Mvhura ezi, tuna kara nosiruwo sosinzi mokuliwapaikira Murarero gwaHompa. Nsene Murarero gwaHompa ngagu kara mokatji kosivike, epongo lyomosivike kapi ngali kara ko mosivike oso. Ano Murarero gwaHompa nsene ngagu kara mosikondovike, siuyungwa sanavenye nElirongo lyoRuhungu kapi ngayi kara ko. Ya wapa kuliwapaikira yipo ngatu ruganese siruwo oso monaruwa. Ngwendi mosiruwo sanare, eliwapaikiro lyewa mulyo unene kosilika esi. (Ruk 22:7-13; km 3/15 epe. 1) Ngapi omu natuvenye natu wapaika nomutjima detu?

• Gazadara ko omu ya kara nomulyo kukakara po.—1Kol 11:23-26

• Teda ko unene kelikwatakano lyoge naJehova.—1Kol 11:27-29; 2Kol 13:5

• Resa nokuteda ko koMatjangwa aga ga zogera kuhamena Murarero gwaHompa.—Joh 3:16; 15:13

Vazuvhisi vamwe kuresa nokuteda ereso lyoBibeli lyoMurarero lya kara mokabuke Konakona Matjangwa gankenye ezuva. Ano vamwe kuresa novelise domoBibeli edi da kara pokarata ezi zina kara konhi. Vamwe kuresa yirongwa yomoRuhungu eyi ya zogera kuhamena Murarero gwaHompa ntani neharo eli ga tu likida Jehova naJesus. Nkenye nkedi ezi no ruganesa, ngano zi ku vatere o hedere Jehova naMunwendi pepi.