu ga gazarere asi yininke eyi ga wekere yamwene gelike nye navenye kwa ligaverere nayinye eyi va kere nayo.
33 Vapositoli kwa twikilire kuzuvhisa asi Hompa Jesus va mu pindura koufe, ano eyi kwa va tompokere momunene ntani Karunga kwa va fililire unene nkenda.
34 Kwato ogu ga hepere mokatji kawo, yeeyi navenye kwa randesere mapya nomambo gawo aga va wekere, makura yimaliwa
35 tava yi twara kovapositoli. Ano vapositoli kwa gaverere yimaliwa oyo kwankenye ogu kuliza noyihepwa yendi.
36 Josefa ogu ngava zigida hena vapositoli asi Baranabasa (kutanta asi “Muna gehengagwido”), Murevhi ogu va hampurukira moKipurusi,
37 kwa kere nevango, makura ta li randesa ano yimaliwa ta yi twara kovapositoli.
Nonkango dokonhi
^ Ndi “emanya lyomulyo po.”
^ Ndi “umanguruki.”
^ Kwa tamba asi kapi va za kosure zovapitisili womaukarelikarunga; kapi yina kutanta asi kapi va lironga.
^ Ndi “Kristusa gwendi.”
^ Ndi “kulikwambera.”
