Esimwititi 93: Jesus ta kutike vantu wovanzi
SININKE sosidona kwa horokere. Johanesa Mukuhwi vana mu dipaga. Herodiyasa, mukadahompa, kapi ga mu here. Makura ta yi mu tompoka mokuninka hompa a tetese ko mutwe gwaJohanesa.
Jesus apa ana yi zuvhu, ta guwu unene. Ta zi kevega lya hana vantu, a ka likarere. Nye vantu tava mu sikura. Jesus apa ana mono mbunga, ta zi fire nkenda. Makura ta uyunga nawo kuhamena uhompa waKarunga, ntani ta verura vaveli vawo.
Ngurova ozo varongwa vendi tava wiza kwendi nokutanta asi: ‘Nare lina toko, ntani eli hena evega lyomapuku. Siga vantu va ze momukunda gopopepi yipo va ka lirandere nondya.’
Jesus ta limburura asi: ‘Nayimwe si nava zira. Nyone nomu va pa sakulya va lye.’ Jesus ta tara Filipusa nokumupura asi: ‘Kupi oku natu ka randa nondya dokuvhura kukutika vantu navenye ava?’
Filipusa ta limburura asi: ‘Tayi pura yimaliva yoyinzi unene mokuranda nondya asi nkenye gumwe a makere ko nakauke.’ Andiliyasa ta tanta asi: ‘Mumati ogu kuna kara nonomboroto ntano ntani nonomfi mbali. Nye ayo kutupu eyi nayi kwafa kovantu navenye ava.’
Jesus ta tanta asi: ‘Tantereni mbunga zi hingire powayi.’ Makura ta pandura Karunga konondya odo, nokudibamagura. Kutunda opo, varongwa tava gavagere mboroto nonomfi kovantu navenye. Apo kuna kara po vagara 5 000, ntani nomayovi gomanzi govakadi novanona. Navenye tava li dogoro vana kuta. Ano varongwa apa vana pongaike yihupwa, yikumba 12 tayi zura!
Jesus makura ta ninki varongwa vendi va ronde mowato nokuruta Efuta lyaGalireya. Masiku kakundungu gomunene ta pinduka, ano mankumpi taga yeragura wato wa za oku wa za oku. Varongwa tava tukuka unene. Makura pokatji komasiku, tava mono muntu ana kugenda pomema a wize kwawo. Tava takuma morwawoma, hena kapi vana diva asi yinke vana kumona.
Jesus ta tanta asi: ‘Gwa ha mu pwaga. Nyame!’ Awo simpe kapi vana hara kuyipura. Peturusa makura ta tanta asi: ‘Hompa, nsenesi nyove, ninka nge name ni gende pomema ni wize koge.’ Jesus ta limburura asi: ‘Wiza!’ Peturusa makura ta tundu mowato nokugenda pomema! Makura ta tukuka nokutameka kudama, nye Jesus ta mu parura.
Konyima Jesus ta ya kutike hena mayovi govantu. Sikando esi age ta yi rugana kupitira monomboroto ntambali notumfi tongandi tupu. Nosikando esi hena navenye tava kuta. Nani nkedi ezi nga tekura Jesus vantu kapisi nkedi zongwa? Apa nga pangera ngahompa gwaKarunga ose kapi ngatu kara nohepero zokulivera nkenye eyi!
Mateusa 14:1-32; 15:29-38; Johanesa 6:1-21.
Mapuro
- Sininke musinke sosidona sa horokere Johanesa Mukuwi, ntani ngapi omu ana lizuvhu Jesus?
- Ngapi omu ana kutike Jesus mbunga ezi zina mu kwama, ntani nondya dokuhura kupi dina hupu po?
- Morwasinke vana tukukire varongwa masiku, ntani yinke yina horoka kwaPeturusa?
- Ngapi omu ana kutike Jesus mayovi govantu sikando sauvali?
- Morwasinke ngayi ka karera uwa apa nga pangera Jesus evhu ngaHompa?
Mapuro gokugwederera ko
- Resa Mateusa 14:1-32.
Sihorokwa somwaMateusa 14:23-32, yisinke asi tu likida kuhamena untu waPeturusa?
Ngapi omu aga likida matjangwa asi Peturusa ga kulire pampepo nokusiga nkareso zendi zokudira kugazara tanko?
- Resa Mateusa 15:29-38.
Ngapi omu ga likidire Jesus efumadeko koyigava yokutunda koGuhwe?
- Resa Johanesa 6:1-21.
Ngapi omu nava vhura Vakriste vanaina kukwama sihonena saJesus kombinga zomapangero?
