SIRUWOGONA tupu konyima zokuverura vahundageli vavali wovatwiku, Jesus ta wiza pokamukundagona pepi naJerusarema. Ta tantere varongwa vendi vavali asi: ‘Zendeni momukunda ogu, makura nomu ka gwana sindongiligona. Ka si ditureni mu ka si rete kwange.’

Sindongi apa vana si reta kwendi, Jesus ta rondo po. Ta gendere po a ze koJerusarema ezi zina kara sinano sosisupi. Apa ana siki pepi nositata, mbunga zovantu zonene tazi wiza zi gwanekere nage. Sinzi sawo tava gusa yikoverero yawo nokuyizara monzira. Vamwe tava tete nomutayi donombare. Tava di tura nado monzira, nokuzigira asi: ‘Karunga a tungike hompa ogu ana wiza medina lyaJehova!’

Mosiruwo sanare moIsraeli, vahompa wovape ngava rondo posindongiligona nokuhwilira moJerusarema va lilikide vene kovantu. Eyi yiyo ana kurugana Jesus. Ano vantu ava kuna kulikida asi vana hara Jesus a kare hompa gwawo. Nye kapisi vantu navenye vana mu hara. Eyi tatu yi mono kweyi yina horoka apa Jesus ana zi kontembeli.

Kontembeli Jesus ta verura vantu wovatwiku noyirema. Vanonagona apa vana yi mono eyi, tava zigire va tange Jesus. Nye eyi tayi handukisa vapristeli, makura tava tantere Jesus asi: ‘To zuvhu tupu eyi vana kutanta ava vanona?’

Jesus ta limburura asi: ‘Nhi, tani yi zuvhu. Kapi mwa resa moBibeli apa za tanta asi: “Motuna tovanonagona yimo nga pwagesa Karunga mahamberero?” ’ Vanona makura tava twikire kuhamberera hompa gwaKarunga.

Ose tuna hara kukara ngovanona vena, ndi ngapi? Vantu vamwe kuvhura va hetekere ko kutuhagekesa kuuyunga kuhamena uhompa waKarunga. Nye ose tatu twikire ngorooro kutantera wopeke kuhamena yininke yoyiwa eyi nga ka ruganena Jesus vantu.

Jesus apa ga kere pevhu, kapi sa kere siruwo sendi sokutameka kupangera ngahompa. Siruwoke ngasi sika mo siruwo esi? Varongwa vaJesus vana hara kuyidiva. Eyi yiyo tuna ku ka resa kutunda apa.

Mateusa 21:1-17; Johanesa 12:12-16.