Esimwititi 112: Sikepa tasi tekere posirudi
TARA! sikepa moudigu sina kara! Aso kuna kutekauka moyintau! To mono vantu ava vana vataukire momema? Vamwe nare kuna kuyasika konontere. Ogwina kuna kara Paurusa ndi? Tu tareni asi yinke yina kumuhorokera.
Diworoka, Paurusa kwa kere munadorongo moKesareya nomvhura mbali. Makura age novanadorongo vamwe tava va rondeke mosikepa, va vyuke koRoma. Apa vana ya piti posirudi saKereta, emukundungu lyemunene tali va gwana. Mpepo tazi pepe sili unene dogoro vagara kapi vana kuvhura kupirura sikepa. Mutenya kapi vana kumona ezuva ano masiku kapi vana kumona nombungururu. Mouhura, konyima zomazuvagomanzi, owo vana kara mosikepa tava zumbanesa ehuguvaro nalinye lyokuvhura kuparuka.
Paurusa makura ta sikama nokutanta asi: ‘Kutupu gumwe gweni ogu na zumbanesa eparu lyendi; ntudi sikepa selike nasi zumbana. Morwa masiku ganaina muengeli gwaKarunga kuna wizire nge nokutanta asi, “Wa ha tjira, Paurusa! Kosipara sahompa gwaRoma yiko tupu ngo ka sikama. Ano Karunga nga parura navenye ava vana kugenda nove mosikepa.” ’
Mezuva lyou-14 kutunda apa lya varekere ekundungu, pokatji komasiku vanasikepa tava mono asi kuna kuheda pepi nonontere! Awo tava zuguma yikwateso yosikepa, morwa kutjira asi nampo nava litoona momamanya momundema. Ngurangura zokukwama ko tava mono ezenga. Tava tokora asi va heteke kuza nosikepa dogoro konontere kwene.
Apa vana siki pepi nonontere, sikepa tasi hwilire momuheke nokuhega. Mankumpi makura taga tameke kulitoona mwaso, ano sikepa tasi tameke kutavauka moyintau. Mupitisili govakwayita ogu ga va kungira ta tanta asi: ‘Namuvenye one mwa diva kuzoga hoveni kuvatukira momema nokuzogera konontere. Ano wokukwama ko mu va kwame, nokukwata yintau yosikepa mu gendere po.’ Eyi yiyo vana rugana. Monkedi ezi vantu navenye 276 ava va kere mosikepa tava ka sika konontere awo vandjewa-ndjewa, ngomu ga yi tumbwidilire muengeli.
Sirudi esi kusitumbura asi Malita. Vantu vapo mbili sili, makura tava pakere mbili owo va tundire mosikepa. Mukarompepo apa gwa litulire, Paurusa tava mu tura mosikepa nasopeke nokumutwara koRoma.
Yirugana 27:1-44; 28:1-14.
Mapuro
- Yinke yina horoka kosikepa esi ana rondo Paurusa apa sina ya piti pepi nosirudi saKereta?
- Yinke ana tanterePaurusa avavana kara mosikepa?
- Ngapi omu sina tekauka sikepa moyintau?
- Mapukururo musinke ana kugava mupitisili govakwayita ogu ana kuvakunga, ntani vantu vangapi vana ka sika konontere vandjewa-ndjewa?
- Yinke edina lyosirudi esi vana hegeke, ntani yisinke yina horoka kwaPaurusa apa mukarompepo guna litura?
Mapuro gokugwederera ko
- Resa Yirugana 27:1-44.
Ngapi omu ehuguvaro lyetu mousili wetjango lyoBibeli kulinkondopeka apa atu resa sihorokwa sorugendo rwaPaurusa koRoma?
- Resa Yirugana 28:1-14.
Nsenesi vapagani womoMalita va “haferere unene” mupositoliPaurusa novakwawowosikepa sokuteka, yisinke nava vhura kurugana Vakriste ntani unene po monkedi musinke?
