JULIAN ta diworoka omu ga lizuvhire apa ga zuvhire ediviso asi munwendi kapi ana kara hena gumwe goNombangi daJehova. Age kwa tanta asi: “Ame kwa lizuvhire ngwendi ni fe. Age kwa kere munwange gomukondi, ogu twa likwatakanene nendi unene; ntani ngatu rugana nkenye eyi kumwe.” Julian ta faturura asi munwendi kwa kere nonkareso zongwa nye ga ya litjindjire nokurugana yininke yoyidona. Mukadange nga lili nkenye apa, kapi na divire omu nani mu hengagwida. Julian kwa tanta asi: “Ose kwa lizuvhire ngwendi kapi twa rugene ko yuma ngovakurona.”

Nokonda musinke za gava Bibeli deyi nava gusira muntu mombunga? Mokumona asi ayo kukoresa, morwasinke kugusa mombunga lya karera ewapaiko lyeharo?

Nsene Mbangi zaJehova ga gwana ekuho a tura nzo zonene nokudira kulitezurura, tava mu gusa mo mombunga.

Jehova kapi a ndindire ko kwetu asi tu sikilire mo, nye ana hara vakareli vendi va limburukwe noveta dendi nokukara vana pongoka. Pasihonena, Jehova kupangera vakareli vendi va nyokere po nonzo ngwendi kuhondera, kukarera vakarunga woyimpempa, widi, kuhakana, kudipaga ntani umpure.—1 Vakolinte 6:9, 10; Ehororo 21:8.

Jehova kapi a ndindire ko yoyinzi kwetu ntani age kutupopera. Pasihonena, natuvenye tuna hara kuparuka mokatji kovantu wombili wokuhungika ntani wononkedi donongwa, ano eyi yiyo atu limonene mokatji kovapuli vakwetetu. Morwasinke va karera ngoso? Morwa awo kwa ligava vene kwaJehova nokutumbwidira asi ngava paruka kuliza neyi azi uyunga Bibeli.

Ngapi nsene Mukriste ga gwana ekuho a tura nzo zonene morwa upirankondo wetu? Eyi yiyo ya horokerere vakareli vamwe vaJehova vanare, nye Jehova kapi ga va zumbire. Pasihonena, apa hompa Ndafita ga tulire nzo zehondero nezi zedipago, muporofete Natani kwa tanterere Ndafita asi Jehova ana mu gusire po.—2 Samwere 12:13.

Morwasinke Jehova ga gusilire po Ndafita? Morwa Jehova kwa mwene asi Ndafita ana litezurura sili. (Episarome 32:1-5) Nampili naina, vamwe ava va tulire nzo zonene va va gusira po morwa kwa litezurura sili nokuhageka kurugana udona. (Yirugana 3:19; 26:20) Nsene vakuronambunga womokomitiye zokupangura va diva asi muntu kapi ana litezurura, tava mu gusa mombunga.

Nsene asi gumwe gemepata ndi kaume va mu gusa mombunga, kuvhura yi ku digopere kutambura etokoro olyo ntani asi kapi yina hungama. Nye Nonkango daJehova kwa yi likida asi kugusa mombunga kuna kara ewapaiko lyeharo.

Jesus kwa tente asi “ukonentu waKarunga kumoneka moyirugana yawo asi awo kwa hungama.” (Mateusa 11:19) Tu tareni nokonda ntatu eyi ya wapera kugusa muntu mombunga nsene kapi ana kulitezurura.

Kugusa mombunga kupopera edina lyaJehova kokudira kuswauka. Eyi atu rugana kufumanesa ndi kuswaukisa Jehova, morwa ngoNombangi dendi, ose kwa simba edina lyendi. (Jesaya 43:10) Ngwendi moomu tupu nkareso zomunona azi fumadekesa ndi azi swaukisa vakurona vendi, nkareso zovakareli vaJehova kumufumadekesa ndi kumuswaukisa. Momazuva gaHesekiyeli, nomuhoko dapeke kwa kwatakanesere Vajuda nedina Jehova. (Hesekiyeli 36:19-23) Mokulifana nanaina, vantu kukwatakanesa Nombangi daJehova nedina Jehova. Yipo nye, nsene tu limburukwa noveta daJehova, ose ngatu mu retera eyererepeko.

