Esimwititi 63: Hompa Saromo gonondunge
SAROMO apa ana zi mouhompa age mudinkantu. Age kwa hara Jehova, ntani ta kwama mapukururo gomawa aga va mu pere oguhwe Ndafita. Jehova ta hafere Saromo, makura masiku gamwe ta mu uyungisa monzodi asi: ‘Saromo, yinke eyi ono hara nani ku pa?’
Saromo makura ta limburura asi: ‘Jehova Karunga gwange, ame simpe ni munona ntani kapi na diva kupangera. Pe nge nye ukonentu ni pangere vantu woge mouhunga.’
Jehova ta hafere eyi ana pura Saromo. Ta tanta asi: ‘Morwa ono hundire ukonentu, kapisi mwenyo gomure ndi ugawo, tani ku pe ukonentu nonondunge dononzi dokupitakana ava va hova koge. Tani ku pe hena eyi ono dili kuhundira, ugawo nefumano.’
Konyima zosiruwogona vakadi vavali tava wiza kwaSaromo noudigu wounene. Gumwe gwawo ta tanta asi: ‘Mukadi ogu name membo limwe tupu twa kara. Ame kwa hampuruka munona gomugara, ano konyima zomazuva gavali, nage ta hampuruka munona gomugara. Ano masiku gamwe munwendi ta fu. Nye apa na rere, age ta tura munwendi gokufa pwange, makura ta gusa munwange. Apa na pinduka, ni tare munona ogo gokufa, tani mono asi kapisi munwange.’
Ogo mukadi gumwe ta tanta asi: ‘Hawe! Munona gomwenyo gwange, gokufa yige gwendi!’ Mukadi gomuhowo ta limburura asi: ‘Hawe! Gokufa yige goge, gomwenyo gwange!’ Ngesi yimo vana kulitatana vakadi ava. Yinke na rugana Saromo?
Ta tumine rufuro, ano apa vana ru reta, ta tanta asi: ‘Teteni munona gomwenyo pavali, ano nkenye mukadi mu mu pe ko harufa.’
Ozina wokumureta tava lili asi: ‘Hawe! Mwa ha mu dipaga ogo munona. Mu gaveni tupu kwendi!’ Nye ogo mukadi mukwawo asi: ‘Mwa ha mu gava kwankenye gumwe gwetu; mu teteni pavali.’
Mouhura Saromo makura ta uyunga asi: ‘Mwa ha mu dipaga ogo munona! Mu gaveni komukadi gomuhowo. Yige zina gokumureta.’ Saromo ana yi diva eyi morwa zina gokureta munona kwa hara munwendi sili mokuninka asi ga liwapaikilire kumugava komukadi peke yipo asi va ha mu dipaga. Vantu apa vana zuvhu asi ngapi Saromo omu ana gusa po udigu, tava hafa mokukara nahompa gonondunge ngoso.
Mosiruwo sepangero lyaSaromo, Karunga ta tungike vantu mokuninka evhu li mene unene rukokotwa nonombuto nomandjembere nomakuzu ntani nonondya hena dimwe. Vantu tava dwara yikoverero yoyiwa ntani tava tungu momambo gomawa. Navenye tava gwana yininke yoyiwa yoyinzi.
1 Vahompa 3:3-28; 4:29-34.
Mapuro
- Yinke ana pura Jehova Saromo, ntani age ngapi omu ana limburura?
- Morwa age ana hafere ehundiro lyaSaromo, yinke ana tumbwidire Jehova mokumupa?
- Udigu musinke wounene vana reta vakadi vavali kwaSaromo?
- Moomu ono kumona mefano, ngapi omu ana kukohonona po Saromo udigu?
- Ngapi omu lya fana epangero lyaSaromo, ntani morwasinke
Mapuro gokugwederera ko
- Resa 1 Vahompa 3:3-28.
Vagara ava va pa yitumbukiro mombunga zaKarunga naina, yinke nava vhura kulirongera ko kononkango dokomutjima daSaromo edi da kara mo-1 Vahompa 3:7?
Ehundiro lyaSaromo, ngapi omu ali kara sihonena sosiwa soyininke youhunga yokukanderera?
Ekohononopo lyaSaromo lyonompata pokatji kovakadi vavali kutupa ehuguvaro musinke kuhamena upangeli wokomeho waSaromo Gomunene, Jesus Kristusa?
- Resa 1 Vahompa 4:29-34.
Ngapi omu ga limbwilire Jehova ehundiro lyaSaromo lyoukonentu?
Mokutara keliturumo eli va tulire po vantu mokuzuvha ukonentu waSaromo, nkareso musinke natu kara nazo kelirongo lyoNonkango daKarunga?
