TARA eyi yina kuhoroka nye ngesi. Adamu naEva kuna kuvagusa mosikunino sosiwa saEdeni. Ono diva asi morwasinke?

Morwa awo kwa rugene sininke sosidona sili. Yipo nye Jehova ana kuvatengeka. Wa diva asi sininke musinke sosidona va rugene oAdamu naEva?

Awo kwa rugene sininke esi ga va silikire Karunga. Karunga kwa va tanterere asi kuvhura va lye nondya koyitji yomosikunino. Nye kositji simwe Karunga kwa tente asi va ha si lya, morwa neisi nava fa. Age kwa lipungwilire sitji sina si kare samwene. Amesi twa yi diva asi epuko mokugusa sininke esi sa kara asi kapisi setu, ndi ngapi? Yisinke nye ya horokere?

Ezuva limwe Eva age gelike mosikunino, ezoka kwa mu uyungisire. Gazadara ko tupu kweyi! Alyo kwa tanterere Eva a lye yiyimwa yokositji esi ga va tantera Karunga asi va ha yi lya. Jehova apa ga sitire mazoka, kapi ga ga sitire ga vhure kuuyunga. Eyi kuna kutanta nye asi kweli gumwe gwapeke ogu ga ninkisire ezoka li uyunge. Yilye nye gwina?

Kapisi Adamu. Yipo nye asi ya hepere kukara gumwe govantu vena ga sitire Jehova siruwo sosire komeho a ka site evhu. Vantu owo vaengeli, ano ose kapi tatu vhuru kuvamona. Muengeli gumwe ogu kwa linenepekere. Age kwa tamekere kugazara asi age ngano a kare mupangeli ngwendi Karunga. Age kwa here asi vantu va mu limburukwe age montambo ngano zokulimburukwa Jehova. Age yige muengeli ogu ga ninkisire ezoka li uyunge.

Muengeli ogu ya mu tompokere mokukumbagera Eva. Apa ga mu tanterere asi age nga kara ngwendi Karunga nsene na lya siyimwa, Eva kwa yi pulire. Yipo nye ga lire, naAdamu nage ta li. Adamu naEva kwa nyokere Karunga, ano eyi yiyo nye va zumbaneserere uturo wawo wouwa wosikunino.

Nye ezuva limwe Karunga nga ka ninka hena evhu nalinye li ka kare lina wapa ngwendi sikunino saEdeni. Konyima natu ka lironga asi ngapi omu no vhura kulihameka mo mokuyirugana ngoso. Nye ngesi, tu tareni nye asi yisinke ya horokerere Adamu naEva.

Genesis 2:16, 17; 3:1-13, 24; Ehororo 12:9.