Yirugana yovapositoli 7:1-60
7 Nye mupristeli gomunene ta pura asi: “Eyi vana kuuyunga usili ndi?”
2 Sitefanesa ta limburura asi: “Vakwetu novaguhya, purakeneni. Karunga gouyerere, kwa monekerere zinyakurwetu Abirahamu, age simpe moMesopotamiya komeho a ka tunge moHarani,
3 Karunga kwa mu tanterere asi: ‘Tunda mo mosirongo seni nemekoro lyeni o ze kosirongo esi ngani kulikida.’
4 Makura ta tundu mo mosirongo soVakalidi a ka tunge moHarani. Ano konyima zapa va fire oguhwe, Karunga ta mu ninki a ya tunge mosirongo esi muna kara ngesi.
5 Nye Karunga kapi ga mu pere kavega nampili kokusika pompadi asi ka kare kendi, nye kwa mu tumbwidilire asi nga mu pa sirongo esi, ngasi kare sendi noruvharo* rwendi nampili ngomu ga dilire kukara nomuna posiruwo oso.
6 Karunga kwa mu tanterere hena asi ruvharo* rwendi ngaru kara vanayirongo mosirongo sa hana asi sawo ntani awo ngava va tura moupika noku va hepeka* nomvhura 400.
7 Karunga kwa tente asi: ‘Ame ngani pangura muhoko ogu ngagu va tura moupika, ano konyima zeyi, ngava tunda mo va ya karere nge mosirongo esi.’
8 “Karunga kwa tulire po egwanekero lyovamba naAbirahamu. Age kwa ya kere guhyaIsaka makura ta mu rugana yovamba mezuva lyauntantatu, ano Isaka ta ya kara guhyaJakopo,* ntani Jakopo ta ya kara guhya govazinyakurwetu 12.
9 Ano ozinyakurwetu owo kwa nyengere mumbyawo Josefa makura tava mu randesa koVaegipite. Nye Karunga kwa kere nage,
10 ta mu popere momaudigu gendi nagenye noku mu pa unongo ntani noku ninka Farawo hompa gwaEgipite a mu hafere. Farawo ta howorora Josefa a pangere Egipite nombara zendi.
11 Nye nzara zonene kwa kere moEgipite nomoKanani, eyi kwa retere udigu wounene morwa ozinyakurwetu kapi va kere nonondya.
12 Nye apa Jakopo ga zuvhire asi moEgipite nondya* dina kara mo, ta tumu ozinyakurwetu va ze ko sikando sokuhova.
13 Apa va va tumine ko sikando sauvali, Josefa ta lihorora kovakuru vendi noku kwamumbyendi makura Farawo ta ya diva nye asi Josefa ga kara nekoro.
14 Josefa kwa tumine mbudi asi va ka zigide oguhwe Jakopo nekoro lyendi nalinye. Vantu ava va wizire kwa kere 75.
15 Jakopo ta zi koEgipite, oko yiko ga ka fililire kumwe nozinyakurwetu.
16 Tava va twara koSikemu makura tava ka va horeka montoko ezi ga rende Abirahamu kovana vaHamoro moSikemu.
17 “Ano siruwo saKarunga sokusikisa mo etumbwidiro lyendi kwaAbirahamu apa sa kere pepi noku sika, sivaro soVaisraeli moEgipite kwa ligwederere.
18 Ano hompa gwapeke ogu ga dilire kudiva Josefa, ta tameke kupangera moEgipite.
19 Age nga ninkilire mo muhoko gwetu noku tekura momudona ozinyakurwetu pokuvasininika va sige vana vawo yipo va fe.
20 Posiruwo oso, Mosesa tava mu hampuruka, age kwa wapere kosipara saKarunga. Ntani kwa mu rererere membo lyovakondi vendi makwedi gatatu.
21 Nye apa va mu sigire,* munwaFarawo gomukadi ta mu gusa a ka mu rere ngwendi munendi.
22 Mosesa kwa mu rongere unongo naunye womoEgipite. Age kwa kere nediwo lyenene lyokuuyunga noku rugana yininke.
23 “Apa ga kere nonomvhura 40, yipo ga tokwere kukadingura* Vaisraeli vakwawo.
24 Apa ga mwene Muegipite kuna kuhepeka Muisraeli, ta mu popere makura ta dipaga ogu ga hepekere mukwawo.
25 Age kwa gazarerere asi nava yi kwata egano asi Karunga nga va parwira mwendi nye awo kapi va yi kwete egano.
26 Ezuva eli lya kweme ko, ta ya gwana vagara vavali kuna kurwana makura ta hetekere ko kuvakava asi va lipe mbili pokutanta asi: ‘One vezimo limwe tupu. Morwasinke muna kulirwanesera?’
27 Nye ogu ga rwanesere mukwawo ta zundura Mosesa noku tanta asi: ‘Yilye ogu ana kutura o kare mupangeli nomupanguli gwetu?
28 Name ono hara kudipaga nge moomu ko dipagere nkera Muegipite?’
29 Apa Mosesa ga yi zuvhire eyi, ta tjwayukire kosirongo saMidiyani oku ga ka kere ngomunayirongo noku ka retera ko vana vavali wovagara.
30 “Konyima zonomvhura 40, muengeli ta mu monekere momburundu pepi noNdundu zaSinayi mosihwa somega sokutwera mundiro.
31 Apa Mosesa ga yi mwene eyi, ta tetuka kweyi ga mwene. Nye apa ga hederere ko asi a ka tare, ta zuvhu ezwi lyaJehova asi:
32 ‘Ame nyame Karunga gozinyakurweni, Karunga gwaAbirahamu naIsaka naJakopo.’ Mosesa ta kankama, kapi hena ga hedere ko asi a tare.
