Esimwititi 115: Paradisa zompe kontunda zevhu
TARA yitji yoyire oyo nonombya doufuuli ntani nonondundu dononde. Nani kapisi poufuuli apa? Tara omu mpunza ana kulya pokuwoko komumatigona. Tara hena vanyime nononkambe dina sikama konyima mezana. Ove kapi to hafere kutunga membo mevango ngeli ndi?
Karunga kuna ku harere o paruke narunye pevhu moparadisa. Age kapi ana ku harere hena asi o kare nomaudigu nokukora oku aku gwana vantu naina. Eli yilyo etumbwidiro lyoBibeli kowo ngava ka paruka moparadisa zompe: ‘Karunga nga kara nawo. Kapi ngaku kara hena nomfa ndi kulira ndi kukora. Yininke yanare yina dimi po.’
Jesus nga ka divilisa nawa-nawa asi malisinto gomawa aga ga kona kukahoroka. Ono diva asi siruwoke? Yimo, konyima zapa nga ka zeresa evhu komaudona nagenye nokovantu wovadona. Diworoka, Jesus apa ga kere pevhu nga verura vantu komauvera nagenye, ntani nampili konomfa kooku nga va pindura. Jesus kwa yi ruganene eyi a likide eyi nga ka rugana pevhu nalinye apa nga ka kara Hompa gouhompa waKarunga.
Gazadara ko tupu asi ngapi omu ngayi ka wapa moparadisa zompe pevhu! Jesus, ntani navamwe ava ga horowora, ngava ka pangera meguru. Vapangeli ava ngava ka kunga navenye vepevhu nokukadivilisa asi vana hafa. Tu tareni asi yinke twa hepa kurugana yipo tu divilise asi Karunga nga ka tu pa mwenyo gwanarunye moparadisa zendi zompe.
Ehororo 21:3, 4; 5:9, 10; 14:1-3.
Mapuro
- Nomukaro musinke zina likida Bibeli ngatu ka hafera moParadisa zepevhu?
- Yinke azi tumbwidire Bibeli kowo ngava paruka moParadisa?
- Siruwoke nga ka divilisa Jesus asi malisinto aga gomawa ga kona kuhoroka?
- Apa ga kere Jesus pevhu, yinke ga rugene mokulikida eyi ngano nga ka rugana ngoHompa goUhompa waKarunga?
- Jesus ntani nava ngava ka pangera nendi meguru, yisinke ngava ka divilisa apa ngava ka pangera pevhu?
Mapuro gokugwederera ko
- Resa Ehororo 5:9, 10.
Morwasinke natu vhulira kukara nehuguvaro asi owo ngava ka pangera evhu mEpangero lyoNomvhura Eyovi ngava ka kara vahompa novapristeli wosinka nonkenda?
- Resa Ehororo 14:1-3.
Edina lyaGuhya neli lyoNzwi aga va tjanga poyipara yovantu 144 000, yisinke ya fanekesa?
