PONZE zemuwato, vantu kwa twikilire neparu lyawo ngomu mwanare. Awo kapi va pulire simpe asi Ruhanzo naru wiza. Awo nampo va zorere hena unene. Nye konyima zokaruwo tava hageke kuzora.

Hararasi tupu mema taga tameke kugwa. Ago kwa dokomokere ga tunde keguru ngomu o tjire mema ga tunde mosihemere. Nowa mousili ga kere! Nye ngesi kutupu hena ogu ga vhulire kuhwilira memuwato. Jehova kwa zedilire evero ta li sedere.

Madamenena nagenye taga tameke kuzura. Mema taga kara ngwendi nomukuro dononene. Ago kwa gende yitji nokusindumuna mamumanya gomanene, ntani nokuzogerera unene sili. Vantu kwa tukukire. Tava rondo poyituntu. Ee, ngapi tupu omu va liverere asi ngano va purakenene Nowa nokuhwilira memuwato apa evero lya kere simpe lina zeguruka! Nye ngesi vana hulilire.

Mema taga twikire kuzeruka. Mema kwa dokomokere meguru mazuva 40 nomasiku 40. Taga zeruka konontere donondundu, ano konyima nondundu dononde nado taga di kudumike. Ngomu tupu ga yi tente Karunga, vantu noyikorama nayinye ponze zemuwato kwa fire. Nye womonda navenye kwa parukire.

Nowa novana vendi kwa rugene sirugana sosiwa mokutunga emuwato. Mema taga li zerura, makura tali tameke kupupa keguru lyomema. Ezuva limwe apa mvhura za hagekere kuroka, ezuva tali tameke kutema. Ee, ngapi tupu eyi va mwene! Apo kwa kere po tupu emufuta lyemunene napenye. Sininke esi sa vhulire kumoneka selike kwa kere tupu emuwato eli lya pupa-pupire keguru lyomema.

Makisi ngesi kapi ga kere po hena. Ago kapi ga vhulire kukara po hena ga rwadeke vantu. Nagenye kwa fire nozinyago ntani novantu wovadona navenye. Nye yisinke ya horokerere vaguhya vago?

Vaguhya womakisi kapi va kere nawa-nawa vantu ngwendi nyose. Awo kwa kere vaengeli ava va wizire va ya paruke pevhu ngovantu. Apa nye rwa wizire Ruhanzo, awo kapi va fire kumwe novantu navenye. Awo kwa hagekere kuruganesa marutu gopasintu aga va rugene, makura tava tengura meguru ngovaengeli. Nye awo kapi va va pulisilire mokukara hena ruha rwepata lyaKarunga lyovaengeli. Makura awo tava kara vaengeli vaSatana. MoBibeli awo kwa va tumbura asi nompepo donondona.

Karunga makura ta pepesa mpepo, ano mema goruhanzo taga tameke kupwira. Konyima zomakwedi gatano emuwato tali ya hege keguru lyondundu. Mazuva gomanzi ga pitire po, ano owo va kere monda ngava tara ponze nokumona nondungu donondundu. Mema taga twikire kupwira ngorooro.

Nowa makura ta pwagesa sidira sosisovagani memuwato sedina ekorova. Aso ngasi tuka siruwo songandi makura tasi ka tengura, morwa kapi sa ka gwene evango lyewa oku nasi ka tembera. Aso kwa twikilire kurugana ngoso ano nkenye apa ngasi ka tengura, tasi ya pwizumukire memuwato.

Nowa kwa here kumona nsene mema gana pwililire po pevhu, makura rokukwama ko ta pwagesa nkutji memuwato. Nye nkutji nazo kwa ka tengwire morwa kapi za ka gwene evango lyokukakara. Nowa ta zi tumu sikando sauvali, makura tazi ka reta komurungu gwazo sihako soukuzu. Nowa makura ta diva nye asi mema gana pwire. Nowa ta tumu hena nkutji sikando sautatu, ano azo tazi ka gwana nye evango lyekukutu oku za ka tungire.

Karunga makura ta uyunga naNowa. Age kwa tente asi: ‘Pwaga mo memuwato. Pwagesa epata lyoge nalinye noyikorama.’ Awo kwa kere memuwato siruwo sokupitakana mvhura zimwe. Ose kuvhura tu gazadare ko asi ngapi tupu omu va hefe mokupwaga hena nokukara simpe vazuni!

Genesis 7:10-24; 8:1-17; 1 Peturusa 3:19, 20.