WA DIVA mukadi gomuwa ogu ana kuwiza a gwanekere naNdafita ndi? Edina lyendi yige Abigayili. Age nondunge, ntani kuna kukondera Ndafita mokukarugana sininke sosidona. Nye komeho zokulironga eyi, tu tareni asi yisinke yina kuhorokera Ndafita mosiruwo esi.

Ndafita apa ga dukire Sauru, ta ya vanda mekombombo. Vakuru vendi nepata lyendi nalinye tava ya lipakerere nendi moomu. Vantu wokusika po-400 tava lipakerere nendi, ano Ndafita makura ta kara mpitisili zawo. Ndafita makura ta zi kwa hompa gwaMowaba nokutanta asi: ‘Na kanderere, siga otate nonane va kare noge dogoro ngani dive asi yisinke ngayi horokera nge.’ Konyima Ndafita novantu vendi tava tameke kuvanda monondundu.

Konyima zeyi, Ndafita yipo nye ana kugwanekera naAbigayili. Mugara gwendi Nabali ngawo za weka mukunda. Age kwa kara nononzwi 3 000 ntani noyikombo 1 000. Nabali mugara gonyanya. Nye mukadendi Abigayili muwa sili unene. Age hena ga diva asi ngapi omu na rugana youhunga. Sikando simwe ta parura epata lyendi. Tu tareni asi ngapi.

Ndafita novagara vendi kwa ruganene Nabali uwa. Awo ngava vatere mokukunga nonzwi dendi. Makura ezuva limwe Ndafita ta tumu vagara vendi vamwe va ka pure Nabali mbatero. Nontumi daNdafita tadi ya siki pwaNabali age novakwafi vendi kuna kukurura nonzwi dawo nohuki. Alyo kuna kara ezuva lyosipito, ano Nabali kuna kara noyininke yoyinzi yoyiwa yokulya. Nontumi daNdafita makura tadi tanta asi: ‘Ose kwa ku rugana momuwa. Kapi twa vaka nampili nzwi zoge zimwe, nye kwa kuvatera mokudikunga. Ngesi tuna kanderere, tu pa ko nondya.’

Nabali ta tanta asi: ‘Ame kapi nani gava nondya dange kovantu ngwendi nyone.’ Age ta uyunga nonyanya, nokutanta yininke yoyidona kuhamena Ndafita. Vagara ava apa va ka tengwire nokuyayitantera Ndafita, Ndafita ta handuka unene. Ta tantere vantu vendi asi: ‘Dwareni nomfuro deni!’ Tava pagwire monzira va ze va ka dipage Nabali novantu vendi.

Muntu gwaNabali gumwe, ogu ga zuvhire nonkango donyanya edi ga uyungire Nabali, ta tantere Abigayili eyi ya horokere. Poopo Abigayili ta wapaike nondya. Ta di pereke poyindongi nokupagwira monzira. Apa ana gwanekere naNdafita, ta humburuka posindongi sendi, ta nyongama nokutanta asi: ‘Na ku kanderere tate, wa ha mu pakera mbili mugara gwange Nabali. Age mugova ntani kurugana yininke yougova. Uhwi ou nina reta. Na kanderere u tambura makura o tu gusire po kweyi yina horoka.’

Ndafita ta limburura asi: ‘Ove mukadi gomunongo. Ono kondere nge kokudipaga Nabali ni mu rugwide kuwoko konyanya zendi. Zende nye kembo mombili.’ Konyima, apa Nabali ana fu, Abigayili ta kara gumwe govakadi vaNdafita.

1 Samwere 22:1-4; 25:1-43.