TARA yirugana eyi vana kurugana apa. Vaisraeli kuna kutunga makuma gaJerusarema. Hompa Nebukadenesara apa ga zonagwire Jerusarema nomvhura 152 komeho zeyi, age kwa gandangere makuma nokuhwika marungavero gositata. Pomuhowo Vaisraeli apa va ka tengwire kembo va tunde koBabironi, kapi va tungwilire makuma.

Omu ono kugazara ove, ngapi omu va lizuvhire vantu nomvhura edi nadinye mokutunga mositata sawo sa hana makuma gokusikundurukida? Awo kapi va lizuvhire asi vana kara nepopero. Nonkore kuvhura kuhwilira noureru-reru nokuvahomokera. Nye ngesi mugara ogu Nehemiya kuna kuvatera vantu va tungurure hena makuma. Ono diva asi yilye Nehemiya?

Nehemiya Muisraeli ogu ana kutunda mositata saSusa, omu va tunga oMoredekayi naEsitera. Nehemiya nga rugana mombara zahompa, ano nampo ga kere kaume gomuwa gwaMoredekayi nahompakadi Esitera. Nye Bibeli kapi za tanta asi Nehemiya nga ruganene mugara gwaEsitera, hompa Serekesesi. Age nga ruganene hompa ogu ga kweme ko, hompa Aretaserekesesi.

Diworoka, Aretaserekesesi yige hompa gomuwa ogu ga pere Esira yimaliva nayinye yina a tware koJerusarema nokukawapukurura ntembeli zaJehova. Nye Esira kapi ga ka tungwilire makuma gositata aga ga gwira-gwire. Tu tareni asi ngapi omu ya gendere yipo Nehemiya a ya rugane sirugana esi.

Apo kwa pitire po nomvhura 13 kutunda apa Aretaserekesesi ga pere Esira yimaliva a ka wapeke ntembeli. Nehemiya ngesi yige mukurona govapindi vahompa Aretaserekesesi. Eyi kutanta asi age kupa hompa vhinyu zendi, nokutara asi kwato ogu ana kuhara kupa hompa uhungu. Aso sirugana somulyo unene.

Ezuva limwe, ekoro lyaNehemiya Hanani novagara vamwe wokosirongo saIsraeli tava wiza va ya dingure Nehemiya. Tava mu tantere kuhamena maudigu aga vana kugwanekera nago Vaisraeli, ntani ngapi omu makuma gaJerusarema simpe ga rangamene pevhu. Eyi tayi guvisa Nehemiya unene, makura ta yi kanderere kwaJehova.

Ezuva limwe hompa ta mono asi Nehemiya ana guwu, makura ta pura asi: ‘Yinke ono guvire?’ Nehemiya ta mu tantere asi morwa Jerusarema kuna kara momukaro gomudona ano makuma ga tekauka. Hompa ta pura asi: ‘Yinke eyi ono hara?’

Nehemiya ta tanta asi: ‘Siga nge ni ze koJerusarema, yipo ni ka tungurure makuma.’ Hompa Aretaserekesesi munambili. Ta tanta asi Nehemiya kuvhura a ze, ntani ta mu vatere mokugwana yitji a ka ruganese ko metungo. Nehemiya tupu ana ya siki moJerusarema, ta tantere vantu kuhamena magano gendi. Awo tava hafere magano ogo, tava tanta asi: ‘Tu tamekeni kutunga.’

Nonkore doVaisraeli apa dina kumona ekuma kuna kukura, tadi tanta asi: ‘Ngatu za, tu ka va dipage, nokukahageka yirugana yetungo.’ Nye Nehemiya ta yi zuvhu eyi, makura ta pe vatungi nomfuro nonomukove. Ta tanta asi: ‘Mwa ha tjira nonkore detu. Rwireni vakweneni novana vendi novakadi veni nomambo geni.’

Vantu vana kara noupenda. Tava wapaike yirwiso yawo mutenya nomasiku, ntani tava twikire kutunga. Momazuva tupu 52 makuma taga pu kutunga. Ngesi vantu tava lizuvhu nye vana kara nepopero mositata. Nehemiya naEsira tava rongo vantu veta zaKarunga, makura vantu tava hafa.

Nye yininke kapi yina fana ngomu ya kere komeho Vaisraeli va va tware koBabironi ngovanadorongo. Hompa gwaPeresiya kupangera vantu ntani awo ngava mu karere. Nye Jehova kwa tumbwidilire asi age nga va tumina hompa gomupe, ntani asi hompa gomupe ogo nga reta mbili kovantu. Yilye hompa ogu? Ngapi omu nga reta mbili pevhu? Nomvhura dokusika po-450 tadi piti po komeho zokuyalironga ko yoyinzi hena kuhamena eyi. Makura tapa kara ehampuruko lyomukeke lyomulyo. Nye olyo esimwititi nalyopeke.

Nehemiya magaununo 1 dogoro 6.