TARA Jesus apa ana dingire kamatigona aka mawoko gendi. To mono nawa-nawa asi Jesus kufira mbili vanonagona. Vagara ava vana kutara kuna kara vapositoli vendi. Yinke ana kuvatantera Jesus. Tu tareni.

Jesus novapositoli vendi ntani tupu vana kutunda korugendo rorure. Monzira omo vapositoli kwa litatanene-tatanene. Konyima zorugendo, Jesus makura ta va pura asi: ‘Yinke muna litatana monzira?’ Mousili, Jesus ana diva asi yinke vana litatana. Nye age ta pura a tare nsene vapositoli nava mu tantera.

Vapositoli kapi vana kulimburura, morwa monzira awo kuna litatana asi yilye gomunene po mokatji kawo. Vapositoli vamwe kuna hara kukara nomulyo unene kupitakana vakwawo. Ngapi omu Jesus ana va tantere asi kapi ya vyuka yokuhara kukara gomunene po?

Ta zigida kamatigona, nokukasikameka komeho zawo navenye. Makura ta tantere vasikuli vendi asi: ‘Ame kuna hara mu dive nawa-nawa asi, nsene mu dira kulitezurura, mu dire kufana vanona, ngano kapi ngomu hwilira moUhompa waKarunga. Munene po mouhompa googu a kara ngwendi munona ogu.’ Ono diva asi morwasinke Jesus ga yi tanterere eyi ndi?

Vanonagona kapi ava lipakere sinka sokuhamena kukara vanene ndi nomulyo kupitakana vakwawo. Vapositoli yipo nye va hepere kulironga va kare ngwendi vanona monkedi ezi nokupira kulitatana kukara munene ndi gomulyo po.

Pana kara hena yikando yimwe apa Jesus ana kulikida asi ngapi omu a fire vanonagona mbili. Konyima zomakwedi gongandi vantu vamwe tava reta vana vawo va ya mone Jesus. Vapositoli tava hetekere ko kuvakondera. Nye Jesus ta tantere vapositoli vendi asi: ‘Sigeni vanona va wize kwange, mwa ha va kava, morwa vangoso yiwo wa hamena uhompa waKarunga.’ Jesus makura ta umbilikida vanona momawoko gendi, ta va tungike. Nani kapisi yiwa mokudiva asi Jesus kwa hara vanonagona?

Mateusa 18:1-4; 19:13-15; Marukusa 9:33-37; 10:13-16.