Mupositoli Peturusa kwa pukurura Vakriste asi: ‘Omu limburukwe kwaKarunga, kapisi omu kwama-kwame hena madowo goukaro weni wanare, apa mwa dilire kudiva yuma. Omu kare vapongoki moukaro weni naunye, moomu ga kara mupongoki Karunga ogu ga mu horowora. Yeeyi matjangwa kwa tanta asi, “Omu kare vapongoki, yeeyi ame ni mupongoki.”’ (1 Peturusa 1:14-16) Pasihonena, nsene tu hondera ngatu swaukisa edina lyaKarunga. Nye apa atu kara tuna kuhuka, ose kuretera eyererepeko Jehova.

Nsene Mbangi zi rugana udona, vantu ava va zi diva ngayi va tetukisa. Nye apa nava ya yi diva asi kapi hena ana kara gumwe goNombangi daJehova, ngava yi dimburura asi vantu vaJehova kulimburukwa eyi azi uyunga Bibeli ntani kuzeresa mbungakriste. Pasihonena, mugara gumwe moSwisiranda kwa zire komapongo nokutanta asi kuna hara a kare gumwe gomombungakriste. Mpanzendi kwa mu gusire mombunga morwa kuhondera ano eyi kwa mu tumangedere a hare kulipakerera nombunga “azi dili kupulisira nomukaro donondona.”

Kugusa mombunga kuzeresa mbungakriste. Mupositoli Paurusa kwa rondwere Vakolinte kosiponga sokutarerera munzoni gokudira kulitezurura a kare mombunga. Age kwa hetakanesere udona wovanzoni owo koyihaheso eyi ayi haheke yiduva mudima. Paurusa kwa tanta asi: “Yihahesogona kuhahesa yiduva mudima.” Yipo ga va pukwilire asi: “Muntu gomudona kumugusa mo mombunga zeni.”—1 Vakolinte 5:6, 11-13.

“Muntu gomudona” kuhondera ga hana kulifa nomuga. Vamwe womombungakriste kwa ya tamekere kutambura nkareso ozo zondona. (1 Vakolinte 5:1, 2) Eyi kwa kere siponga morwa Vakriste vakwaawo kwa va kundamene nkareso zokunyata ezi za kere moKolinte. Mokulifana nanaina, nsene va sigilira nzo zonene mombungakriste, vamwe kuvhura va tameke kutara nompango daJehova asi kwato mulyo. (Muudisi 8:11) Moomu tupu “nyata zonene” azi zonagura mema gomawa, vananzo wokudira kulitezurura kuvhura kuzonagura epuro lyovakwaawo womombunga.—Juda 4, 12.

Kugusa mombunga kuvatera munanzo a dimburure epuko lyendi. Jesus kwa simwitilire sifanekeso somumati ogu ga sigire embo lyoguhwe nokukazonagura emona lyendi moruho. Moruhura mumati ga ya dimbwilire asi udigu kuparuka pwagelike. Yipo ga litezwilire nokutokora kutengura kembo lyoguhwe. Oguhwe kwa hefe apa va mwene asi munawo ana rundurura nkareso zendi, makura tava mu tambura membo lyawo. (Rukasa 15:11-24) Sifanekeso esi kutuvatera tu kwate egano omu a lizuvhu Jehova nsene gumwe ana litezurura. Age kwa tanta asi: “Ame kapi na hafera kumona munzoni ana kufa. Hasa kumumona ta hageke kuzona a kare nomwenyo.”—Hesekiyeli 33:11.

