Murarero gwaHompa kutupa mpito tu gazadare ko komatungiko ngatu ka gwana komeho morwa sizoweseso, ngwendi evhumbuko. Kapi sa kere sitambo saJehova asi vantu va fe. Yiyo atu zuvhire kukora unene komutjima apa atu fisa. (1Kol 15:26) Jesus ga zuvhire kukora komutjima apa ga mwene varongwa vendi kuna kulira nomfa daRasarusa. (Joh 11:33-35) Mokumona asi Jesus kuhonena nawa oGuhwe, Jehova nage kuzuvha kukora komutjima apa atu mono kuna kulira nomfa domuntu. (Joh 14:7) Jehova kuna kundindira nononkondo apa nga ka tengwidira keparu vakareli vendi ava va fa. Nose ngano tu lizuvhe ngoso.—Joba 14:14, 15.

Mokumona asi Jehova Karunga kwa hara kurugana yininke monkedi zokuliza, evhumbuko nalyo ngali ka horoka monkedi zongwa zokuliza. (1Kol 14:33, 40) Kapi ngaku ka kara hena mahoreko, nye ngatu ka tambura ava ngava ka vhumbuka. Apa o fisa, ove kugazadara kuhamena evhumbuko ndi? (2Kol 4:17, 18) Ove kupandura Jehova kosizoweseso ntani kweyi ga faturura moMatjangwa kuhamena evhumbuko ndi?—Koros 3:15.

• Vakaume ntani vanekoro musinke ono kundindira nononkondo kukamona hena?

• Wolye va tumbura moBibeli ono hara kukamona nokukasimwitira nawo?