Esimwititi 30: Sihwa sokutwera mundiro
MOSESA kwa wizire dogoro kondundu zaSinayi a ya paparere nonzwi dendi wayi. Oko makura ta mono sihwa sina kutwera, nye kapi sina kuveva po!
Mosesa ta gazara asi: ‘Eli emoneko lyenene. Tanko ni hede ko ni ka tare nawa.’ Apa ga hedere ko, ezwi tali tundu mosihwa, tali tanta asi: ‘Wa ha heda ko. Hutura ko nonkaku, yeeyi evega eli ono sikama kwa pongoka.’ Karunga yige ga uyungire kupitira momuengeli, makura Mosesa ta kudumike sipara sendi.
Karunga makura ta tanta asi: ‘Udigu wombunga zange ezi za kara moEgipite na u mono. Ame tani ka va zowora, ano ove nyove nina kutuma o ka pitisire vantu vange va ka tunde moEgipite.’ Jehova kwa kere mokukareta vantu vendi kosirongo sosiwa unene saKanani.
Nye Mosesa ta tanta asi: ‘Ame nayimwe si. Ngapi omu nani yi rugana eyi? Nye ngano asi tani zi, Vaisraeli makura tava ka pura nge asi: “Yilye ogu ana ku tumu?” Ame ngapi omu nani ka va limburura?’
Karunga ta limburura asi: ‘Ngesi yimo no ka va limburura. “JEHOVA Karunga gwaAbirahamu naKarunga gwaIsaka naKarunga gwaJakopo yige ana tumu nge kweni.” Jehova makura ta gweda ko hena asi: ‘Eli yilyo edina lyange lyanarunye.’
Mosesa ta limburura asi: ‘Nye nsene kapi vana kuyipura apa nani ka va tantera asi nyove ono tumu nge.’
Karunga ta pura asi: ‘Yinke oyo mokuwoko koge?’
Mosesa ta limburura asi: ‘Mpango.’
Karunga ta tanta asi: ‘Zi zugumina pevhu!’ Ano Mosesa apa ga zi zuguminine pevhu, mpango tazi lisitunuka ezoka. Jehova makura ta likida Mosesa sitetu hena nasopeke. Age ta tanta asi: ‘Tura kuwoko koge mokwapa!’ Mosesa ta rugana ngoso, ano apa ga ku pwagesere mo, ako kwa zerere ngwendi yiterengenze! Kuwoko kwa monekere ngwendi kuna kara nehamba lyedona eli ngava tumbura asi yingondwe. Kutunda opo Jehova ta pe Mosesa nonkondo dokurugana sitetu sautatu. Mouhura makura ta tanta asi: ‘Apa no ka rugana yitetu eyi Vaisraeli nava ka pura asi nyame nina ku tumu.’
Konyima zeyi Mosesa ta tengura kembo nokutantera Jeturo asi: ‘Na mu kanderere, sigeni nge ni tengure kekoro lyange moEgipite ni ka tare asi ngapi omu vana kupindukira.’ Jeturo makura ta rekere Mosesa nombaa’a, ano Mosesa ta tameke rugendo rwendi rokutengura koEgipite.
Exodus 3:1-22; 4:1-20.
Mapuro
- Ndundu zina kara mefano edina lyazo yizo yilye?
- Singonona sininke sosigeni esi ga mwene Mosesa apa ga zire kondundu kumwe nononzwi dendi.
- Yinke lya uyungire ezwi eli lya tundire mosihwa sokutwera mundiro, ntani ezwi lyalye lya kere?
- Ngapi omu ga limbwilire Mosesa apa Karunga ga mu tanterere asi ngano age nga pitisira vantu vaKarunga va tunde mo moEgipite?
- Yinke ga tanterere Karunga Mosesa yokuuyunga nsene vantu va mu pura asi yilye ana mu tumu?
- Ngapi ngano omu na vhura Mosesa kulikida asi Karunga yige ga mu tuma?
Mapuro gokugwederera ko
- Resa Exodus 3:1-22.
Sihorokwa saMosesa, ngapi omu asi tu pe ehuguvaro asi nampili tu lizuvhe asi kapi twa wapera mokumokusikisa mo sirugana soukareli, Jehova nga tu vatera?
- Resa Exodus 4:1-20
Erunduruko musinke monkareso zaMosesa lya monekere apa ga ka kere nomvhura 40 moMidiyana, ntani yinke nava vhura kulirongera ko owo vana kukondjera yitumbukiro mombungakriste?
Nampili kuna kutupisura Jehova kupitira mombunga zendi, ehuguvaro musinke nasi tu pa sihonena saMosesa?
