Mezuva lyautatu konyima zonomfa dendi, Jesus kwa mu vhumbwire. Mezuva olyo ta monekere vasikuli vendi yikando yitano yokulisiga-siga. Jesus kwa twikilire kuvamonekera mazuva 40. Makura kutunda opo, ta zeruka a ze meguru, awo varongwa vendi vamwe kuna kutara. Konyima zomazuva murongo, Karunga ta poomwene mpepo zokupongoka povasikuli vaJesus ava va ndindilire moJerusarema.

Konyima, nonkore daKarunga tadi ninki vapositoli va va zugumine modorongo, nye muengeli ta va mangurura mo. Murongwa Sitefanesa kwa mu dipagere varwanesi nomamanya. Nye tatu lirongo asi ngapi Jesus omu ga horowere murwanesi gumwe ogu a kare mukareli gwendi gokulikarera, ano age kwa ya kere mupositoli Paurusa. Kutunda opo, konyima zonomvhura ntatu noukahe kutunda ponomfa daJesus, Karunga ta tumu mupositoli Peturusa a ka zuvhisire Koroneliusa nembo lyendi ava va pilire kukara Vajuda.

Konyima zonomvhura 13, Paurusa ta tameke rugendo rwendi rokuzuvhisa rokuhova. Morugendo rwendi rwauvali, Timoteusa kwa zire naPaurusa. Tatu lirongo asi ngapi oPaurusa nava ngava gendi nage va kere noyiruwo yoyiwa unene yoyinzi mokukarera Karunga. Mouhura, Paurusa tava mu tura modorongo moRoma. Konyima zonomvhura mbali tava mu mangurura, nye tava mu tura hena modorongo nokumudipaga. Yihorokwa yomoRUHA 7 kwa horokere mosiruwo sokusika ponomvhura 32.