Mbungakriste kuna kara epata lyetu lyopampepo. Nsene gumwe vana mu gusa mo mombunga, age kapi ana kara hena ruha rwepata olyo. Konyima zokuhepa koyitundwamo yonkareso zendi zondona, kuvhura a dimburure epuko lyendi nokudiworoka omu ga kere noruhafo apa ga kere nelikwatakano lyewa naJehova ntani nombungakriste. Eyi kuvhura yi mu korangede a tengure kepata lyendi lyopampepo.

Pokuvatera muntu va gusa mombunga a tengure kombungakriste, twa hepa kumulikida eharo. Pasihonena, gazara vagendi nonondundu vavali vana kundindira va ya va popere komufu gomunene. Morwa mufu unene, gumwe ta roroka unene nokuhara kurara. Nye nsene a rara moyiterengenze, ta fu. Mokumuvatera a dire kurara, mukwawo ga hepa kumukapagura kosipara. Nampili ngomu na zuvha kukora, ayo ta yi popere eparu lyendi. Ndafita kwa pwagesere egano lyokulifana apa ga tente asi: “Muntu gomuwa kuvhura a toone nge ndi a tugumukire nge momuwa.” (Episarome 141:5) Ndafita ga yi dimbwilire asi nampili ngomu episuro lya mu koresere, nye lya mu vaterere.

Ngwendi ekapaguro lina, eguso mombunga yilyo ga hepa muntu yipo a tengure kwaJehova. MunwaJulian, ogu tuna tumbura ketamekero lyosirongwa esi, konyima zonomvhura murongo zapa va mu gusire mombunga, ga ya rundwilire nkareso zendi nokutengura kombungakriste. Age ngesi mukuronambunga. Age kwa tanta asi: “Kugusa nge mombunga kwa ninkisire nge ni dimburure mparukiso zange zondona. Episuro lyangoso yilyo na hepere.”—Vahebeli 12:7-11.

Ayo kuguvisa apa gumwe ava mu gusa mombunga. Nye kapi yina kutanta asi kapi nga tengura hena kwaJehova. Ayo mulyo kwanatuvenye tu kwatese ko episuro. Ngapi natu yi rugana?

Vakuronambunga nkenye apa kuhetekera ko kuhonena eharo lyaJehova, unene po apa ava tantere muntu asi kapi ana kara hena Mbangi zaJehova. Awo kumufatwilira eyi na rugana mokutengura kwaJehova nokuyakara hena ruha rombungakriste. Nsene ogu va gusa mombunga ayi likida asi ana hara kutengura kombungakriste, vakuronambunga tava ka mu dingura poyiruwo noyiruwo va mu diworokese eyi na rugana yipo a tengure kwaJehova. *

Vemepata kulikida eharo kombungakriste nokomuntu va gusa mombungakriste apa ava kwatesa ko etokoro lyovakuronambunga. Julian kwa faturura asi: “Age simpe ga kere munwange, nye mparukiso zendi za tu ninkisire tu ligaunuke.”

Navenye womombunga kulikida eharo lyosili kogu va gusa mombunga pokukwatesa ko episuro lyaJehova kupitira movakuronambunga. Eyi kutanta asi va ha kara kumwe nage ndi va uyunge nage. (1 Vakolinte 5:11; 2 Johanesa 10, 11) Ntani mbungakriste za hepa kuhara unene nokuvatera epata lyomuntu ogo. Esi kukara siruwo sosidigu kepata. Twa ha va tekura ngwendi nawo kwa va gusa mo kombunga.—Varoma 12:13, 15.

Julian kwa tanta asi “kugusa mombunga alyo ewapaiko eli twa hepa, eli nali tu vatera tu paruke kuliza nonompango daJehova. Kugusa ko kukora, ayo ngayi reta yitundwamo yoyiwa. Ame ngano kwa kwatesere ko nkareso zokunyata zamuna nge, ngano kapi ga litezwilire.”