Yirugana yovapositoli 8:1-40
8 Sauru nage kwa yi haferere kweyi va dipagere Sitefanesa.
Kutunda ezuva olyo, mbungakriste zomoJerusarema kwa zi hepekere unene, ano varongwa navenye kwa lihanenene monomukunda domoJudeya naSamaliya, vapositoli velike va kere moJerusarema.
2 Vagara ava va tjilire Karunga tava gusa simpu saSitefanesa tava si twara va ka si vhumbike ntani kwa mu lilire unene.
3 Sauru ta tameke kuhomokera mbungakriste. Age nga homona tunda embo zende embo, oku ta purututa vagara novakadi a va tulise modorongo.
4 Nye varongwa ava va lihene, kwa zire mwa za sirongo va ka zuvhise mbudi zongwa kuhamena nonkango daKarunga.
5 Filipusa kwa gurumukire kositata saSamaliya a ka va zuvhisire kuhamena Kristusa.
6 Mbunga zovantu kwa purakenene eyi ga uyungire Filipusa ntani va mwene yidiviso eyi ga rugene.
7 Yeeyi vantu wovanzi kwa kere nonompepo donondona, ado kwa zigilire unene nokupwaga mo. Ntani hena yirema yoyinzi yomondambo noyirema yimwe kwa yi verwire.
8 Vantu womositata oso kwa hefe unene.
9 Mositata oso mwa kere mugara gedina Simoni ogu nga rugana youmpure, age nga tetukisa Vasamaliya ntani age nga tanta hena asi age nonkondo unene.
10 Vantu navenye, kutunda komununu dogoro komunene, kwa mu purakenene nokutanta asi: “Nonkondo daKarunga kwa kara momugara ogu.”
11 Monkedi ezi ga va tetukisire noyirugana yendi youmpure kwa va ninkisire va mu purakene.
12 Apa Filipusa ga va zuvhisilire mbudi zongwa zoUhompa waKarunga ntani kuhamena Jesus Kristusa, tava yi pura makura vagara novakadi tava va kuhu.
13 Simoni nage kwa ya kere mupuli, ano konyima zokumukuhwa, ta twikire naFilipusa, age kwa tetukire pokumona yitetu noyidiviso yoyinene.
14 Apa vapositoli womoJerusarema va zuvhire asi Vasamaliya vana tambura nonkango daKarunga, tava va tumine Peturusa naJohanesa,
15 awo tava zi tava ka kanderera asi vapuli owo va gwane mpepo zokupongoka.
16 Yeeyi kapi va kere nazo, morwa kwa va kuhwire tupu medina lyaHompa, Jesus.
17 Tava va kambeke mawoko makura tava gwana mpepo zokupongoka.
18 Simoni apa ga mwene asi vapositoli kuna kugava mpepo zokupongoka pokukambeka vantu mawoko, ta va pe yimaliwa
19 noku va hundira asi: “Name peni nge ko nonkondo edi yipo asi nkenye ogu ngani kambeka mawoko gange, nga gwane mpepo zokupongoka.”
20 Nye Peturusa ta mu limburura asi: “Ngo fe noyimaliwa yoge, yeeyi ove kuna kugazara asi kuvhura o rande uhwi waKarunga noyimaliwa.
21 Ove nokuvhura si kulihameka mosirugana esi, yeeyi mutjima goge kapi guna hungama kosipara saKarunga.
22 Litezurura nye o sige yirugana yoge yoyidona. Likwambera kwaJehova ntani rundurura magazaro goge gomadona yipo a ku dongwenene po,
23 yeeyi nina kumono asi ove kuna zura mfudu ntani ove mupika gononzo.”
24 Simoni ta va tantere asi: “Likwamberereni nge po kwaJehova yipo yi dire kuhorokera nge eyi muna uyunga.”
25 Konyima zokuzuvhisira nakunye nokuuyunga kuhamena nonkango daJehova, tava tengura koJerusarema, ano monzira zawo tava zuvhisa mbudi zongwa monomukunda dononzi daSamaliya.
26 Nye muengeli gwaJehova ta tantere Filipusa asi: “Katuka o ze kombindakano kositaura esi sa tunda koJerusarema si kunkumuke koGasa.” (Nzira ozo, zomomburundu.)
27 Poopo ngoso, ta katuka a ze, monzira zendi ta mono mugara goMuetiyopiya ogu ga kere erenga, age kwa kere mepangero lyahompa gomukadi gwaEtiyopiya, Kandake, ntani nga takamesa emona lyahompa ogo. Age kwa zire koJerusarema a ka karere Karunga,
28 apa ga ka tengwire, age kwa hingilire mokarukara kendi oku ta resa kuziguruka mobuke zomuporofete Jesaya.
29 Makura Karunga ta tantere Filipusa kupitira mompepo zendi asi: “Zende kokarukara kena.”
30 Filipusa makura ta duka pepi nako, ta mu zuvhu kuna kuresa mobuke zomuporofete Jesaya, makura ta mu pura asi: “Enye tomu yi kwata tupu egano eyi muna kuresa?”
31 Age ta tanta asi: “Omu nani yi kwata egano apo pwa hana ogu ana kuyizeresera nge?” Makura ta ninki Filipusa a ronde a hingire nendi.
32 Etjangwa eli ga resere lyeli asi: “Age kwa mu twere va ka mu dipage ngwendi nzwi ntani ngwendi moomu azi mwena nzwigona apa ava zi kurura, nage kwa mwenene.
33 Awo kwa mu swawire, kapi va mu pangwire pauhunga. Yilye ogu nga tanta asi age gomoruvharo rwalye? Yeeyi eparu lyendi kwa li gusire po apa pevhu.”
34 Erenga makura tali pura Filipusa asi: “Na ku kanderere, tantera nge asi ogu muporofete yilye ga tembe apa? Kuhamena mwene ndi muntu gwapeke?”
35 Filipusa ta tameke kuuyunga nage kutundilira petjangwa eli, ta mu udisire mbudi zongwa kuhamena Jesus.
36 Monzira zawo tava gwana mema kositaura, makura erenga tali mu tantere asi: “Tara! Mema gaga, yisinke hena nayi limba po kukuhwa nge?”
37 *——
38 Erenga tali gava mpangera asi karukara ka sikame, tali zi naFilipusa momema, makura Filipusa ta kuhu erenga olyo.
39 Apa va zaukire momema, mpepo zaJehova tazi gusa po usimbu Filipusa, ano erenga kapi lya mu mwene hena, alyo kwa twikilire nzira zalyo noruhafo.
40 Nye Filipusa ta zi koAsidodo, ta ka twikira kuudisa mbudi zongwa moyitata nayinye dogoro ta ka sika koKesareya.
Nonkango dokonhi
^ Tara mwaMateusa 17:21, ftn.
