KUPARUKA NGOMUKRISTE
Nyokera po kuronga momudona pokurugana elirongo lyoBibeli
Kuuyunga yoyinzi: Kapisi hepero o faturure nayinye. Jesus kwa ruganesere mapuro mokuvatera vantu va gazadare ko nokugwana vene elimbururo. (Mat 17:24-27) Mapuro kuvatera varongwa va lihameke mo ntani murongi a dive nsene asi murongwa ana yi kwata egano nokuyipura. (be epe. 253 para. 2-3) Nsene ono pura epuro, ndindira elimbururo. Nsene murongwa na gava elimbururo lyepuko, kapisi omu tantere elimbururo, nye ruganesa mapuro dogoro mwene a gwane elimbururo lyouhunga. (be epe. 238 para. 1-2) Uyunga monkedi ezi murongwa goge na kwata egano magano gomape.—be epe. 230 para. 4.
Kudigopeka yininke: Nyokera po kufaturura nayinye eyi wa diva kuhamena sirongwa oso. (Joh 16:12) Demenena kelimbururo lyomoparagarafu. (be epe. 226 para. 4-5) Nampili mauzera gomawa, kuvhura kudonganesa elimbururo. (be epe. 235 para. 3) Nsene murongwa ana kwata egano elimbururo, rundurukireni koparagarafu zokukwama ko.
Kukondjera kumana buke: Sitambo setu sokuvatera murongwa a yi kwate egano, kapisi sokumana buke. (Ruk 24:32) Morwa Nonkango daKarunga kwa kara nononkondo, ya wapa kuresa matjangwa aga ga kwatesa ko elimbururo yipo ga vatere murongwa. (2Kol 10:4; Heb 4:12; be epe. 144 para. 1-3) Ruganesa yifanekeso youreru. (be epe. 245 para. 2-4) Gazadara ko komaudigu gendi neyi ga pura, makura ronga kuliza noukaro wendi. Pura mapuro gwendi gaaga: “Ngapi ono kulizuvha kuhamena eyi tuna lirongo?” “Yisinke yina kuturonga eyi kuhamena Jehova?” “Mauwa musinke no gwanena mo nsene o kwama mapukururo aga?”—be epe. 238 para. 3-5; epe. 259 para. 1.