TARA Mosesa omu ana kutjwayuka moEgipite. To mono vagara owo vana kumutjida? Ono diva asi morwasinke vana harere kudipaga Mosesa? Tu tareni si nsene kuvhura tu yi dimburure.

Mosesa kwa kulilire membo lyaFarawo, mupangeli gwaEgipite. Age kwa ya kere mugara gonondunge unene hena gomunene. Mosesa ga divire asi age kapisi Muegipite, nye vakurona vendi vene-vene kwa kere Vaisraeli wovapika.

Ezuva limwe, apa ga kere age nomvhura 40, Mosesa kwa tokwere a ka tare asi vantu vendi ngapi omu vana kupindukira. Awo ngava va rugana momudona sili. Ta mono Muegipite ana kutoona Muisraeli gomupika. Mosesa ta tara nakunye, ano apa ga mwene asi kwato ogu ana kumumona, ta toona Muegipite, makura Muegipite ta fu. Mosesa makura ta horeke simpu sendi mevhu.

Ezuva lyokukwama ko, Mosesa ta zi hena a ka tarere po vantu vendi. Age kwa gazarere asi kuvhura a va vatere va pire kukara hena vapika. Nye age ta mono vagara woVaisraeli vavali vana kurwana, makura Mosesa ta tantere ogu ga kere mepuko asi: ‘Yinke eyi ono kutoonena mukweni?

Mugara ta tanta asi: ‘Ogu ana ku ninki o kare mupanguli gwetu yilye? Ove to dipaga nge name moomu ko dipagere Muegipite ndi?’

Mosesa makura ta tukuka. Age ga divire asi vantu vana yi dimburura asi yinke ga rugene Muegipite. Nampili Farawo nage ga yi zuvhire, makura ta tumu vagara va ka dipage Mosesa. Eyi yiyo nye ga tjwayukilire Mosesa a tunde moEgipite.

Mosesa apa ga tundire moEgipite, age kwa zire kosirongo sokoure saMidiyana. Okwina yiko ga ka gwene epata lyaJeturo, nokukwara munwendi gumwe gedina Sipora. Mosesa kwa ya kere musita makura ta kungu nonzwi daJeturo. Age kwa tungire mosirongo saMidiyana nomvhura 40. Ngesi age kwa kere nye nonomvhura 80. Makura ezuva limwe, Mosesa age kuna kutakamesa nonzwi daJeturo, sininke simwe sositetu tasi horoka, esi sa sintire eparu lyaMosesa nalinye. Tu tare asi sininke musinke sositetu esi.

Exodus 2:11-25; Yirugana 7:22-29.