MwaNsinano 23, mamiliyona 12 govantu ndi wokupitakana opo uzuni mudima ngava ponga nose poMurarero gwaHompa. Awo ngava gwana umbangi wouwa apa mugavi siuyungwa nga faturura uhwi wosizoweseso ou ga tu pa Jehova ntani matungiko aga ngava ka hafera vantu komeho. (Jes 11:6-9; 35:5, 6; 65:21-23; Joh 3:16) Kapisi gelike nga vhura kugava umbangi posilika esi. Nose ngatu lihameka mo pokutambura nawa vagenda ava ngava wiza. (Rom 15:7) Pana kara magano no vhura kukwama.

• Mevango lyokuhingira tupu posipundi soge o ndindire elikwamo li tameke, ngo tambure vagenda nava va tengura monyima pokuvamorora nokuzogera nawo nombili

• Pokusimwitira nava wa lidiva nawo, ngo nomene hena owo ngava wiza morwa kwa gwana simbapira sezigido. Ngo hingire nawo yipo mu rese kumwe moBibeli zoge nokudimba kumwe

• Konyima zosiuyungwa, limburura nkenye mapuro vana kara nago. Nsene siruwo sisesu morwa mbungakriste zapeke tazi hwilire mo, tura po mawapaiko yipo ngomu ligwane hena. Nsene kapi wa kara nomauzera gendi, kuvhura ngo mu pure asi: “Ngapi lina gendi po epongo? Kupi ngani vhura kukugwana ngatu ka zogere hena?”