Esimwititi 5: Eparu Lyedigu Tali Tameke
PONZE zosikunino saEdeni, oAdamu naEva kwa gwanekerere nomaudigu gomanzi. Awo kwa hepere kurugana unene yipo va gwane nondya dawo. Mevango lyoyitji yenyango youfuuli, awo kwa mwene mega nononhonho dononzi tadi mene pevango lyawo. Eyi yiyo ya horokere apa oAdamu naEva va nyokere Karunga nokuhageka kukara vakaume Vendi.
Nye mokutwikira ko hena koudona ou, oAdamu naEva kwa tamekere kufa. Diworoka, Karunga kwa va rondwere asi ngava fa nsene ngava lya siyimwa sokositji sina. Yimo, ezuva lyoolyo va lire yipo va tamekere kufa. Ee, ugova musi va kere nawo wokupira kupurakena kwaKarunga!
Vana vaAdamu naEva navenye kwa va retere konyima Karunga age ana pwagesa vakurona vawo mosikunino saEdeni. Eyi kwa tente asi vana vawo nawo va hepere kukurupa nokufa.
Ani ngano asi oAdamu naEva va limburukwire kwaJehova, eparu ngano lya kere lyoruhafo kwawo nokovana vawo. Awo ngano navenye va parukire narunye moruhafo pevhu. Ngano kwato ogu ga kurupire nokuvera ntani nokufa.
Karunga kwa hara asi vantu va paruke narunye moruhafo, yiyo ga tumbwidira asi ezuva limwe ngayi ka kara ngoso. Kapisi evhu nalinye lyelike ngali ka fuura, nye novantu navenye ngava ka kara wokukanguka. Ano navenye pevhu ngava ka kara vakaume wovakwawo ntani nava vaKarunga.
Nye Eva kapi ga kere hena kaume kaKarunga. Yipo nye asi apa ga hampurukire vana vendi, kapi ya mu rerupire. Age kwa zuvhire kukora. Kunyoka Jehova nawa-nawa kwa mu reterere ruhodi rorunzi, ndi kapi ono kuyikwatesa ko?
Adamu naEva kwa kere novana wovagara nava wovakadi wovanzi. Apa va hampurukire mbeli zawo tava mu ruku Kaini. Ano sikwamambeli kwa mu rukire Abeli. Yisinke ya va horokerere? Ono yi diva ndi?
Genesis 3:16-23; 4:1, 2; Ehororo 21:3, 4.
Mapuro
- Ngapi omu lya kere eparu lyaAdamu naEva ponze zosikunino saEdeni?
- Yinke ya tamekere kuhorokera oAdamu naEva, ntani morwasinke?
- Vana vaAdamu naEva, morwasinke ngano nava kurupira nokufa?
- Ngano oAdamu naEva va limburukwire Jehova, ngapi ngano lya kere eparu lyawo neli lyovana vawo?
- Kupira kulimburukwa kwaEva, ngapi omu kwa mu reterere kukora?
- Vana vavali wopomuhowo woAdamu naEva, madina gawo wolye?
- Wolye ava vanona vamwe vana kara mefano?
Mapuro gokugwederera ko
- Resa Genesis 3:16-23 ntani 4:1, 2.
Efingo lyevhu, ngapi omu lya kundamene eparu lyaAdamu?
Edina lyaEva, kutanta asi “Zinyavantu,” morwasinke lya wapera?
Ngapi omu ga likidire Jehova efirosinka kwaAdamu naEva nampili konyima zeyi va zonene?
- Resa Ehororo 21:3, 4.
“Yininke yomuhowo” musinke ono kundindira mokukamona va ka yi guse po?
