NOWA kwa kere namukadendi ntani novana wovagara vatatu. Madina govana vendi kwa kere oSema naHamu naJafeta. Vana wovagara navenye ava kwa kere novakadi vawo. Kutanta asi mepata lyaNowa kwa kere mo vantu ntantatu.

Karunga makura ta ninki Nowa a rugane sininke sosigeni. Age kwa mu tanterere a tunge emuwato lyemunene. Emuwato eli kwa nenepere ngwendi sikepa, nye alyo kwa fene ngwendi epakote lyenene lyere. Karunga kwa tente asi: ‘Lipangera lyomazimo gatatu gokulironda-ronda makura o ture mo nonkondwa.’ Nonkondwa kwa kere daNowa nepata lyendi noyikorama ntani nonondya edi va hepere navenye.

Karunga kwa tanterere hena Nowa a hote emuwato yipo mema ga pire kuzozera mo. Karunga kwa tente asi: ‘Ame tani hanzesa ruhanzo rorunene ni zonagure uzuni naunye. Nkenye ogu nga pira kukara memuwato nga fa.’

Nowa novana vendi kwa limburukwire Jehova nokutameka kutunga. Nye vantu wopeke awo kwa zorere tupu. Awo kwa twikilire kukara wovadona. Kwato ogu ga pulire Nowa apa ga va tanterere asi yisinke nga ka rugana Karunga.

Kutunga emuwato kwa gusire siruwo sosire unene morwa alyo kwa kere lyemunene-nene. Mouhura, konyima zonomvhura dononzi, alyo kwa pwire. Opo Karunga makura ta tantere Nowa a hwilide yikorama memuwato. Karunga kwa tente asi a hwilide yivali momarudi gamwe goyikorama, sosigara nesi sosikadi. Nye marudi gamwe goyikorama, Karunga kwa tanterere Nowa a hwilide ntambali. Karunga kwa tanterere Nowa asi a hwilide hena marudi nagenye goyidira. Nowa kwa rugene nayinye eyi ga mu tanterere Karunga.

Konyima, Nowa nepata lyendi nawo kwa hwililire memuwato. Karunga makura ta zedire evero. Monda omo, Nowa nepata lyendi tava ndindire. Gazadara ko nye asi ngano ove ono kara memuwato lina nawo, to ndindire. Nawa-nawa naku kara ruhanzo ngomu ga tente Karunga ndi?

Genesis 6:9-22; 7:1-9.