Kutundilira unona, ame kwa here unsitwe. Epata lyetu nkenye apa ngali pwaga tu ka hafere musitu ntani nomadiva gomawa aga ga kundurukidire doropa zetu zaJyväskylä, moCentral Finland. Ntani ame kwa hara yikorama. Apa na kere munona, ame kwa here kulidingira nkenye mbisi nankenye simbwa ngani gwana! Ngomu na ya kulire, ngayi kukoresa nge monkedi omu vantu ava tekura yikorama momudona. Mwaza siruwo, na ya lipakerere nombunga ezi azi pakere mbili yikorama, oko yiko na ka ligwene novantu ava va kara nomutaro ngwendi gwange.

Ose nkenye apa ngatu kondjere ukalinawa woyikorama. Ose ngatu gava mauzera kuhamena yikorama ntani ngatu masha mokunyokera po nongesefa edi ngadi randesa yipapa yoyikorama ntani nononzugokonakoneno doyikorama. Ntani twa tulisire po mbunga zompe zokupopera yikorama. Morwa twa tulisire po nongendeseso dongandi mokuhetekera ko kutura magano getu pasirugana, eyi ngayi ninkisa epangero li tu kwama-kwame. Yikando yoyinzi, ame ngava kwata nge nokutwara nge kompanguro.

Kugusa ko kukara nosinka soyikorama, maudigu gamwe gomouzuni ngaga koresa nge. Konyima, na ya lihamekere motumbunga tongandi, kukwatera mo mbunga zaAmnesty International ntani zaGreenpeace. Ngani ruganesa nonkondo dange nadinye mokukwatesa ko yirugana yado. Ame ngani uyungire po vanaruhepo, wonzara ntani navamwe ngoso mokupopera untu womuntu wovantu owo.

Kanu-kanu na ya yi dimbwilire asi kapi tani vhura kutjindja uzuni. Nampili ngomu nombunga odo da yi tompokere mokukohonona po maudigu gamwe gomanunu, nye maudigu gomanene kwa didire. Ayo kwa kere ngwendi asi udona kwa lihanena uzuni mudima ntani kwato ogu ayi pakere mbili. Kapi na kere hena nononkondo.

Kulizuvha ruguwo morwa kwato nonkondo dokutjindja yininke, kwa ninkisire nge ni gazare kuhamena Karunga noBibeli. Ame ngani lirongo Bibeli nare noNombangi daJehova. Nampili ngomu ngani hafere nkareso zongwa zoNombangi ntani nomu ngava likida nge eharo, simpe kapi na rundwilire eparu lyange. Ano posiruwo esi, yininke kwa litjindjire.

Ame kwa gusire mo Bibeli zange nokutameka kuziresa. Azo kwa pere nge ehengagwido lyenene. Na ya dimbwilire matjangwa gomanzi moBibeli aga aga rongo omu natu tekura yikorama nombili. Pasihonena, Yisewe 12:10 kutanta asi “muntu gomuwa kupakera mbili yimuna yendi.” (Good News Translation) Ntani naya yi dimbwilire asi Karunga kapisi yige a retesa po maudigu gomouzuni ou. Nye maudigu kuna kuvhuka, morwa sinzi sovantu kapi ava kwama mavyukiso gaKarunga. Ame kwa tetukire apa na lirongere eharo lyaJehova ntani nedidimiko lyendi.​—Mapisarome 103:​8-​14.

Posiruwo esi, ame kwa zwidire foroma zokuhundira elirongo lyoBibeli lyobuke Yisinke azi rongo Bibeli sili? nokuzituma. Kapi pwa pitire siruwo yipo valikwali woNombangi va wizire kembo lyange ntani nokupura nge tu lironge Bibeli yipo na yi tambwire. Ntani tani ya tameke kuza komapongo koSinyanga soUhompa. Ngoyitundwamo, ame kwa ya here eyi ngani lirongo moBibeli.

Kupitira melirongo lyoBibeli, ame kwa tulire po malitjindjo gomanzi. Tani ya hageke kukoka makanya nokunwa unene. Makura tani wapukurura emoneko lyange nombuuyungiso zange. Ntani na ya tjindjire mutaro gwange kuhamena epangero. (Varoma 13:1) Tani ya hageke mparukiso zange zondona, nokulikida sikara selipangero.

Kurundurura mutaro gwange konombunga dokuhamena untu womuntu ntani doukalinawa woyikorama kwa digoperere nge sili. Ayo kwa gusire nge siruwo. Pomuhowo, kwa lizuvhire asi nsene ni tunda monombunga odo tayi moneka ngwendi ame munayipempa. Nye naya yi kwete egano asi Uhompa waKarunga welike au gava ehuguvaro lyosili mouzuni ou. Yipo na ya tokwere kuruganesa nonkondo dange nadinye mokukwatesa ko Uhompa owo ntani nokuvatera wopeke va lironge kuuhamena.​—Mateusa 6:​33.

Ngomuntu ogu na here kutjindja uzuni, nare ngani hangura vantu monombunga mbali, vawa ndi vadona, ano ava ngani tara asi vadona ngani rugana ko yuma. Tani pandura Bibeli, morwa ngesi kapi nina kara hena nomalizuvho gonyengo kwava wopeke. Nye ame kuhetekera ko kutunga po eharo lyokuhara vantu navenye. (Mateusa 5:​44) Ntani hena ame kulikida eharo lyangoso pokuzuvhisira ko wopeke mbudi zongwa zoUhompa waKarunga. Ame kuhafa mokumona sirugana esi kuna kureta mbili noruhafo ntani nokupa vantu ehuguvaro lyosili.

Na gwana mbili zomomutjima morwa kusiga yininke nayinye momawoko gaJehova. Na yi pura asi ngoMusiti kapi nga sigilira yikorama novantu va twikire ngorooro kuyihepeka ndi a pulisire evhu va twikire kulizonagura po. Nye kupitira moUhompa wendi, age ntaantani a ka wapukurure nayinye eyi va zonagura vantu. (Jesaya 11:​1-9) Ayo kuretera nge ruhafo rorunene mokudiva mausili aga ntani nokuvatera wopeke va ture epuro momausili ogo. Kapi ani lizuvhu hena asi na hepa kutjindja uzuni.