TO MONO asi yinke yina horoka? Mumati ana parura nzwigona kerundu. Erundu kwa ya kwete nzwigona nokuzitwara li ka lye. Nye mumati kwa li sikwire, makura ta ka hokora nzwigona mokana kerundu. Ano erundu apa lya di mu vyukire, mumati ta li di kwata nokulitoona dogoro tali fu! Posikando nasopeke age kwa parwire nzwi kwanyime. Nani kapisi mumati gependa ogu? Ono diva asi yige yilye?

Ogu kuna kara Ndafitagona. Age kwa tunga mositata saBeterehema. Ozinakuru kwa kere Obedi, muna goRutu naBowasa. To va diworoka? Ano oguhwe vaNdafita Isayi. Ndafita kukunga nonzwi doguhwe. Ndafita kwa mu hampurukire nomvhura 10 konyima zapa Jehova ga horowere Sauru a kare hompa.

Siruwo tasi siki apa Jehova ana tantere Samwere asi: ‘Gusa magadi gamwe gokulikerera o ze kembo lyaIsayi moBeterehema. Ame kuna horowora munwendi gumwe a kare hompa.’ Samwere apa ana mono mbeli zaIsayi Eliyaba, ta ligazara asi: ‘Ahuru yige googu ga horowora Jehova.’ Nye Jehova ta mu tantere asi: ‘Wa ha tara kosipa sosiwa nomusika gomure. Kapi nina mu horowora a kare hompa.’

Isayi makura ta zigida munwendi Abinadabu nokumureta kwaSamwere. Nye Samwere ta tanta asi: ‘Nogu si kapisi yige ana horowora Jehova.’ Kutunda opo Isayi ta reta munwendi Sama. Samwere ta tanta asi: ‘Nogu si kapisi yige ana horowora Jehova.’ Isayi ta reta vana vendi wovagara ntambali kwaSamwere, nye Jehova kwato ogu ga horowere po. Samwere ta pura asi: ‘Ava huru vana woge wovagara vaava ndi?’

Isayi asi: ‘Pweli gumwe hena gomunona po. Nye kweli kononzwi, ana kukalisa.’ Ndafita apa vana mu reta, Samwere ta mono asi age mumatigona gomuwa mosipa. Jehova ta tanta asi: ‘Yige googo. Mu tjira magadi o mu gwaveke.’ Eyi yiyo ana rugana Samwere. Siruwo tasi wiza apa nga ka kara Ndafita hompa gwaIsraeli.

1 Samwere 17:34, 35; 16:1-13.