KONYIMA zapa ga dipagere Ndafita Golyata, mukurona govakwayita vaIsraeli, Abineli, ta mu reta kwaSauru. Sauru ta hafere sili Ndafita. Ta mu ninki a kare mukurona govakwayita vendi nokumutwara a ka tunge kembo lyahompa.

Vakwayita apa va ka tengwire kokurwisa Vafilisiti, vakadi tava dimbi asi: ‘Sauru kwa dipaga mayovi, nye Ndafita mayovi nomurongo.’ Eyi tayi retere Sauru mfudu, morwa Ndafita kuna kumupa efumano lyenene kupitakana Sauru. Nye munwaSauru Jonatana kapi ana kara nomfudu. Age ta hara Ndafita unene, ano Ndafita nage ta hara Jonatana. Mouvali wawo makura tava litumbwidire asi ngava kara nkenye apa uholi.

Ndafita kwa diva kusika nawa siumba, ano Sauru kwa hara musika ogu a siki. Nye ezuva limwe mfudu zaSauru tazi mu ninkisa a rugane sininke sosidona unene. Ndafita age kuna kusika siumba, Sauru ta gusa egonga nokulizuguma, oku ta tanta asi: ‘Ame tani twire Ndafita kekuma.’ Nye Ndafita ta tembe, ano egonga tali sekuna. Konyima Sauru ta sekuna hena Ndafita negonga lyendi. Ndafita makura ta diva asi ngesi ga kona kuvangarara.

To diworoka etumbwidiro lina ga tulire po Sauru? Age kwa tente asi nga pa munwendigomukadi a kare mukadamugara ogu na dipaga Golyata. Sauru makura ta tantere Ndafita asi kuvhura a guse munwendi Mikali, nye pomuhowo ga kona kudipaga Vafilisiti wononkore 100. Yi gazadara ko tupu eyi! Sauru ta huguvara asi Vafilisiti nava dipaga Ndafita. Nye awo kapi va mu dipagere, makura Sauru ta gava munwendi a kare mukadaNdafita.

Ezuva limwe Sauru ta tantere Jonatana novakareli vendi navenye asi ana hara kudipaga Ndafita. Nye Jonatana ta tantere oguhwe asi: ‘Mwa ha guma Ndafita. Age kutupu eyi ga mu zona. Nye nkenye yimwe ga rugana kwa kara yokumuvatera unene. Age kwa zumbilire mwenyo gwendi a dipage Golyata, ano apa mwa yi mwene, tomu hafa.’

Sauru ta purakene munwendi, makura ta tumbwidire asi kapi na guma Ndafita. Ndafita tava ka mu tengwida, makura ta karere hena Sauru membo lyendi ngamoomu mwanare. Nye ezuva limwe, Ndafita age kuna kusika musika, Sauru ta zuguma hena Ndafita egonga lyendi. Ndafita ta tembe, ano egonga tali livete mekuma. Esi ngesi kuna kara sikando sautatu! Ndafita makura ta diva nye asi ngesi ga kona kutjwayuka!

Masiku ogo Ndafita ta zi kembo lyendi. Nye Sauru ta mu tumine vagara vamwe va ka mu dipage. Mikali ana diva asi yinke vana hara kurugana oguhwe. Makura ta tantere mugara gwendi asi: ‘Nsene kapi ono kuduka naina, mungura ono fu.’ Masiku ogo Mikali ta vatere Ndafita a pitire pekende nokutjwayuka. Posiruwo sokusika ponomvhura ntambali Ndafita ta dukagana tunda evango a ze evango yipo asi Sauru ga ha mu gwana.

1 Samwere 18:1-30; 19:1-18.