Yirugana yovapositoli 9:1-43
9 Nye Sauru ogu ga hepekere varongwa vaHompa nokuhara kuvadipaga, kwa zire komupristeli gomunene
2 a ka mu pure a tjangere nombilive konosinagoge domoDamasikusi, yipo a ka kwate vagara novakadi navenye ava va hamenene konzira zaHompa, a ka va rete koJerusarema.
3 Ngomu ga gendere nokusika pepi naDamasikusi, hararasi site tasi tundu meguru, ta si mu temene,
4 ta ligandere pevhu, ta zuvhu ezwi lina kumupura asi: “Sauru, Sauru, morwasinke ono kuhepekera nge?”
5 Age ta pura asi: “Nyove yilye Hompa?” Age ta limburura asi: “Nyame Jesus, ogu ono kuhepeka.
6 Katuka o ze kositata, oko yiko nava ka kutantera eyi no ka rugana.”
7 Vagara ava ga gendere nawo kwa tetukire ntani kapi va vhulire kuuyunga, yeeyi awo kwa zuvhire tupu ezwi nye kapi va mwene ogu ga uyungire.
8 Sauru makura ta katuka, nye nampili ngomu meho gendi ga pahukire, kapi ga vhulire kumona. Tava mu kwata komawoko va mu tware koDamasikusi.
9 Mazuva gatatu ga dilire kumona ntani kapi ga lire ndi a nwe yuma.
10 MoDamasikusi mwa kere murongwa gedina Ananiyasa, Hompa ta mu zigida memoneko asi: “Ananiyasa!” Age ta limburura asi: “Nyame ogu Hompa.”
11 Hompa ta mu tantere asi: “Zende monzira ava tumbura asi Nzira zokuvyukilira o ka papare mugara gedina Sauru, gokoTaruso, membo lyaJudasa. Age kuna kukanderera,
12 yeeyi age kuna kumono memoneko asi ono hwilire monzugo yiyo ono mu kambeke mawoko yipo a mone.”
13 Nye Ananiyasa ta limburura asi: “Hompa, ame kwa zuvha kovantu wovanzi kuhamena mugara ogu omu nga hepeke varongwa woge moJerusarema.
14 Age kuna wiza oku morwa vapristeli vana mu tumu a ya kwate* navenye ava va hamena koge.”
15 Nye Hompa ta mu tantere asi: “Zende, yeeyi mugara ogu yige nina horowora nga gave umbangi kuhamena nge konomuhoko nokovahompa ntani koVaisraeli.
16 Ame ngani mu likida yininke yoyinzi eyi nga hepera medina lyange.”
17 Ananiyasa makura ta zi, ta ka hwilira monzugo ezi ga kere Sauru, ta mu kambeke mawoko makura ta mu tantere asi: “Sauru, mukwetu, Hompa Jesus ogu ka ku monekerere monzira zoge zokuwiza, yige ana tumu nge yipo meho goge ga mahuke ntani o zure mpepo zokupongoka.”
18 Poopo ngoso, yininke yokufana ngwendi nongande ta yi gu momeho gendi, meho gendi taga mahuka. Makura tava mu kuhu,
19 ta li ko nondya makura ta gwana nonkondo.
Age kwa kere kumwe novarongwa mazuva gongadi moDamasikusi,
20 kutunda opo, ta tameke kuzuvhisira monosinagoge asi Jesus yige MunwaKarunga.
21 Nye navenye ava va mu purakenene kwa tetukire nokulipura asi: “Nani kapisi yige mugara ogu nga hepeke ava va hamenene kwaJesus moJerusarema? Kapisi kuna wizire a ya va kwate* a va tware kovapristeli wovanene?”
22 Nye Sauru kwa ya divire nawa kuzuvhisa, ano Vajuda ava va tungire moDamasikusi ya va vhulire kumupatanesa morwa age kwa geve umbangi pokuvalikida nawa-nawa asi Jesus yige Kristusa.
