Yirugana yovapositoli 5:1-42
5 Nye Ananiyasa namukadendi Safira kwa randesere evango lyawo.
2 Ano yimaliwa yimwe ta yi horeke yi kare yamwene, mukadendi ga yi divire, ano eyi yimwe yiyo ga twere kovapositoli.
3 Nye Peturusa ta mu pura asi: “Ananiyasa, morwasinke ono sigilire Satana a pangere mutjima goge o kumbagere mpepo zokupongoka nokuhoreka ko yimaliwa yimwe eyi ono randesa epya lyoge?
4 Apa wa dilire kulirandesa po, nani kapisi lyoge lya kere? Ano apa ono li randesa, nani yimaliwa ngano kapi ono yi ruganesa moomu ono harere? Yisinke nye ono gazarere kurugana sininke sosidona ngoso? Ove kapisi vantu ono kumbagere nye Karunga.”
5 Ananiyasa tupu ga di zuvhire nonkango odo, ta liganda, ta fu. Ano navenye ava va yi zuvhire, tau va kwata woma wounene.
6 Vadinkantu wovagara tava wiza, tava mu dingire pomakehe makura tava mu twara va ka mu horeke.
7 Konyima zonovili ntatu, mukadendi nage ta wiza, age ga hana kudiva eyi yina horoka.
8 Peturusa ta mu pura asi: “Yimaliwa eyi muna randesa epya lyeni yipo yina huru paapa ndi?” Age ta limburura asi: “Nhi, yipo yina huru poopo.”
9 Peturusa ta mu pura asi: “Morwasinke muna lizuvhire mu kumbagere mpepo zaJehova? Tara si! Nompadi dava vana horeke mugara goge dodo pevero, nove yiwo nava ka kuhoreka.”
10 Poopo ngoso, ta liganda, ta fu. Vadinkantu wovagara apa va wizire, tava ya mu gwana age ana fu, makura tava mu twara va ka mu horeke pepi namugara gwendi.
11 Varongwa womoJerusarema nanavenye ava va yi zuvhire eyi, tau va kwata woma.
12 Vapositoli kwa twikilire hena kurugana yitetu noyidiviso yoyinzi mokatji kovantu ntani ngava pongo kumwe momukara gwaSaromo.
13 Kwato ogu ga kere nouradi wokulipakerera kumwe nawo, nye nampili ngoso, vantu ngava va uyunga momuwa.
14 Ntani sivaro sovagara novakadi ava va pulire mwaHompa, kwa ligwederere.
15 Vantu ngava reta vaveli kononzira nokuvarangeka ponombete, awo kwa gazarere asi Peturusa apa na pita po, mundunduma gwendi gu gwire pwavamwe yipo va veruke.
16 Ntani hena, mbunga zovantu ava va tundire koyitata eyi ya kundurukidire Jerusarema, kwa retere vaveli nava va kere nonompepo donondona makura navenye tava va verura.
17 Nye mupristeli gomunene, ta katuka kumwe nava va hamenene kwendi, ava ngava kwama marongo goVasadukayi, awo kwa handukire unene.
18 Makura tava kwata vapositoli, tava va tura modorongo zomositata.
19 Nye muengeli gwaJehova ta wiza masiku, ta paturura mavero godorongo, ta va pwagesa mo makura ta va tantere asi:
20 “Zendeni kontembeli mu ka tantere vantu kuhamena eparu lyokomeho.”
21 Apa va yi zuvhire eyi, tava hwilire montembeli kongurangura zonene nokutameka kuronga.
Mupristeli gomunene ntani nava va hamenene kwendi apa va ya sikire, tava tulisa po sigongi somasimbi nokuzigida masimbi goVaisraeli, makura tava tumu vanomeni wontembeli kodorongo va ka rete vapositoli.
22 Nye vanomeni owo apa va ka sikire, kapi va ka gwene mo vapositoli modorongo. Makura tava tengura va ka sikise mbudi
23 asi: “Ose kuna ka gwana dorongo vana zi pata ntani vanomeni kuna sikama komavero nye apa tuna zi paturura, nagumwesi tuna gwana mo.”
24 Mukondi govanomeni wontembeli novapristeli wovanene apa va yi zuvhire, tava tukuka nokulipura asi yisinke nayi horoka.
25 Nye gumwe ta wiza ta ya va tantere asi: “Anone! Vagara vena komutulire modorongo, moveli montembeli kuna kuronga vantu.”
26 Mukondi govanomeni wontembeli ta zi novanomeni va ka rete vapositoli nye kapisi komusininiko, yeeyi kwa tjilire vantu asi tava va dipaga nomamanya.
27 Tava va reta komeho zosigongi somasimbi. Makura mupristeli gomunene ta va tantere
28 asi: “Ose kwa mu pangerere asi mwa ha ronga medina lyomugara ogu, tareni si, erongo lyeni lina lihanene moJerusarema nazinye, one kuna tokomene kutupa usima wonomfa dendi.”
29 Peturusa novapositoli vakwawo tava limburura asi: “Ose twa hepa kulimburukwa po Karunga ngomupangeli, nye kapisi vantu.
30 Karunga gozinyakurwetu kwa pindura Jesus koufe ogu mwa pamparerere kositji.
31 Karunga kwa mu zerura a ka hingire korulyo rwendi noku mu horowora a gave eparu nezoworo, yipo Vaisraeli va litezurure ano nonzo dawo va di va dongwenene po.
32 Ose kwa mwene yininke eyi. Ntani mpepo zokupongoka ezi a gava Karunga kwava ava mu limburukwa, kwa tu vatera tu gave umbangi kuhamena yininke eyi.”
33 Apa va yi zuvhire eyi, tava handuka unene* makura tava tokora asi va va dipage.
34 Nye Gamaliyeli, Mufalisayi, ogu ga kere murongi goVeta ntani ogu va fumadekere vantu navenye, ta katuka mosigongi somasimbi nokugava mpangera asi va pwagese mo tanko vapositoli.
35 Makura ta tanta asi: “One Vaisraeli, takameseni kweyi muna hara kurugana vagara ava.
36 Amesi kapi pana piti siruwo sosire apa ka fumanene Teudasi ogu ga limwene asi mulyo ntani vagara wokusika koyiha 400 kwa lipakerere nendi. Nye kwa mu dipagere, ano ava va mu kweme tava lihana ntani kambunga kawo taka haga po.
37 Konyima zendi, taku kwama Judasa goMugalireya ogu ga fumanene posiruwo selitjangeso, nage kwa ninkire vantu va hame kwendi. Mugara ogo nage kwa mu dipagere, ano navenye ava va heme kwendi tava lihana.
38 Yipo nye nina kumutantera asi mwa ha va rugana yuma nye va sigeni. Nsene asi eyi vana kukambadara yokutunda kovantu, ngayi haga po,
39 nye nsene asi yokutunda kwaKarunga, kapi ngomu vhura kuyihagekesa po. Takameseni, neyisi nomu moneka ngwendi kuna kurwanesa Karunga.”
40 Awo tava yi tambura makura tava zigida vapositoli, tava va sopora* noku va pangera asi va hageke kuzuvhisa medina lyaJesus makura tava va sigi va ze.
41 Tava tundu po posigongi somasimbi awo vana hafa unene morwa kwa lizuvhire asi va fira kuvahepekera edina lyaJesus.
42 Nkenye ezuva ngava zuvhisire montembeli ntani tunda embo zende embo, awo kapi va hagekere kuronga nokuzuvhisa mbudi zongwa kuhamena Jesus Kristusa.
