ONO diva asi yinke ana kuuyunga ogu mukadona? Age kuna kutantera mukadi ogu kuhamena muporofete gwaJehova Elisa, noyininke yoyiwa eyi a mu ruganesa Jehova. Mukadi ogu kapi ga diva Jehova morwa age kapisi Muisraeli. Tu tareni nye asi morwasinke ana karere mukadona ogu membo lyogu mukadi.

Mukadi kuna kara Musiliya. Mugara gwendi Namani, mupitisili govakwayita woVasiliya. Vasiliya kwa ka kwete mukadona ogu goMuisraeli, makura tava mu reta kwa mukadaNamani a ya kare mukareli gwendi.

Namani kwa kara nouvera woudona ou ava tumbura asi yingondwe. Uvera ou kuvhura kuninka nampili nyama zomuntu zimwe zi gwe ko. Eyi yiyo nye ana kutantera mukadona mukadaNamani asi: ‘Ngano hekurwange ta zi komuporofete gwaJehova moIsraeli. Gwina ngano ta ka mu verura yingondwe yendi.’ Konyima makura tava ya yi tantere eyi mugara gomukadi ogu.

Namani kuna hara unene kuveruka; makura ta tokora a ze koIsraeli. Apa ana ka sika, makura ta zi kembo lyaElisa. Elisa ta tumu mukareli gwendi a ka tantere Namani asi a ze nokukalikuhwa momukuro gwaJorodana yikando yitano-nayivali. Eyi tayi handukisa Namani unene, makura ta tanta asi: ‘Nomukuro dokosirongo setu da pitakana nadinye domoIsraeli!’ Konyima zokutanta eyi, Namani ta ka za.

Nye mukareli gwendi gumwe ta mu tantere asi: ‘Munekuto, ngano Elisa ka ku tantere o rugane yoyidigu, ngano ono yi rugana. Yinke tupu eyi ono kupira kulikuhwa ngomu ana tanta?’ Namani ta purakene komukareli gwendi nokuza a ka litupike momukuro gwaJorodana yikando yitano-nayivali. Apa ana yi rugana, nyama zendi tazi nkondopara ntani tazi kanguka!

Namani ta hafa unene. Ta tengura kwaElisa nokumutantera asi: ‘Ngesi nina diva asi Karunga gomoIsraeli gelike Karunga gosili pevhu nalinye. Na kanderere, tambura nye ou uhwi.’ Nye Elisa ta limburura asi: ‘Hawe, kapi nani tambura uhwi owo.’ Elisa ana diva asi tayi kara epuko kwendi mokutambura uhwi owo, morwa Jehova yige ga verwire Namani. Nye mukareli gwaElisa, Gehasi, ta liharere mauhwi ogo.

Eyi yiyo nye ana rugana Gehasi. Namani apa ana zi, Gehasi ta mu sikura dogoro ta ka mu gwana. Gehasi ta tanta asi: ‘Elisa kuna tumu nge ni ya ku tantere asi ana hepa mauhwi goge gamwe yipo a ka pe vakwawo vamwe vana wiza va ya mu tarere po.’ Eyi kuna kara yimpempa. Nye Namani kapi ana diva asi eyi yimpempa; makura ta pe Gehasi yininke yimwe.

Gehasi apa ana tengura kembo, Elisa ana diva asi yinke ana rugana. Jehova ana yi mu tanterere. Ta tanta asi: ‘Morwa ove ono rugana udona ou, yingondwe yaNamani tayi ku wizire.’ Poopo makura tayi mu wiza!

Yinke natu lirongera ko kweyi nayinye? Pomuhowo, ose twa kona kukara ngwendi mukadonagona nokuuyunga kuhamena Jehova. Ayo kuvhura kureta uwa wounene. Sauvali, walye atu linenepeke ngomu ga linenepekere Namani pomuhowo, nye twa kona kulimburukwa kovakareli vaKarunga. Ano sautatu, ose nokukumbagera si ngomu ga rugene Gehasi. Kapi tatu lirongere ko nani yoyinzi kokuresa Bibeli?

2 Vahompa 5:1-27.