23 Apa pwa pitire mazuva gomanzi, Vajuda tava liyongo asi va mu dipage.
24 Nye eyi va liyongere, Sauru ga ya yi zuvhire. Awo ngava nomene pomavero masiku nomutenya yipo va mu dipage.
25 Makura varongwa vaSauru tava mu pitisa masiku pokampito aka ka kere mekuma va mu hegumwisire pevhu mosimbamba.
26 Apa ga ka sikire koJerusarema, ta hetekere ko kulipakerera novarongwa, nye awo kwa mu tjilire morwa kapi va yi pulire asi ana kara murongwa gwaJesus.
27 Nye Baranabasa kwa vaterere Sauru, ta mu twara kovapositoli. Ta va tantere omu Sauru ga mwene Hompa monzira, nomu Hompa ga uyungire naSauru. Ta va tantere hena omu Sauru ga uyungire nouradi medina lyaJesus moDamasikusi.
28 Age kwa kere nawo moJerusarema, nga paruka pwa hana yilimbikiso nokuuyunga nouradi medina lyaHompa.
29 Age nga uyunga nokulipatana noVajuda ava ngava uyunga Rugereka, awo ngava papara nompito dokumudipaga.
30 Apa vakwawo va yi dimbwilire eyi, tava mu gurumwisa koKesareya va ka mu tume koTaruso.
31 Makura nombungakriste nadinye domoJudeya nomoGalireya nomoSamaliya kwa kere mombili noku nkondopara ntani ngomu va tjilire Jehova, mpepo zokupongoka kwa va nkondopekere makura tava ligwederere.
32 Ngomu Peturusa ga gendere monomukunda nadinye, ta ya siki kovarongwa ava va kere moLida.
33 Omo yimo ga ya gwene mugara gedina Ayineyasa ogu ga rere pouro ure wonomvhura ntantatu yeeyi age kwa kere sirema somondambo.
34 Peturusa ta mu tantere asi: “Ayineyasa, Jesus Kristusa ana kuverura. Pinduka nokuwapeka uro woge.” Poopo ngoso, ta pinduka.
35 Apa va mu mwene navenye ava va tungire moLida nomoSaroni, tava hama kwaHompa.
36 MoJopa mwa kere murongwa gomukadi gedina Tabita, eli ali tanta asi Dorokasa.* Age nga rugana yirugana yoyinzi yoyiwa nokuvatera nohepwe.
37 Peturusa age simpe moLida, Dorokasa ta vere makura ta fu. Tava mu kuhu noku ka mu rangeka monzugo zekeguru.
38 Mokumona asi Lida kwa kere pepi naJopa, apa varongwa va zuvhire asi Peturusa mweli mositata oso, tava tumu vagara vavali va ka mu zigide asi: “Genderera kuwiza kwetu.”
39 Peturusa makura ta zi nawo. Apa ga ka sikire, tava mu twara konzugo zekeguru, ano vafisavaya vawo navenye ava va kere po, kwa lilire nokulikida yikoverero nomarwakani* aga ga va ruganenene Dorokasa apa ga kere muzuni.
40 Peturusa ta pwagesa navenye ponze, ta tongamene nokukanderera. Ta tara kosimpu nokutanta asi: “Tabita, pinduka!” Ta pahura meho gendi, apa ga mwene Peturusa, ta hingire.
41 Ta mu kwata kokuwoko, ta mu katura, ta zigida varongwa novafisavaya vawo ta mu va likida.
42 Eyi kwa divikwire moJopa nazinye ano vantu wovanzi tava pura mwaHompa.
43 Age kwa kere mazuva gongandi moJopa kumwe naSimoni musunti goyipapa.
Nonkango dokonhi
^ MoRugereka asi “kumanga; kutura modorongo.”
^ MoRugereka asi “a va mange nokuvatwara.”
^ Edina lyoRugereka Dorokasa nedina lyoRuarameya Tabita kutanta asi “menye.”
^ Ndi “yikoverero yokontunda.”
