Mosesa kwa pitisilire Vaisraeli va tunde mounkwate waEgipite va ze kondundu zaSinayi, oku Karunga ga ka va pere noveta dendi. Konyima, Mosesa ta tumu vagara 12 va ze undadi mosirongo saKanani. Nye vawo 10 kwa ka tengwire nediviso lyedona. Awo kwa ninkisire vantu va hare kutengura koEgipite. Morwa kupira epuro kwawo, Karunga kwa tengekere Vaisraeli mokuvaninka va kununuke momburundu nomvhura 40.

Mouhura, Josuwa kwa mu horowere a pitisire Vaisraeli va hwilire mosirongo saKanani. Mokuvavatera va guse sirongo, Jehova kwa rugene yitetu. Age kwa ninkire mukuro gwaJorodana gu hageke kupupa, ntani makuma gaJeliko ga gwe, ntani ezuva li sikame ndjikiti ezuva nalinye. Konyima zonomvhura ntazimwe, Vakanani kwa va gusire sirongo.

Kutunda pwaJosuwa, Israeli kwa zi pangerere vapanguli nomvhura 356. Tatu lirongo kuhamena wovanzi vawo, kutura ko Baraka naNgidiyona naJefuta naSimisoni ntani naSamwere. Tatu resa hena kuhamena vakadi ngwendi Rahabu naDebora naJayeli naRutu naNaomi ntani Delira. Mwanayinye, Ruha RWAUTATU kwa kwatakana histoli zonomvhura 396.