33 Jehova ta mu tantere asi: ‘Gusa ko yicamakaku konompadi doge, morwa pevango eli ono sikama kwa pongoka.
34 Ame nina mono omu vana kuhepeka vantu vange moEgipite nomu vana kulira, yiyo nina wizire ni ya va popere. Wiza ni ya kutume koEgipite.’
35 Mosesa ogu va nyokere asi: ‘Yilye ogu ana kutura o kare mupangeli nomupanguli gwetu?’ Yige googo ga tumine Karunga a ka kare mupangeli nomupopeli gwawo kupitira momuengeli ogu ga mu monekerere mosihwa somega.
36 Age yige ga ka va pitisilire pokurugana yitetu noyidiviso moEgipite nepEfuta lyEgeha ntani momburundu nomvhura 40.
37 “Mosesa googo yige hena ga tanterere Vaisraeli asi: ‘Karunga nga horowora mokatji keni muporofete ngwendi nyame.’
38 Age yige ga kere mokatji koVaisraeli momburundu ntani kwa mu uyungisire muengeli poNdundu zaSinayi kumwe nozinyakurwetu, age kwa mu pere Karunga mbudi a ya zi tu pe.
39 Ozinyakurwetu kwa nyokere kumulimburukwa, awo kwa mu pere mugongo ntani awo kwa here kutengura koEgipite.
40 Makura tava tantere Arona asi: ‘Tu ruganena yikarunga yi tu pitisire. Yeeyi kapi tuna diva asi yisinke yina ka horokera Mosesa ogu ga tu pitisilire tu tunde mosirongo saEgipite.’
41 Awo kwa rugene ntana momazuva ogo, tava zi zambere nzambo makura tava dana sipito va lihamberere vene kweyi va rugene.
42 Karunga yipo ga va pere mugongo noku va sigilira va karere yininke yekeguru ngamoomu va yi tjanga mobuke zoVaporofete asi: ‘One Vaisraeli, nye nyame tupu ngomu zambere nonzambo momburundu nomvhura 40?
43 Nye one kwa simbire tenta zaMoroko nombungururu zakarunga Rafani, one kwa rugene mafano aga mu ga tongamene. Ame ngani ninka va mu tware mounkwate kesinya kwina lyaBabironi.’
44 “Ozinyakurwetu kwa kere nonkongoronzugo* momburundu. Karunga kwa tanterere Mosesa a zi rugane makura tava zi rugana moomu ga va likidire Karunga.
45 Ano ozinyakurwetu ava va kere nazo, kwa zire naJosuwa va zi tware mosirongo sovageni ava ga tjidire mo Karunga morwa ozinyakurwetu. Azo kwa kere moomo dogoro momazuva gaNdafita.
46 Karunga gwaJakopo kwa mu haferere ntani age kwa hundilire asi a mu tungire nzugo.
47 Nye Saromo yige ga ya mu tungilire nzugo.
48 Nye Karunga gekeguru-guru kapi ga kara mononzugo edi va rugana vantu nomawoko moomu ga yi tanta muporofete asi:
49 ‘Jehova kuna kutanta asi eguru yilyo sipundi sange, ano evhu yilyo ulyatero wonompadi dange. Nzugo musinke nomu tungira nge? Ndi kolili evango eli nani vhura kupwizumukira?
50 Nani nayinye eyi kapisi nyame na yi rugana?’
51 “One kwa runda nomutwe morwa nomutjima deni kwa kukuta ano matwi geni kwa limbandera, one kunyoka nkenye apa mpepo zokupongoka ngamoomu va yi rugene ozinyakurweni.
52 Kweli muporofete ogu va dilire kuhepeka ozinyakurweni ndi? Awo kwa dipagere ava va divisire asi muhungami nga wiza ogu mwa horora yiyo mwa mu dipaga,
53 Karunga kwa ruganesere vaengeli va mu pe Veta, nye one kapi mwa zi sikisa mo.”
54 Apa va yi zuvhire eyi, tava handuka unene* tava mu likwetjere mazego.
55 Nye age kwa zulire mpepo zokupongoka ntani kwa nwikire meguru, makura ta mono uyerere waKarunga naJesus ana sikama korulyo rwaKarunga,
56 ta tanta asi: “Tareni! Ame kuna kumona eguru lina zeguruka ntani MunwaMuntu kuna sikama korulyo rwaKarunga.”
57 Awo tava zigire unene noku likwata komatwi, makura navenye tava mu pongerere.
58 Konyima zokumupwagesa ponze zositata, tava mu toona nomamanya. Nombangi doyimpempa kwa geve yikoverero yawo komudinkantu gomugara Sauru ayi va takamesere.
59 Eyi Sitefanesa vana kumutoona, ta kugu asi: “Jesus, Hompa gwange, tambura eparu lyange.”
60 Ta tongeke nongoro nokuzigira unene asi: “Jehova, wa ha va futisa konzo ezi.” Tupu ga mene kuyiuyunga eyi, ta fu.*
Nonkango dokonhi
^ MoRugereka asi “mbuto.”
^ MoRugereka asi “mbuto.”
^ Ndi “kuvatekura momudona.”
^ Ndi nampo asi “ta mu rugana yokulifana.”
^ Ndi “mbuto zina kara mo.”
^ Ndi “sigililire.”
^ Ndi “kukatarera po.”
^ Ndi “tenta ezi ngazi likida asi Karunga nawo ga kere.”
^ Ndi “tayi va koro.”
^ MoRugereka asi “ta rara.”
